16-18 აგვისტოს ფეისბუქზე დეზინფორმაციის სისტემატურად გამავრცელებელმა “Георгий Кушиташвили” და სხვა რუსულენოვანმა მომხმარებლებმა გაავრცელეს ფოტო, რომელიც, აღწერის მიხედვით, ლონდონშია გადაღებული და შესაბამისად ასახავს, როგორ უხრიან თავს ბრიტანელი პოლიციელები მუსლიმური თემის წარმომადგენლებს. პოსტების თანახმად, ეს მოვლენა ბრიტანეთის მიერ წარმოებული მიგრაციული პოლიტიკის შედეგია.
ბრიტანელი პოლიციელების ფოტო ხელოვნური ინტელექტით არის შექმნილი. სურათზე აღინიშნება არაერთი ისეთი დეფექტი, რაც ხელოვნური ინტელექტით შექმნილ მასალას ახასიათებს.
ბრიტანულ მედიაში და სხვა სანდო წყაროებში არ გავრცელებულა იმის დამადასტურებელი ინფორმაცია ან ფოტო/ვიდეო მასალა, რაც დაადასტურებდა, რომ ფოტოში ასახული მოვლენა რეალურად მოხდა.
გავრცელებულ ფოტოზე დაკვირვებისას იმჩნევა რამდენიმე დეტალი, რომელიც არაბუნებრივად ჩანს და ხელოვნური ინტელექტის ნიშნებს შეიცავს. ერთ-ერთი დაჩოქილ პოლიციელს ცალ ფეხზე 2 ტერფი აქვს და ზოგადად მისი მარცხენა ფეხი არაბუნებრივი ფორმისაა. ამასთანავე, უკიდურეს მარჯვენა კუთხეში მდგომ კაცს, არაბუნებრივად დიდი და უცნაური ფორმის ცერა თითი აქვს. მეორე კაცის სახე კი მის თავზე არასიმეტრიულად არის ჩასმული.
გავრცელებული ფოტო ფაქტების გადამმოწმებელმა ორგანიზაციებმა Logically Facts და DFRAC-მა გადაამოწმეს, რომლებმაც ფოტოზე დაკვირვებისას ხელოვნური ინტელექტისათვის დამახასიათებელი არაერთი დეფექტი აღმოაჩინეს. დამატებით, მათ ფოტოს შესამოწმებლად გამოიყენეს ხელოვნური ინტელექტის აღმოსაჩენი ხელსაწყოები და ყველა მათგანმა დაადასტურა, რომ დიდი ალბათობით სურათის შესაქმნელად სწორედ ხელოვნური ინტელექტი არის გამოყენებული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
