7 დეკემბერს Threads-ისა და Facebook-ის რუსულენოვანმა მომხმარებლებმა გაავრცელეს ინფორმაცია, რომლის მიხედვითაც ლიეტუვა და ლატვია მოულოდნელად დაუპირისპირდნენ რუსეთის წინააღმდეგ ახალი, რიგით მე-15 სანქციების პაკეტის მიღებას და ის დაბლოკეს. კომენტარებით ირკვევა, რომ ფეისბუქ-მომხმარებლების ნაწილის აღქმით, ქვეყნების რუსეთის დასანქცირებას ეწინააღმდეგებიან.
ლიეტუვისა და ლატვიის მიერ სანქციების პაკეტის დაბლოკვის შესახებ ინფორმაცია კონტექსტის გარეშე ვრცელდება. ქვეყნებმა პაკეტს ვეტო მართლაც დაადეს, თუმცა მიზეზი სანქციების გამკაცრების მოთხოვნა იყო.
სოციალური ქსელის მომხმარებლები აღნიშნულ ინფორმაციას კონტექსტის გარეშე აქვეყნებენ. რეალურად, ლიეტუვამ და ლატვიამ რუსეთის დასანქცირების მე-15 პაკეტს ვეტო მართლაც დაადეს, რის მიზეზებზეც გამოცემა Politico 6 დეკემბერს წერდა. გამოცემის ინფორმაციით, ორი ბალტიისპირა სახელმწიფო უკმაყოფილო იყო სანქციების იმ ნაწილით, რომელიც დასავლურ კომპანიებს საშუალებას აძლევდა, კვლავ გაეგრძელებინათ რუსულ ბაზარზე საქმიანობა. აღნიშნული პუნქტი თავდაპირველად დოკუმენტში ჩაიწერა იმ კომპანიების მხარდასაჭერად, რომლებიც აცხადებენ, რომ სურთ რუსული ბაზრის დატოვება, მაგრამ ამას ვერ ახერხებენ სხვადასხვა მიზეზების გამო. ლიეტუვისა და ლატვიის წარმომადგენლებმა მიიჩნიეს, რომ ამ დეტალს ბევრი კომპანია თავის დაძვრენის საშუალებად და სანქციების გვერდის ასავლელად იყენებს, რაც დაუშვებელია. ქვეყნებს სანქციების გამკაცრება და ამით რუსეთის დასუსტება სურთ, რის გამოც დოკუმენტიდან აღნიშნული ნაწილის ამოღება მოითხოვეს, თუმცა შეთანხმება ვერ შედგა და შესაბამისად მე-15 პაკეტის მიღება ვერ მოხერხდა.
გავრცელებული ინფორმაცია უკრაინულმა ფაქტების გადამმოწმებელმა ორგანიზაცია Stopfake-მაც გადაამოწმა.
“მითების დეტექტორს” სანქციებზე, მათ შორის რუსეთისთვის დაწესებული სანქციების შესახებ წარსულში არაერთი დეზინფორმაციული თუ მანიპულაციური მტკიცება გადაუმოწმებია:
- ბაიდენის “აღიარება”, თითქოს რუსეთზე დაწესებული სანქციები უმოქმედოა, გაყალბებულ ვიდეოს ეყრდნობა
- ვინ ავრცელებს დეზინფორმაციას, რომ აშშ რუსეთისთვის სანქციების დაწესებას არ აპირებს?
- დაუწესა თუ არა მოლდოვამ რუსეთს სანქციები?
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
