19 ოქტომბერს ფეისბუკ-გვერდმა “ანტი ნაცური პოლიტიკა” გაავრცელა პოსტი, რომ 20 ოქტომბერს დაგეგმილი მარში რეალურად “ნაციონალური მოძრაობის” პრაიდია და „საქართველო ირჩევს ევროკავშირს“ – ამ სახელწოდებით არის შეფუთული. პოსტის თანახმად, მსვლელობა მხოლოდ „ნაცმოძრაობის“ ხელისუფლებაში დაბრუნებას ემსახურება!
მტკიცება, რომ მარში “საქართველო ირჩევს ევროკავშირს” ნაციონალური მოძრაობის ორგანიზებულია, დეზინფორმაციაა. მარშს სამოქალაქო ორგანიზაციები უწევენ კოორდინირებას და არა ნაციონალური მოძრაობა. მსვლელობას არც პრაიდთან აქვს არანაირი კავშირი. მარშის მიზანი საქართველოს ევროპული არჩევანის დემონსტრირებაა.
20 ოქტომბერს დაგეგმილი მარში “საქართველო ირჩევს ევროკავშირს” 11 სხვადასხვა ორგანიზაციის მიერაა დაგეგმილი და ნაციონალურ მოძრაობასთან კავშირი არ აქვს. ღონისძიებას შემდეგი ორგანიზაციები უწევენ კოორდინირებას:
- ჩემი ხმა ევროკავშირს
-
საქართველოს ევროპული ორბიტა
- IDFI – ინფორმაციის თავისუფლების განვითარების ინსტიტუტი
- სამოქალაქო საზოგადოების ფონდი
- საქართველოს მომავლის აკადემია
- ყვარლის ევროკლუბი
- საერთაშორისო გამჭვურვალობა – საქართველო
- სამოქალაქო მოძრაობა თავისუფლებისთვის
- საფარი
- დემოკრატიის მცველები
- სასამართლოს გუშაგი
მარშის მონაწილეები 17:00-საათზე ხუთი სხვადასხავა ლოკაციიდან დაიძვრებიან და ბოლოს 19:00 საათზე თავისუფლების მოედანზე შეიკრიბებიან.
მარშის მიზანი არჩევნებამდე ერთი კვირით ადრე იმის ჩვენებაა, რომ საქართველო ირჩევს ევროკავშირს. ღონისძიებას პრაიდთან კავშირი არ აქვს. ხალხის შეკრების შემდეგ, თავისუფლების მოედანზე კონცერტი გაიმართება.
აღსანიშნავია, რომ “ნაციონალური მოძრაობა” და “თბილისი პრაიდი” ღონისძიებას უერთდებიან, თუმცა ორგანიზატორები არ არიან.
წყაროს შესახებ
ფეისბუქ გვერდი “ანტი ნაცური პოლიტიკა” 2024 წლის 6 ივნისს შეიქმნა, სახელწოდებით “Newsia”, 15 ოქტომბერს კი სახელი შეიცვალა. გვერდზე გამოქვეყნებული პოსტების შინაარსი ანტიოპოზიციურია და ოპოზიციური პარტიების დისკრედიტაციას ემსახურება.
გვერდს სახელის შეცვლიდან დღემდე ანუ 5 დღის პერიოდში 11 სარეკლამო პოსტი აქვს დაფინანსებული, ყველა მათგანი ოპოზიციის წინააღმდეგაა მიმართული. იქიდან გამომდინარე, რომ პოლიტიკური რეკლამის განთავსებისთვის, საჭიროა განმთავსებელმა გაიაროს ავტორიზაცია და შეავსოს საკონტაქტო მონაცემები, ფეისბუქ გვერდს “ანტი ნაცური პოლიტიკა” შევსებული აქვს მეილის, ტელეფონის ნომრის და ვებ-საიტის ველები. თუმცა, აღსანიშნავია, რომ მითითებული მონაცემებით განმთავსებლის იდენტიფიცირება ვერ ხერხდება, რადგან რეალური ვებ-საიტიც ნაცვლად, აღნიშნულ ველში ამავე ფეისბუქ გვერდის მისამართია მითითებული, მეილი ასევე შექმნილია იგივე სახელწოდებით – [email protected], რაც შეეხება ტელეფონის ნომერს (+995500111459), ის დაკავშირებისას მიუწვდომელია და არც ტელეფონის ნომრების ბაზაში იძებნება.
გვერდის საარქივო ბმული
პოსტის არქივის ბმული
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
