26-28 აპრილს რუსულენოვან ანგარიშებზე (1, 2, 3, 4, 5, 6) გავრცელდა ინფორმაცია,რომ პოლონეთში, პჟემისლის მახლობლად, უკრაინულ საფლავებს წარწერა შეუცვალეს. ადრე, უკრაინის მეამბოხე არმიის (UPA) მებრძოლების საფლავის დაფაზე ეწერა: „უკრაინელები, რომლებიც NKVD-სთან (შინაგან საქმეთა სახალხო კომისარიატი საბჭოთა კავშირში) ბრძოლებში დაიღუპნენ“. ახლა კი შემდეგი წარწერაა: “ამ ადგილას დაიღუპნენ UPA-ს წევრები, რომლებიც პასუხისმგებელნი იყვნენ უიარაღო პოლონელების, უკრაინელებისა და ებრაელების ტერორსა და მასობრივ მკვლელობებზე…“
პოსტის ავტორები წერენ, რომ ამჟამად ისტორიული სამართლიანობა აღდგა და მემორიალზე შესაბამისი წარწერაა.
პოლონეთში, უკრაინელების საფლავს წარწერა ნამდვილად შეუცვალეს, თუმცა ეს ვანდალიზმის შედეგად მოხდა და არა ოფიციალურ დონეზე. საკითხთან დაკავშირებით მიმდინარეობს გამოძიება. აღნიშნული ინფორმაცია “მითების დეტექტორს” პოლონეთის პოლიციამ დაუდასტურა.
“მითების დეტექტორი” ინფორმაციის გადასამოწმებლად პოლონეთის პოლიციას დაუკავშირდა. მათი განმარტებით, 21 აპრილს პოლიციაში შევიდა ინფორმაცია მემორიალზე არსებული წარწერის შეცვლის შესახებ. აღნიშნულ საკითხზე მიმდინარეობს გამოძიება. დამნაშავე ჯერჯერობით იდენტიფიცირებული არ არის.
შემთხვევა პჟემიშლის მახლობლად, მონასტირის მთაზე მოხდა. აღსანიშნავია, რომ წარწერა ოფიციალურად არ შეცვლილა და ეს ვანდალიზმის შედეგია.
უკრაინის მეამბოხე არმია (UPA) უკრაინული ნაციონალისტური დაჯგუფებაა, რომელიც1942 წელს შეიქმნა. UPA – ს უკავშირდება 1943−1945 წლებში პოლონელი ხალხის ხოცვა-ჟლეტა ვოლინსა და აღმოსავლეთ გალიციაში. აღნიშნული ტრაგედია განსაკუთრებული სისასტიკით გამოირჩეოდა და მსხვერპლთა უმრავლესობა ქალები და ბავშვები იყვნენ.
უკრაინელების საფლავზე აღნიშნული წარწერის გაკეთების მიზანი პოლონელი და უკრაინელი ხალხის დაპირისპირება და ამ საკითხის ირგვლივ კონფლიქტის გაღვივებაა.
უკრაინის მეამბოხე არმიაზე “მითების დეტექტორი” ადრეც წერდა. ვრცლად, იხილეთ ჩვენს მასალებში:
- რა ვიცით სტეპან ბანდერას შესახებ და როგორ იყენებს მის სახელს კრემლის პროპაგანდა?
- რატომ აიღეს პოლონეთში ძეგლი, რომელსაც სტეპან ბანდერას უკავშირებდნენ?
სტატია Facebok-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
