31 მარტს სახელისუფლებო მედიებმა საინფორმაციო სააგენტო INFO9, ნიუსჰაბი, დაიჯესტი, Exclusive Media გამოაქვეყნეს საინფორმაციო ბარათები, რომელთა მიხედვითაც ტვ პირველის ეთერიდან 31 მარტს საპროტესტო აქციის გაშუქების დროს პრეზიდენტ ზურაბიშვილის უკან მიხეილ სააკაშვილის მხარდამჭერი ბანერები ტელეკომპანიამ კადრიდან გააქრო.
გავრცელებული პოსტები მანიპულაციურია და ამტკიცებს, თითქოს ტვ პირველის ეთერიდან მიხეილ სააკაშვილის მხარდამჭერი ბანერები ტელეკომპანიამ მიზანმიმართულად გააქრო. 31 მარტს აქციაზე პრეზიდენტ სალომე ზურაბიშვილის სიტყვით გამოსვლის პირდაპირი ეთერის დროს სხვადასხვა რაკურსიდან გადაღებული კადრები ენაცვლებოდა ერთმანეთს. სააკაშვილის მხარდამჭერი ბანერები ზურაბიშვილის სიტყვით გამოსვლის პარალელურად რამდენჯერმე ჩნდება.
ტვ პირველს ეთერში 31 მარტის აქცია “დგება ხალხის გაზაფხული” არხის 8 საათიან ცენტრალურ გამოშვებაში გაშუქდა. სალომე ზურაბიშვილის სიტყვით გამოსვლა დაახლოებით 9 საათზე დაიწყო (ტვ პირველის იუთუბ-ლაივის 01:05:03), რა დროსაც უკანა ფონზე მიხეილ სააკაშვილის მხარდარდამჭერი ბანერებიც გამოჩნდა.
ზურაბიშვილის გამოსვლა ნახევარი საათი გაგრძელდა. სიტყვით გამოსვლის დროს ტელეკომპანია პირველის პირდაპირ ეთერში სხვადასხვა რაკურსით გადაღებული კადრები ჩანდა. ეთერში ერთმანეთს ენაცვლებოდა ზურაბიშვილის სხვადასხვა მხრიდან გადაღებული კადრები და აქციის კადრები.
გვერდიდან გადაღებულ კადრებში სააკაშვილის მხარდამჭერი ორი დიდი ბანერი არ ჩანს, თუმცა აღსანიშნავია, რომ იმ კადრში, რომელიც მედიებმა საინფორმაციო ბარათზე დაიტანეს და რომელიც თითქოს აჩვენებს, რომ ტვ პირველმა ბანერები ეთერიდან გააქრო, ჩანს სააკაშვილის მხარდამჭერი სხვა ტრაფარეტები.
გვერდიდან გადაღებულ კადრებში სააკაშვილის მხარდამჭერი ორი დიდი ბანერი არ ჩანს, თუმცა აღსანიშნავია, რომ იმ კადრში, რომელიც მედიებმა საინფორმაციო ბარათზე დაიტანეს და რომელიც თითქოს აჩვენებს, რომ ტვ პირველმა ბანერები ეთერიდან გააქრო, ჩანს სააკაშვილის მხარდამჭერი სხვა ტრაფარეტები, აქვე ჩანს ზვიად გამსახურდიას რამდენიმე ბანერიც.
სააკაშვილის მხარდამჭერი ბანერები ჩანს ზურაბიშვილის სიტყვით გამოსვლის ბოლო ნაწილშიც, (იუთუბ-ლაივის დაახლოებით 01:26:21)
31 მარტს, საქართველოს სახელმწიფოებრივი დამოუკიდებლობის აღდგენის რეფერენდუმიდან 34 წლისთავზე, რუსთაველის გამზირზე საპროტესტო მორიგი აქცია გაიმართა. აქციის მონაწილეებმა კიდევ ერთხელ გააპროტესტეს “ქართული ოცნების” არჩეული პოლიტიკური კურსი. პარლამენტის წინ შეკრებილებს სიტყვით მიმართა საქართველოს მე-5 პრეზიდენტმა სალომე ზურაბიშვილმა და წინააღმდეგობის პლატფორმის შექმნა დაანონსა. პლატფორმა ღია იქნება ყველა პროევროპული პარტიისა და ჯგუფისთვის. პროტესტის მთავარ მოთხოვნებად რჩება ახალი საპარლამენტო არჩევნების დანიშნვა და საპროტესტო აქციების პერიოდში დაკავებულთა გათავისუფლება. პარლამენტთან აქტივისტებს როგორც მიხეილ სააკაშვილის, ასევე აქციებზე დაკავებული პირების მხარდასაჭერი ბანერები ჰქონდათ გაშლილი.
არქივის ბმულები: საინფორმაციო სააგენტო INFO9, ნიუსჰაბი, დაიჯესტი, Exclusive Media
