4 აპრილს ზესტაფონის საკრებულოს წევრმა “ქართული ოცნებიდან”, დავით მიქაბერიძემ და ფეისბუქ-ანგარიშებმა (1, 2) გამოაქვეყნეს საპროტესტო აქციაზე გადაღებული იდენტური ფოტო. მასზე ჩანს ქალი, რომელსაც უკეთია თეთრი ჩანთა წარწერით: “ცეცხლი ფუჩურს.”
საპროტესტო აქციაზე გადაღებული მორიგი ფოტოფაბრიკაცია ვრცელდება. რეალურად, ფოტოს ავტორი ონლაინგამოცემა “ნეტგაზეთია” და აქციის მონაწილეს ჩანთაზე ფრაზა “ცეცხლი ოლიგარქიას” აწერია.
27 მარტს თბილისში მორიგი საპროტესტო აქცია გაიმართა და დემონსტრანტებმა რუსთაველის გამზირი გადაკეტეს. სოციალურ ქსელში გავრცელებული ფოტო სწორედ ამ დღეს რუსთაველის გამზირზეა გადაღებული და ონლაინმედია “ნეტგაზეთს” ეკუთვნის. მედიის ლოგო გავრცელებულ ფოტოფაბრიკაციაზეც ჩანს.
27 მარტის საღამოს ონლაინგამოცემა “ნეტგაზეთმა” საქართველოს პარლამენტის წინ გადაღებული ფოტოები გამოაქვეყნა. მათ შორისაა ფოტო, რომლის რედაქტირებული ვერსიაც რამდენიმე დღის შემდგომ ფეისბუქზე გავრცელდა. ავთენტიკურ ფოტოზე ქალს თეთრი ჩანთა უკეთია, რომელზეც წერია ფრაზა “ცეცხლი ოლიგარქიას”. ფრაზას ხშირად სკანდირებენ პროტესტის მონაწილეებიც.
ამდენად, სოციალურ ქსელში გავრცელებული ფოტო, რომელზეც ქალს ჩანთაზე აწერია “ცეცხლი ფუჩურს”, რედაქტირებულია. ამგვარ გზებს ხშირად მიმართავენ პროტესტის მონაწილეებისა და აქტივისტების დისკრედიტაციის მიზნით. სოციალურ ქსელებში არაერთხელ გავრცელებულა ისეთი ფოტოფაბრიკაციებიც, სადაც დემონსტრანტებს ბანერები შეცვლილი წარწერით უჭირავთ, მათ “მითების დეტექტორი” სისტემატურად ამოწმებს.
წყაროს შესახებ:
დავით ჯებაშვილი სოციალურ ქსელში ორი ანგარიშით (1, 2) ავრცელებს დეზინფორმაციულ ცნობებს. “მითების დეტექტორს” მის მიერ მიმდინარე პროტესტისა თუ აქტივისტების დისკრედიტაციის მიზნით გამოქვეყნებული არაერთი პოსტი გადაუმოწმებია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
