20 მარტს ფეისბუქ-ანგარიშებმა ირაკლი ირემაძე და დაათ ცაბაძე აშშ-ის პრეზიდენტის, ჯო ბაიდენის ფოტო და ციტატა გამოაქვეყნეს. მათი მტკიცებით, ბაიდენმა განაცხადა, რომ კონფლიქტის ესკალაციის თავიდან ასაცილებლად, რუსეთის პრეზიდენტ გორბაჩოვთან მოლაპარაკებებისთვის მზადაა.
იდენტური ციტატა ტელეკომპანია “სეზონის” გადაცემაში “დღის შეჯამება ნიკოლოზ მჟავანაძესთან” წამყვანმაც წაიკითხა, მან აღნიშნა, რომ ეს იუმორისტული პასაჟი რეალობისგან შორს არ არის. მჟავანაძის ვიდეო taonews.ge-ზეც გამოქვეყნდა.
ბაიდენის განცხადება, რომ ის გორბაჩოვთან მოლაპარაკებებისთვის მზადაა, გაყალბებულია. რეალურად, ამ შინაარსის ციტატა არც თეთრი სახლის ვებ-გვერდზე და არც სხვა ღია წყაროებში არ იძებნება.
როგორც გავრცელებულ პოსტებშია აღნიშნული, ბაიდენის ციტატა თეთრი სახლის პრესსამსახურმა გაავრცელა, თუმცა whitehouse.gov-ზე მსგავსი შინაარსის განცხადება არ იძებნება. ციტატა არც სხვა ღია წყაროებსა და მედიასაშუალებებში არ გვხვდება.
ბოლო განცხადება, რომელშიც ბაიდენმა გორბაჩოვი ახსენა whitehouse.gov-ზე 2022 წლის 31 აგვისტოს, გორბაჩოვის გარდაცვალებას შემდეგაა გამოქვეყნებული. ბაიდენი ამ განცხადებაში აღნიშნავდა, რომ გორბაჩოვი იშვიათი ლიდერი იყო, რომელმაც დაინახა, რომ განსხვავებული მომავალი შესაძლებელი იყო და ამის მისაღწევად საკუთარი კარიერის გარისკვის გამბედაობაც აღმოაჩნდა.
აღსანიშნავია, რომ ჯო ბაიდენის შესახებ სატირული ამბები, დეზინფორმაცია და ვიზუალური მანიპულაციები ხშირად ვრცელდება. ბაიდენის შესახებ გავრცელებულ მადისკრედიტირებელ პოსტებში აქცენტი ზოგჯერ მის ასაკზეც კეთდება. ამ თემაზე ვრცლად იხილეთ “მითების დეტექტორის” მასალები:
- ჯო ბაიდენის ვარშავაში ვიზიტთან დაკავშირებით ვიდეომანიპულაცია ვრცელდება
- ვინ დაუწესა ბაიდენს სანქციები – საუდის არაბეთის პრინცმა თუ PANORAMA.PUB-მა?
- სოციალურ ქსელში ჯო ბაიდენის გამოსვლის ვიდეოფაბრიკაცია ვრცელდება
- ბაიდენის “აღიარება”, თითქოს რუსეთზე დაწესებული სანქციები უმოქმედოა, გაყალბებულ ვიდეოს ეყრდნობა
- ვოლოდიმირ ზელენსკისა და ჯო ბაიდენის ფოტო პროგრამულად არის დამუშავებული
წყაროების შესახებ
ირაკლი ირემაძე “უცხოეთის გავლენის აგენტების” კანონპროექტთან დაკავშირებით “ქართული ოცნების” ლიდერების განცხადებებს აქტიურად ავრცელებდა და კანონპროექტის წინააღმდეგ მიმართული პროტესტის მადისკრედიტირებელ პოსტებს აქვეყნებდა (1, 2). ირემაძეს დეზინფორმაცია წარსულშიც გაუვრცელებია:
რაც შეეხება დაათ ცაბაძეს, ის პრორუსი ტროლია, რომელიც სოციალურ ქსელში 2019 წლიდან აქტიურობს, ის მონაწილეობდა ანტისაოკუპაციო პროტესტის მადისკრედიტირებელ კამპანიაში. 2021 წლის თებერვალში კი ნიკა მელიას დაპატიმრების შემდეგ ამერიკულ დემოკრატიას აკრიტიკებდა.
გავრცელებული პოსტების არქივის ბმულები: 1, 2, 3
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
