3 თებერვალს ანალიტიკური სააგენტო SpaceStandard-ის ფეისბუქ-გვერდზე გავრცელდა ინფორმაცია ნიუ-იორკის მერის, ზოჰრან მამდანისა და ტრეფინკინში ბრალდებული ჯეფრი ეპსტინის შესახებ. როგორც აღწერაში ვკითხულობთ, “მამდანი, სავარაუდოდ, ეპშტეინის შვილია” და გამოქვეყნებულ ფაილებში არაერთი ფოტოა, სადაც ახალგაზრდა მამდანი ეპსტინთან ერთად არის ასახული.
ერთ-ერთი ფოტო, რომელიც SpaceStandard-მა გამოიყენა, 3 თებერვალს ასევე გაავრცელა რუსულენოვანმა ფეისბუქ-მომხმარებელმა, რომელიც ამტკიცებს, რომ ზოჰრან მამდანი ჯეფრი ეპსტინის შვილია.
ვრცელდება ხელოვნური ინტელექტით გენერირებული ფოტოები, რომლებზეც თითქოს ჯეფრი ეპსტინი ნიუ იორკის მერ ზოჰრან მამდანისთან და მის დედასთან, მირა ნაირთან ერთადაა გამოსახული.
გავრცელებული ფოტოებიდან ერთ-ერთზე ჩანან ჯეფრი ეპსტინი და ახალგაზრდა ქალი ჩვილით ხელში. აღნიშნულ ფოტოს იყენებენ მტკიცების დასტურად, რომ ქალი მირა ნაირია, რომელსაც ხელში ახალშობილი ზოჰრან მამდანი უჭირავს და ეპსტინთან ერთად იმყოფება. რეალურად, ფოტო ხელოვნური ინტელექტის მიერ არის შექმნილი.
ფოტოზე ხარვეზები ვიზუალური დაკვირვებითაც შეიმჩნევა. მაგალითად, ჩვილის ფეხის ტერფი დეფორმირებულია, ასევე, არაბუნებრივად გამოიყურება ქალის ხელის თითები – ცერა თითი ნაწილობრივ შერწყმულია მეორე ხელის საჩვენებელ თითთან.
ფოტო ხელოვნური ინტელექტის ამომცნობ ხელსაწყოებშიც გადავამოწმეთ. InVID-ის მიერ ნაჩვენები შედეგით, ფოტო 73%-იანი ალბათობით ხელოვნური ინტელექტის მიერ არის გენერირებული.
იმას, რომ ფოტო AI-ის გამოყენებითაა შექმნილი, ადასტურებს კიდევ ერთი ხელსაწყო – AI or NOT.
აღსანიშნავია ისიც, რომ მამდანის დედის, მირა ნაირის ფოტოებისა და ფოტოზე გამოსახული ქალის შედარებით შესამჩნევია, რომ ისინი გარეგნულად ერთმანეთს არ ჰგვანან.
გარდა ამისა, ფოტო არ გავრცელებულა რეპუტაციულ წყაროებში – ის არ გამოუქვეყნებია დასავლურ მედიას და მხოლოდ სოციალურ ქსელებში იძებნება. აშშ-ის იუსტიციის დეპარტამენტის მიერ გამოქვეყნებულ ფაილებში ეპსტინთან კავშირში მამდანი არ არის მოხსენიებული. ზოჰრან მამდანის მამა მაჰმუდ მამდანია – კოლუმბიის უნივერსიტეტის ანთროპოლოგიის პროფესორი. AI ვიზუალებზე დაყდნობით მტკიცებები მას შემდეგ გავრცელდა, რაც ამოჩნდა, რომ გასაჯაროვებულ ფაილებში მამდანის დედის, მირა ნაირის სახელია ნახსენები, თუმცა, უნდა აღინიშნოს, რომ მისი სახელი რაიმე დანაშაულთან კავშირში არ ფიგურირებს. დოკუმენტი ეხება პუბლიცისტ პეგი სიგალის მეილს, რომელშიც ის ეპსტინს სწერს, რომ 2009 წელს ფილმის ჩვენების შემდგომ გილეინ მაქსველის სახლში გამართულ წვეულებაზე გავლენიან ადამიანებს შეხვდა, მათ შორის, ჯილდოს მფლობელ რეჟისორ მირა ნაირს. AI-ით გენერირებული ფოტოების გავრცელებას ნაირი Reuters-ის მიერ დასმული კითხვის საპასუხოდ გამოეხმაურა და უარყო, რომ ეპსტინთან და სხვა პირებთან მსგავსი ფოტოები აქვთ გადაღებული.
აღსანიშნავია, რომ ერთ-ერთი ფოტო, რომელიც SpaceStandard-ის პოსტშია გამოყენებული, “მითების დეტექტორმა” წარსულში უკვე გადაამოწმა. ფოტოზე მირა ნაირი, ჯეფრი ეპსტინი, ბილ კლინტონი და მცირეწლოვანი ბავშვი ჩანან.
რეალურად, აღნიშნული ფოტოს პირველწყარო არის X-ის ანგარიში “DumbFckFinder” (DFF), რომელიც სატირული ხასიათისაა და სისტემატურად აქვეყნებს AI-ით გენერირებულ კადრებს. ის აღწერაშიც მიუთითებს, რომ “მაღალი ხარისხის AI ვიდეოებსა და მიმებს” ავრცელებს. ვრცლად წაიკითხეთ მასალაში:
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
