8 დეკემბერს ფეისბუკზე (1, 2, 3, 4) გავრცელდა ინფრომაცია, რომ აქტივისტი სანდრო ქინქლაძე “ტვ პირველის” გადამღებ ჯგუფზე თავდასხმის საქმეზე დააკავეს. ინფორმაცია ამავე აღწერით წყალტუბოს კონსერვატიული მოძრაობის ფეისბუკ-ანგარიზეც გავრცელდა.
მტკიცება, თითქოს აქტივისტი სანდრო ქინქლაძე “ტვ პირველის” გადამღებ ჯგუფზე თავდასხმის გამო დააკავეს, დეზინფორმაციაა. სპეციალური საგამოძიებო სამსახურის ინფორმაციით, რომელიც მედიის პროფესიული მოვალეობის ხელშეშლის საქმეს იძიებს, ქინქლაძე ამ საქმეზე არ დაუკავებიათ.
ტვ “პირველის გადამღებ ჯგუფზე თავდასხმა გუშინ, ბესიკის ქუჩაზე, პირდაპირ ეთერში 22:12:22 წუთზე დაიწყო, როდესაც გადაცემაში “ნოდარ მელაძის შაბათი” მაკა ჩიხლაძის კადრი გამოჩნდა. შენიღბული თავდამსმელები ოპერატორს და ჟურნალისტს ფიზიკურად გაუსწორდენ, წაართვეს ტექნიკა – მიკროფონი და კამერა.
“ტვ პირველის” ოპერატორს, გიორგი შეწირულს თავი აქვს გატეხილი. დაზიანებები აქვს სახის არესა და სხეულის სხვადასხვა ნაწილში ჟურნალისტ მაკა ჩიხლაძეს.
8 დეკემბერს, 00:06 წუთზე, ფეისბუკზე გავრცელდა ინფორმაცია აქტივისტ სანდრო ქინქლაძის დაკავებაზე. პოსტი ამ თემაზე მისმა მეგობრმა ნათია გაბრავამ დაწერა, მოგვიანებით კი დაწერა, რომ ქინქლაძეს 173-ე მუხლს ედავებიან.
რამდენიმე საათში სხვადასხვა ფეისბუკ-ანგარიშებმა გაავრცელეს ინფორმაცია, რომ ქინქლაძე ტვ ‘პირველის” საქმეზე დააკავეს. “მითების დეტექტორი” დეტალების გასარკვევად ქინქლაძის ადვოკატს და შესაბამის უწყებებს ესაუბრა.
აქტივისტის უფლებებს ადვოკატი ლაშა ცუცქირიძე იცავს. მან ბრადლებული დილით დიღმის იზოლატორში მოინახულა. მისი თქმით, ქინქლაძე საქართველოს ადმინისტრაციულ სამართალდარღვევათა კოდექსის 173- ე მუხლით დააკავეს, რაც სამართალდავისადმი დაუმორჩილებლობას გულისხმობს. ამ დროისთვის, მუხლის გადაკვალიფიცირება არ მომხდარა.
„მუხლი 173. სამართალდამცავი ორგანოს მუშაკის ან სამხედრო მოსამსახურის და სახელმწიფო დაცვის სპეციალური სამსახურის თანამშრომლის კანონიერი განკარგულებისადმი ან მოთხოვნისადმი დაუმორჩილებლობა.
მედიის პროფესიული მოვალეობის ხელშეშლის საქმეს სპეციალური საგამოძიებო სამსახური იძიებს. უწყების პრესსამსახურის ინფორმაციით, TV Pirveli-ს გადამღებ ჯგუფზე თავდასხმის საქმესთანდაკავშირებით სანდრო ქინქლაძე არ დაუკავებიათ. უწყების ცნობით, მიმდინარეობს გამოძიება, კამერების ნაწილი უკვე ამოღებულია, ნაწილზე კი მუშაობა გრძელდება.
“მითების დეტექტორი” საქართველოს პროკურატურასაც დაუკავშირდა. უწყების მიხედვით, მათ ქინქლაძისთვის სისხლის სამართლის წესით ბრალი არ წაუყენებიათ, შესაბამისად, ამ ეტაპისთვის ოფიციალური უწყებებითაც დასტურდება ინფორმაცია, რომ აქტივისტს ბრალი ადმინისტრაციულ სამართალდარღვევის კოდექსით აქვს წაყენებული.
აქტივისტი სანდრო ქინქლაძე 8 დეკემბერს დააკავეს. მისი მეგობრის, ელენე ხუბულავას თქმით, ის მთელი დღის განმავლობაში მის სახლში იმყოფებოდა და 00:03 ზე ვარკეთილის ზემო პლატოდან აიყვანეს. აღსანიშნავია, რომ, თავდასხმის ეპიზოდიდან დაახლოებით 20 წუთში, 10:37 წუთზე ქინქლაძეს ფეისბუკ-ანგარიშზე “ტვ პირველის” გადამღებ ჯგუფზე თავდასხმის კადრები აქვს გაზიარებული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
