5 აპრილს ფეისბუქზე გავრცელდა “მთავარი არხის” საინფორმაციო ბარათი, რომელზეც დატანილია “ერთიანი ნაციონალური მოძრაობის” ერთ-ერთი ლიდერის თინა ბოკუჩავას შემდეგი ციტატა: “ერთიანი ნაციონალური მოძრაობის” ყველა მხარდამჭერი უნდა წავიდეს უკრაინაში და ებრძოლოს რუსეთს, მხოლოდ ასე მოვიშორებთ ოცნებას”.
თინა ბოკუჩავას სახელით და “მთავარი არხის” ვიზუალით გავრცელებული ციტატა გაყალბებულია. საინფორმაციო ბარათი პროგრამულად არის დამუშავებული და მასზე ციტატა შეცვლილია. მსგავსი პოსტი მთავარი არხის ფეისბუქ-გვერდზე არ იძებნება. ასევე ღია წყაროებში არ იძენბნება ბოკუჩავას მსგავსი შინაარსის ციტატა.
თინა ბოკუჩავას მსგავსი შინაარსის ციტატა სხვა ღია წყაროებში არ იძებნება. ციტატა არ გაშუქებულა მედიაში და მსგავსი შინაარსის პოსტი არ იძებნება არც “ერთიანი ნაციონალური” მოძრაობის და არც ბოკუჩავას სოციალური ქსელების გვერდებზე. რაც შეეხება უშუალოდ “მთავარი არხის” ლოგოთი და ვიზუალიით შექმნილ საინფორმაციო ბარათს, ის პროგრამულად არის დამუშავებული. პოსტის ორიგინალი “მთავარი არხის” ფეისბუქ-გვერდზე 3 აპრილს გამოქვეყნდა და დიდი ბრიტანეთის მიერ ქართველი მოსამართლეებისთვის სანქციების დაწესებასთან დაკავშირებით ბოკუჩავას კომენტარს ეხება.
საინფრმაციო ბარათის ორიგინალ ვერსიასთან შედარებისას ჩანს, რომ ყალბ ბარათზე წარწერისთვის გამოყენებულია განსხვავებული ფონტი, რომელიც “მთავარი არხის” სხვა პოსტებზე არ გვხვდება.
აღსანიშნავია, რომ “მთავარი არხის” ვიზუალის გამოყენებით გაყალბებული საინფორმაციო ბარათები წარსულშიც გავრცელებულა. მაშინ მსგავსი სტილით გაყალბებულ საინფორმაციო ბარათებს ფეისბუქ-მომხმარებელი რამაზ მარგველაშვილი ჯგუფში “მიხეილ სააკაშვილი საქართველოს იმედი” აქვეყნებდა, როგორც ჯგუფში მარგველაშვილის აქტივობიდან ჩანს, ის კვლავ აქვეყნებს მსგავს პოსტებს.
აღსანიშნავია, რომ Google-ის საძიებო სისტემაში ბოკუჩავას ყალბი ციტატის ძიებისას, ძიების შედეგები მიუთითებს, რომ მსგავსი შინაარსის პოსტი ფეისბუქ-ჯგუფ “მიხეილ სააკაშვილის საქართველოს იმედი” 4 დღის წინ იყო გამოქვეყნებული, თუმცა ამჟამად ამ ბმულებზე გადასვლისას ჩანს, რომ პოსტი წაშლილია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
