18 ნოემბერს ფეისბუქ-ანგარიშმა “დაათ ცაბაძე” გამოაქვეყნა ვიდეო, რომელშიც ჩანს როგორ ცეკვავენ ჭავჭავაძის გამზირზე შეკრებილი აქციის მონაწილეები სიმღერაზე, რომელსაც “მოსკოვი” ჰქვია და გერმანულ ბენდ “ჩინგიზ ხანს” ეკუთვნის. სოციალური ქსელის მომხმარებლები, რომლებიც ამ პოსტს ეხმაურებიან, წერენ, რომ აქციის მონაწილეები ამ სიმღერით რეალურად მოსკოვს ადიდებენ, მაშინ როდესაც გამოსვლებში რუსეთს აგინებენ.
ვიდეო, რომელშიც საპროტესტო აქციის მონაწილეები სიმღერაზე “მოსკოვი” ცეკვავენ, დამონტაჟებულია. რეალურად, ვიდეოს ავთენტიკურ ვერსიაში ისმის სიმღერა “One way ticket”, რომელსაც რუსეთთან კავშირი არ აქვს.
ფეისბუქზე გავრცელებული ვიდეოს თავდაპირველ ვერსიას “მითების დეტექტორმა” საპროტესტო ჯგუფში “დაიტოვე” მიაკვლია. ვიდეო ჯგუფის წევრმა 18 ნოემბრის დილას, 06:11 საათზე ატვირთა. კადრებში აქციის მონაწილეები ცეკვავენ ბენდ Eruption-ის სიმღერა One way ticket-ზე, რომელიც ცნობილი ამერიკელი მომღერლის, ნილ სედაკას სიმღერის განახლებული ვერსიაა.
დაათ ცაბაძის მიერ ატვირთული ვიდეო დამონტაჟებულია და მასში აღნიშნული სიმღერის მაგივრად ისმის გერმანული ბენდი ‘ჩინგიზ ხანის” 1979 წელს გამოსული ჰიტი “Moskau” (მოსკოვი). აღსანიშნავია, რომ სიმღერის ტექსტში მართლაც ბევრი ნაწილია, სადაც ისინი რუსეთის დედაქალაქს აქებენ, რის გამოც მან დიდი პოპულარობა მოიპოვა სსრკ-ში. 1980 წელს ბენდმა ავტრალიაში გამოუშვა სიმღერის ინგლისური ვერსია, რომელიც ადგილობრივმა მედიამ მოსკოვში მიმდინარე ოლიმპიადის გაშუქებისას მასიურად გამოიყენა, რის შედეგადაც სიმღერა დიდხანს ინარჩუნებდა რეიტინგში პირველ ადგილს ავსტრალიაში.
26 ოქტომბრის საპარლამენტო არჩევნების შემდეგ დაწყებული საპროტესტო აქციების დისკრედიტაციის მიზნით მუდმივად ვრცელდება მცდარი ინფორმაცია. “მითების დეტექტორმა” არაერთი მსგავსი დეზინფორმაციული თუ მანიპულაციური შინაარსის მქონე მტკიცება გამოავლინა. მათ შორის იყო გაყალბებული ვიდეო, სადაც ცეკვის ვიდეოზე მუსიკის ხმა არის შეცვლილი.
წყაროს შესახებ:
ყალბი ფეისბუქ-ანგარიში დაათ ცაბაძე სოციალურ ქსელში 2019 წლიდან აქტიურობს, ის მონაწილეობდა ანტისაოკუპაციო პროტესტის მადისკრედიტირებელ კამპანიაში. დაათ ცაბაძის მიერ გავრცელებული ყალბი ინფორმაცია “მითების დეტექტორს” წარსულშიც რამდენჯერმე გადაუმოწმებია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
