23 იანვარს პროსახელისუფლებო სარედაქციო პოლიტიკის მქონე მედიის POSTV-ის ფეისბუკ გვერდებმა POSTV – ანალიტიკა და POSTV – პოლიტიკა გაავრცელეს ვიდეო, რომელზეც წერენ, რომ ის “დროას” ლიდერის, ელენე ხოშტარიას ჯგუფელების მიმართვას ასახავს. ვიდეოში რუსულენოვანი პირები აღნიშნავენ, რომ ისინი ხოშტარიას ჯგუფელები არიან; ერთ-ერთი მათგანი ამბობს, რომ МГИМО-ში სწავლისას ელენე ხოშტარიასთან ერთად სვამდნენ, ახლა კი ხოშტარიას თბილისში მარტოს უწევს დალევა:
„მივესალმებით ელენე ხოშტარიას! ის ჩვენთან ერთად სწავლობდა МГИМО-ში, სადაც ხშირად ერთად ვსვამდით. დღეს კი მან მიგვატოვა და მარტო სვამს თბილისში. დაგვიბრუნდი, ჩვენ გარეშე ნუ სვამ. საზიანოა შენი ჯანმრთელობისთვის. ძალიან მოგვენატრე. უფრო მეტად დასალევად. ლენაჩკა, ან ჩვენ წაგვიყვანე ან სულ ყველა ჩვენით ჩამოვალთ. და დაიმახსოვრე ჩვენი მაფია შენს გამო ნებისმიერს დედას უტირებს.”
იდენტური ვიდეო ასევე გამოჩნდა მცდარი ინფორმაციის ხშირად გამავრცელებელ ფეისბუკ ანგარიშებზე: ნინო კვარაცხელია, Xaxutaishvili Irma, Dato Faika Nacvlishvili.
ელენე ხოშტარიას შესახებ ვიდეომანიპულაცია ვრცელდება. რეალურად, ვიდეოში ვხედავთ პირებს, რომლებიც ფასიან სერვისს უწევენ ინტერნეტ მომხმარებლებს და TikTok-ზე დამკვეთების ვიდეოებს ანთავსებენ. შესაბამისად, ნებისმიერ მსურველს შეუძლია მათთვის ფულის გადახდა სასურველი შინაარსის ვიდეოს ჩასაწერად.
“მითების დეტექტორმა” ვიდეოში ნაჩვენები პირებისა და ვიდეოს პირველწყაროს ძიების პროცესში მიაკვლია TikTok ანგარიშს “Cucumber Mafia”, რომელიც აღნიშნულ პიროვნებებს ეკუთვნით, ანგარიშს ნახევარ მილიონზე მეტი გამომწერი (516.8K) ჰყავს. ანგარიშზე ასეულობით ვიდეო დევს, მათ შორის ათობით, კონკრეტული პირებისთვის ჩაწერილი მისასალმებელი ან დაბადების დღის მისალოცი ვიდეოებია. პროფილის აღწერაში მითითებულია, რომ მსურველებმა ინდივიდუალური ვიდეოს შეკვეთისთვის მათ პირად შეტყობინებაში უნდა მიწერონ. აღნიშნულს ადასტურებს ანგარიშზე აპინული ვიდეოც, რომელშიც ხსნიან თუ სად შეიძლება მათთვის სასურველი ვიდეოს შეკვეთა.
ვიდეო, რომელშიც ელენე ხოშტარია ფიგურირებს, თავდაპირველად სწორედ აღნიშნულ TikTok ანგარიშზე, 23 იანვარს, თბილისის დროით 19:51 საათზე აიტვირთა და დაახლოებით ნახევარი საათის შემდეგ დაიწყო მისი ფეისბუქზე გავრცელება. Cucumber Mafia-ს მიერ ატვირთულ ორიგინალი ვიდეოს აღწერაში ასევე ვკითხულობთ, რომ ვიდეოს შესაკვეთად მათ პირადი შეტყობინება უნდა გავუგზავნოთ.
“მითების დეტექტორი” @cucumber_mafia-ს პერსონალიზებული ვიდეოს მომზადების საფასურის გასაგებად დაუკავშირდა. გუნდი ნებისმიერ მსურველს 40 დოლარად კონკრეტული ადამიანის ან ჯგუფის მოთხოვნების გათვალისწინებით ვიდეოს დაუმზადებს და საჭიროა მათთვის მხოლოდ იმ პიროვნების სახელისა და ფოტოს მიწოდება, ვისთვისაცაა განკუთვნილი შეკვეთილი ვიდეო.
აღსანიშნავია, რომ POSTV-ის მიერ გავრცელებული ვიდეო 38 წამია, ორიგინალი კი 54. ფეისბუქზე ატვირთულ ვიდეოში მოჭრილია საწყისი კადრი, სადაც ეს კაცები თავის თავს წარადგენენ და ასევე ნაწილი, რომელშიც ვიდეოში ნაჩვენები მესამე პიროვნება კამერის ახლოს საუბრობს. საინტერესოა, რომ ამ კაცის ამოჭრილ კადრში ჩანს მისი ქურთუკის სახელო, რომელზეც უკრაინის დროშაა დატანილი.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
