3 აპრილს ფეისბუკ მომხმარებელმა, ირაკლი ვლადიმერის-ძე ზაქარეიშვილი საკუთარ ანგარიშზე გამოაქვეყნა ფოტო, რომელზეც პრეზენტატორი შეკრებილ აუდიტორიას კაცის სათესლე პარკში გაყრილი ლურსმნის ფოტოს აჩვენებს. პოსტის ავტორის აღწერის თანახმად, ეს “ფაშიზმის გაკვეთილზე” გადაღებული ფოტოა და დამსწრეებს ტყვეების გამოტეხას ასწავლიან. ფოტოზე უკრაინული წარწერა “უკრაინელებისთვის შესვლა უფასოა” ჩანს, რაც მთლიანობაში ქმნის შთაბეჭდილებას, რომ პოსტის ავტორი მიმდინარე რუსეთ-უკრაინის ომს გულისხმობს.
გავრცელებული ფოტო არასწორი აღწერით ვრცელდება და ის არა ტყვეების წამებაზე ჩატარებულ ლექციას, არამედ რუსი ოპოზიციონერი ხელოვანის, პიოტრ პავლენსკის ლექციიდანაა. ლექცია უკრაინაში, ქალაქ ოდესაში 2016 წელს ჩატარდა და პავლენსკი აუდიტორიას თავისი პერფორმანსის ფოტოს აჩვენებდა.
რუსი ოპოზიციონერი ხელოვანის, პიოტრ პავლენსკის ლექცია 2016 წლის 12 აგვისტოს ოდესაში, ცენტრ Impact Hub Odessa-ში ჩატარდა. ლექცია პავლენსკის აქტივიზმს, რუსეთში არსებულ ბიუროკრატიულ სისტემასთან და დიქტატორულ რეჟიმთან მის ბრძოლას ეძღვნებოდა.
სათესლე პარკში გაყრილი ლურსმნის ფოტო, რომელსაც პავლენსკი წარადგენს, ხელოვანის პერფორმანსს სახელად “ფიქსაციას” ასახავს. 2013 წლის 10 ნოემბერს პავლენსკი მოსკოვში, წითელ მოედანზე გაშიშვლდა და საკუთარი სათესლე პარკი ქვაფენილზე ლურსმნით მიაჭედა. ამ სახით პავლენსკიმ “თანამედროვე რუსული საზოგადოების ინდიფერენტულობის და ფატალიზმის” წინააღმდეგ გამოხატა პროტესტი.
აღსანიშნავია, რომ 2016 წელს Impact Hub Odessa-ში ლექციის დროს დაპირისპირება მოხდა “ადოლფიჩის” ფსევდონიმით ცნობილ მწერალ ვლადიმირ ნესტერენკოსა და დაცვის თანამშრომლებს შორის. ლექციაზე ნესტერენკო გამოხატავდა უკმაყოფილებას, იყენებდა არანორმატიულ ლექსიკას, სვამდა ალკოჰოლურ სასმელს. აუდიტორიიდან მისი გაყვანის დროს დაპირისპირება მოხდა და ნესტერენკომ დაცვის ერთ-ერთი თანამშრომელი დანით დაჭრა. დაჭრილი კაცი დაცვის კიდევ ერთ თანამშრომელთან ერთად საავადმყოფოში გადაიყვანეს. თვითმხილველთა ცნობით, საავადმყოფოში მისვლამდე, გზაში დაცვის მეორე თანამშრომელი ცუდად გახდა და გულის შეტევით გარდაიცვალა.
2016 წელს ფოტო პავლენსკის ლექციიდან ანტი-დასავლური პროპაგანდისტური ნარატივით ვრცელდებოდა. ფორუმზე 4chan-ი ლექციიდან ფოტო შემდეგი აღწერით გამოქვეყნდა: “ეს არის ამერიკის სახელმწიფო დეპარტამენტის დაფინანსებული დემოკრატიული განათლება უკრაინაში”. ტვიტერზე კი ლექციის ფოტო ერთ-ერთი მომხმარებლის შემდეგი კომენტარით ვრცელდებოდა: “ლექცია ევროპულ უკრაინაში. მე დავამთავრე”.
რუსი ხელოვანი პიოტრ პავლენსკი პოლიტიკური ხასიათის საპროტესტო აქციებით არის ცნობილი და მისი პერფორმანსები საზოგადოებაში არაერთგვაროვან რეაქციას იწვევს. პავლენსკის აქციებს თვითდაზიანების სახე ხშირად აქვს. 2012 წელს მან სანქტ-პეტერბურგში აქცია ამოკერილი პირით გამართა. პავლენსკიმ ჯგუფ Pussy Riot-ის წევრების დაკავება გააპროტესტა. მისი თქმით, ამოკერილი პირი რუსეთში ცენზურის გამკაცრების სიმბოლო იყო. 2013 წელს პავლენსკი სანქტ-პეტერბურგში მავრთულხლართებში შიშველი გაეხვია და ასე საკანონმდებლო სისტემის რეპრესიულობა გააპროტესტა.
2017 წლის მაისის დასაწყისში პიოტრ პავლენსკიმ საფრანგეთში პოლიტიკური თავშესაფარი მიიღო. მან რუსეთი ოჯახთან ერთად 2017 წლის იანვარში დატოვა, მას შემდეგ, რაც ის მსახიობმა ანასტასია სლონინამ სექსუალურ ძალადობაში დაადანაშაულა. საფრანგეთში პოლიტიკური თავშესაფრის მიღებიდან მალევე რუსეთის საგამოძიებო კომიტეტმა უარი თქვა პავლენსკის წინააღმდეგ სექსუალურ ძალადობის ბრალდებასთან დაკავშირებით საქმე აღეძრა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
