24 აპრილს დეზინფორმაციის სისტემატურად გამავრცელებელმა ფეისბუქ-მომხმარებელმა Fa Ntina გამოაქვეყნა ვიდეო, რომელსაც პაპის დაკრძალვას უკავშირებს. ვიდეოში ჩანს, რომ სპეციალურ ტანსაცმელში შემოსილი პირები ტაძარში შედიან. მათ ახურავთ წვეტიანი ქუდები, რომლებიც სახეს ფარავს. პოსტის ავტორი წერს: “რომის პაპის დაკრძალვაა! ამოტრიალებული ჯვრებში მამლები! სატანისტური მასკები სახეზე! ჯოჯოხეთური ხმაური! მასონების კრების მსგავსი და სადაა აქ ქრისტიანული კათოლიზმი”.
სოციალურ ქსელში გავრცელებული კადრები პაპის დაკრძალვას არ უკავშირდება. რეალურად, კადრები ესპანეთში, კარტახენაშია გადაღებული და “წმინდა კვირის”, იგივე “Semana Santa-ს” დროს მიმიდინარე მოვლენებს ასახავს. ვიდეო ასევე არ ასახავს “სატანისტურ სიმბოლოებს”. მასში ნაჩვენები პირები ქალთა ჯგუფის, Tercio del Arrepentimiento de San Pedro-ს წევრები არიან და შებრუნებულ ჯვარსა და მამლის სიმბოლოს პეტრე მოციქულს უკავშირებენ.
ფეისბუქ-მომხმარებელმა, ისევე, როგორც პლატფორმა X-ის არაერთმა ანგარიშმა (1;2) დაკრძალვის “სატანისტური რიტუალის” შესახებ ვიდეო 22-24 აპრილს გაავრცელეს, თუმცა, თავდაპირველად უნდა აღინიშნოს, რომ 22 აპრილს უკვე ცნობილი იყო თარიღი, როცა პაპ ფრანცისკეს დაკრძალვა იყო დაგეგმილი – 26 აპრილის 10:00 საათი.
გარდა იმისა, რომ კადრები პაპ ფრანცისკეს დაკრძალვას არ ასახავს, ის ასევე არ არის გადაღებული იტალიაში და პაპის გარდაცვალებას არ უკავშირდება. რეალურად, ვიდეო ესპანეთში, ქალაქ კარტახენაში აღდგომის დღესასწაულის დროს, “წმინდა კვირის” ანუ “Semana Santa-ს” პერიოდში არის გადაღებული. ღია წყაროებით მსგავსი მსვლელობების ამსახველი არაერთი ვიზუალური მასალა იძებნება (1;2), თუმცა იდენტური კადრების მოძიება “მითების დეტექტორმა” პლატფორმა Tik-Tok-ზე შეძლო. ვიდეო 17 აპრილით არის დათარიღებული და გამოქვეყნებული აქვს ანგარიშს სახელწოდებით “Semana Santa Cartagena”, რომელიც წმინდა კვირასთან დაკავშირებული მოვლენების ამსახველ ვიდეოებს აქვეყნებს. აღსანიშნავია, რომ პაპი 21 აპრილს გარდაიცვალა, ვიდეოს გამოქვეყნების თარიღი კი გამორიცხავს, რომ კადრები რაიმე სახით მის დაკრძალვას უკავშირდება.
“Semana Santa” ესპანეთში 13 აპრილიდან 20 აპრილის ჩათვლით მიმდინარეობდა. ეს არის აღდგომასთან დაკავშირებული “წმინდა კვირა”, რა დროსაც ტარდება არაერთი მსვლელობა, ხოლო თითოეულ რეგიონს ახასიათებს უნიკალური, საუკუნოვანი ტრადიციები.
გარდა ამისა, გავრცელებულ კადრებში ჩანს ტაძარი, რომელიც კარტახენაში მდებარეობს და სანტა მარია დე გრაცია ეწოდება.
ვიდეოში ასახული მსვლელობის მონაწილეები კარტახენას Arrepentimiento de San Pedro-ს წევრები არიან, რომელიც ქალებით არის დაკომპლექტებული. მათ ოფიციალურ ვებ-საიტზე აღწერილი ჩაცმულობა ასევე ემთხვევა ვიდეოში ნაჩვენები პირების ჩაცმულობას: თეთრი შალის ტუნიკა, შავი ატლასის მოსასხამი ოქროსფრად ამოქარგული ემბლემით; მაღალი შავი ატლასის ქუდი, თეთრი ძაფით შმეოსაზღვრული; ოქროსფრად ნაქარდი წითელი ხავერდის სარტყელი; შავი სანდლები; თეთრი წინდები; შავ ფერში მორთული თეთრი ხელთათმანები.
ფეისბუქისა და X-ის მომხმარებლები სიმბოლოებს – ამოტრიალებულ ჯვარსა და მამალს “სატანისტურს” უწოდებენ. შებრუნებული ჯვარი, ისევე, როგორც მამალი, წმინდა პეტრეს უკავშირდება. განმარტების მიხედვით, მამალი ქრისტიანული სიმბოლოა, რომელიც სახარებაში წმინდა პეტრეს უარყოფის ეპიზოდშია მოხსენიებული, ხოლო ამობრუნებული ჯვარი ასახავს პეტრეს თავდაყირა ჯვარცმის გზას (რადგან ის თავს არ თვლიდან ქრისტეს მსგავსად ჯვარცმის ღირსად).
სოციალურ ქსელში გავრცელებული ვიდეო ასევე გადაამოწმა ფაქტების გადამმოწმებელმა ესპანურმა ორგანიზაცია Maldita-მ.
ფოტო გარეკანზე: AP Photo/Gregorio Borgia
სტატია Facebok-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
