26 ოქტომბერს პროსახელისუფლებო მედიამ – იმედმა (1;2) და პრაიმ ტაიმმა (1;2) გაავრცელეს ინფორმაცია, რომ საერთაშორისო დამკვირვებელი, ოლესია ვართანიანი წერს მის მიერ გამოვლენილ შემთხვევებზე, როცა ოპოზიციის წარმომადგენლები მედიასაშუალებებად რეგისტრირდებიან და საარჩევნო უბნებზე თავიანთ ყოფნას ამით ამართლებენ.
ოლესია ვართანიანის შესახებ პროსახელისუფლებო მედიის მიერ გავრცელებული ინფორმაცია მანიპულაციურია. ვართანიანი საერთაშორისო დამკვირვებელი არ არის, ის საქართველოს მოქალაქე და საია-ს დამკვირვებელია. ასევე, გარდა ოპოზიციის წარმომადგენლებისა, მან დაწერა ხელისუფლების მხარდამჭერებზეც, რომლებიც საარჩევნო უბნებთან არიან მობილიზებული.
მიუხედავად პროსახელისუფლებო მედიის მტკიცებისა, ოლესია ვართანიანი საერთაშორისო დამკვირვებელი არ არის. ის არჩევნებზე საქართველოს ახალგაზრდა იურისტთა ასოციაციის (საია-ს) დამკვირვებელია. ინფორმაცია “მითების დეტექტორს” საია-ში დაუდასტურეს. გარდა ამისა, ვართანიანი საქართველოს მოქალაქეა. “დიახ, საქართველოს მოქალაქე ვარ და ადგილობრივ მისიაში ვარ”. – გვითხრა მან.
გარდა ამისა, “იმედმა” ვართანიანის ის პოსტი გააშუქა, რომელშიც ის უბნებზე ოპოზიციის წარმომადგენლების ყოფნაზე წერდა. აღსანიშნავია, რომ დამკვირვებელმა ასევე დაწერა საარჩევნო უბნებთან პროსახელისუფლებო განწყობის მქონე პირების მობილიზებაზე. კერძოდ, ვართანიანი მის მიერ გამოქვეყნებულ კიდევ ერთ პოსტში წერს:
“ზოგიერთ საარჩევნო უბანზე არიან კაცები მუქი ფერის ტანსაცმლითა და სათვალეებით. ორი მათგანი, ვისაც ვესაუბრე (კამერის მიღმა) ერთნიკურად სომხები სამეზობლოდან, არიან დამკვირვებლები ახალი მედია გამოცემიდან და ღიად ქართული ოცნებისკენ. აღსანიშნავია, რომ ისინი თავს არიდებენ ადგილებს, სადაც დამკვირვებლებს შორის ცნობილი აქტივისტები არიან”.
გარდა ამისა, მას შემდეგ, რაც პროსახელისუფლებო მედიამ ციტატა გამოაქვეყნა, ვართანიანმა დაწერა, რომ იმედმა მის მიერ X-ზე დაწერილ წინა განცხადებებს გვერდი აუარა, ხოლო გაშუქებისას სიტყვებს საკუთარი დეტალები და ყალბი ამბები დაუმატა.
მოამზადა ირინა ფარულავამ
მითების დეტექტორის ლაბორატორია
