28-29 ოქტომბერს Threads-ზე და ფეისბუკ-ანგარიშებზე (1, 2, 3, 4, 5) გავრცელდა ვიდეო, რომელშიც ვხედავთ თუ როგორ ჩამოდის თვითმფრინავიდან გერმანიის საგარეო საქმეთა მინისტრი ანალენა ბერბოკი. პოსტების ავტორების მტკიცებით, ვიდეო მინისტრის უახლეს ვიზიტს ასახავს ჩინეთში, რომელსაც აეროპორტში ჩინეთის მთავრობის არცერთი ოფიციალური პირი არ დახვედრია. ერთ-ერთი ანგარიშის მიხედვით, ამის მიზეზია ის, რომ ბერბოკმა ჩინეთის პრეზიდენტს დიქტატორი უწოდა. 
სოციალური ქსელების მომხმარებლები ანალენა ბერბოკის შესახებ ვიდეომანიპულაციას ავრცელებენ. რეალურად, კადრები ასახავს გერმანელი მინისტრის ვიზიტს მალაიზიაში, 2024 წლის იანვარში, როდესაც თვითმფრინავი შეცდომით არასწორ ადგილას დაპარკინგდა.
იანვარში ატვირთული ვიდეოსა და ბოლო დღეებში გავრცელებული ვიდეოს შედარება ცხადყოფს, რომ ორივე კადრები ერთსა და იმავე მოვლენას ასახავს, თუმცა ისინი სხვადასხვა რაკურსიდანაა გადაღებული. ანალენა ბერბოკს ორივე ვიდეოში იდენტური ტანისამოსი აცვია, თვითმფრინავის გამოსასვლელთან და დასაშვებ ბილიკზე ერთი და იგივე პირები შეინიშნებიან და აეროპორტის ხედიც იდენტურია.
აღნიშნული ვიდეომანიპულაცია ანალენა ბერბოკის შესახებ ვირუსულად გავრცელდა სხვადასხვა პალტფორმებზე, სწორედ ამიტომ გერმანიის საგარეო საქმეთა სამინიტროს წარმომადგენელმა განცხადებაც კი გააკეთა სამთავრობო ბრიფინგზე, რომელშიც აღნიშნულია, რომ კადრები მინისტრის მალაიზიაში ვიზიტს ასახავს. გაუგებრობის გამო, პილოტმა თვითმფრინავი შეცდომით არასწორ ადგილას დასვა. ამ დროს მინისტრს ადგილობრივი მთავრობის წარმომადგენლები ოდნავ მოშორებით ელოდნენ და ბერბოკს მცირე მანძილის ფეხით გავლა მოუწია მათთან შესახვედრად.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
