27 და 28 ივლისს ქართულ და რუსულენოვანმა (1,2) ფეისბუქ ანგარიშებმა გამოცემა The Independent-ის ვიდეო გაავრცელეს, რომელშიც მამაკაცი, სახელად გრეგ უოლესი კომპანია “Good Harvest-ის” შესახებ მოგვითხრობს, სადაც ადამიანის სხეულის უჯრედებისგან ხორცი იწარმოება. გავრცელებული პოსტების მიხედვით, გრეგ უოლესი “საოცარ ადამიანის ხორცს” ბრიტანულ “მეოთხე არხზე” აქებდა, ხოლო რაც შეეხება ხორცს, პოსტების თანახმად, ის ლაბორატორიაში ადამიანის ქსოვილისგან მიიღება და მისი გამოყენებით სტეიკის, ჰამბურგერისა და ძეხვის მომზადებაა შესაძლებელი.
გავრცელებული ვიდეო გამოცემა The Independent-ს ეკუთვნის და ის ადამიანის უჯრედებისგან დამზადებული ხორცის შესახებ გადაღებულ ბრიტანულ ფსევდო-დოკუმენტურ ფილმს ეხება. ფილმი კომედიური შინაარსისაა და მასში დასახელებული კომპანია Good Harvest და ნაჩვენები ადამიანის ხორცის საწარმო რეალურად არ არსებობს.
ფეისბუქზე გავრცელებული ვიდეო გამოცემა The Independent-ის 25 ივლისის სტატიიდანაა სათაურით: “მეოთხე არხის” მაყურებლები გაოგნებულები არიან გრეგ უოლესის ფსევდო-დოკუმენტური ფილმით (mockumentary) “ადამიანის ხორცის ჭამის” შესახებ”.
სტატიის მიხედვით, კომედიური შინაარსის ფილმი, სახელად “გრეგ უოლესი: ბრიტანული სასწაული ხორცი” კომედიური ჟანრის მწერალს მეთ ედმონდს ეკუთვნის და ის “მეოთხე არხის” ეთერში 24 ივლისს გავიდა. “მეოთხე არხზე” ფილმის აღწერაში ვკითხულობთ, რომ სურსათის ფასების ზრდის ფონზე, გრეგ უოლესი ლაბორატორიაში შექმნილ ახალ ხორცს იკვლევს.
თუმცა, ფილმი კომედიური შინაარსისაა და მასში წარმოდგენილი ფაქტები რეალური არაა. ფილმის მიხედვით, ადამიანის სხეულის უჯრედებისგან ხორცს კომპანია Good Harvest აწარმოებს, რომელიც ადამიანებს მათი ხორცის სანაცვლოდ ფულს უხდის, მაგრამ სინამდვილეში არც ეს კომპანია და არც საწარმო, რომელსაც ფილმში ვხედავთ, არ არსებობს.
იმას, რომ ფილმი კომედიური ჟანრისაა IMDB-ს ოფიციალური საიტიც ადასტურებს.
The Independent-ის სტატიის მიხედვით, ფილმის შემქმნელების მიზანი ბრიტანეთში ცხოვრების ღირებულების კრიზისის შესახებ ცნობიერების ამაღლება იყო.
აღსანიშნავია, რომ სიტყვა “mockumentary” (ფსევდო-დოკუმენტური ფილმი) The Independent-ის ვიდეოს პირველივე წამებზე გვხვდება, თუმცა ფეისბუქზე გავრცელებულ პოსტებში ვიდეოს შინაარსი რეალობადაა აღქმული.
წყაროების შესახებ:
ანონიმური ანგარიში ნინო ნინო ანტიდასავლური და კონსპირაციული შინაარსის პორტებს ხშირად ავრცელებს. “მითების დეტექტორს” ანგარიშის მიერ გავრცელებული დეზინფორმაცია “მითების დეტექტორმა” წარსულშიც არაერთხელ გადაამოწმა.
რუსულენოვანი ანგარიშები Томуля Гончаренко და Larisa Loginova შეთქმულების თეორიებსა და ანტიდასავლური შინაარსის ინფორმაციას რეგულარულად ავრცელებენ.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
