14 აგვისტოს ფეისბუქ მომხმარებელმა Natia Colussi გამოაქვეყნა პოსტი, რომელშიც 2014-დან 2020 წლამდე საქართველოში გარდაცვალების სტატისტიკაა მოყვანილი. ქოლუსი “ადამიანის სიკვდილით გრძნობებზე მოთამაშეებისათვის” წერს, რომ მთლიანობაში 2020 წელს 234-ით ნაკლები ადამიანი გარდაიცვალა, ვიდრე 2016 წელს. მას ასევე ხაზი აქვს გასმული სისხლის მიმოქცევის სისტემის ავადმყოფობის შედეგად და სიმსივნეების შედეგად გარდაცვლილთა რაოდენობაზე.
მსგავსი შინაარსის პოსტი ფეისბუქ მომხმარებელმა დათო წურწუმიამაც გამოაქვეყნა, რომელშიც ისიც ამტკიცებს, რომ საქსტატის სტატისტიკის თანახმად, კოვიდს არსებულ ვითარებაზე დიდი გავლენა არ მოუხდენია. 2019 წლის სტატისტიკური მონაცემები გამოაქვეყნა ფეისბუქ მომხმარებელმა კობა კუპრაშვილმაც, რომელშიც 2019 წელს სასუნთქი სისტემის ავადმყოფობების შედეგად გარდაცვლილთა რიცხვი წითლად არის შემოხაზული და დასმულია კითხვა, რომ 2020 წლის მონაცემებიც საინტერესო იქნებოდა.
ნათია ქოლუსის, დათო წურწუმიას და კობა კუპრაშვილის პოსტები მანიპულაციურია, რადგან სტატისტიკაზე დაკვირვება აჩვენებს, რომ 2016 წლის შემდეგ საქართველოში სიკვდილიანობის მაჩვენებლის კლება აღინიშნებოდა და ეს ტენდენცია მხოლოდ კორონავირუსის გავრცელების შემდეგ შეიცვალა ზრდით და იმავე მაჩვენებელს დაუბრუნდა, რაც 2016 წელს გვქონდა.
2014-2020 წლებში გარდაცვალების სტატისტიკა ნათია ქოლუსის საქართველოს სტატისტიკის ეროვნულ სამსახურზე დაყრდნობით მოჰყავს. საქსტატის მონაცემებიდან ჩანს, რომ 2016 წლის შემდეგ საქართველოში სიკვდილიანობის მაჩვენებელი 3 წლის განმავლობაში მცირდებოდა და მან მატება 2020 წელს, კორონავირუსის პანდემიის დაწყების შემდეგ დაიწყო.
წყარო: საქსტატი
ამ ტენდენციას 2019 და 2020 წლებს შორის თვეების მიხედვით სიკვდილიანობის შედარება აჩვენებს. საქსტატის მონაცემების მიხედვით, 2020 წელს, 2019 წელთან შედარებით გარდაცვალების მაჩვენებელი განსაკუთრებით ნოემბრისა და დეკემბრის თვეებში გაიზარდა, რაც კორელაციაშია ამ თვეებში კორონავირუსით გარდაცვალების მაჩვენებელთან. 2020 წლის 31 ოქტომბრის მონაცემებით, კორონავირუსით 307 ადამიანი იყო გარდაცვლილი. 30 ნოემბრისთვის ეს რიცხვი 1 267-მდე გაიზარდა, 31 დეკემბერს კი 2 505-ს მიაღწია.
წყარო: საქსტატი
მსგავსი ტენდენცია მხოლოდ საქართველოში არ ფიქსირდება. ევროკავშირის წევრი 27 ქვეყნის სიკვდილიანობის მონიტორინგის პროექტის (EuroMOMO) მიერ გამოქვეყნებული მონაცემების მიხედვით, 2019 წელთან შედარებით, 2020-2021 წელს ევროპის ქვეყნებში გარდაცვლილთა რაოდენობის მკვეთრი მატება შეინიშნება.
წყარო:EuroMOMO
ნათია ქოლუსი პოსტში ხაზს უსვამს 2020 წელს სიმსივნით და სისხლის მიმოქცევის სისტემის ავადმყოფობის შედეგად გარდაცვლილთა რაოდენობას. თუმცა საგულისხმოა, რომ გასულ წლებთან შედარებით ამ მიზეზით სიკვდილიანობა 2020 წელს მკვეთრად არ გაზრდილა და ამ წლებს შორის სიკვდილიანობის საერთო მაჩვენებელში არსებულ განსხვავებას ვერ ახსნის.
წყარო: საქსტატი
რაც შეეხება კობა კუპრაშვილის მიერ მოყვანილ მონაცემებს სასუნთქი სისტემის ავადმყოფობების შედეგად გარდაცვლილთა შესახებ, 2020 წელს ეს მაჩვენებელი 4 017-მდეა გაზრდილი, თუმცა სტატისტიკაში ცალკეა გამოყოფილი კორონავირუსით გარდაცვლილთა რიცხვი. 2020 წლის საბოლოო სტატისტიკური მონაცემებით ლაბორატორიულად დადასტურებული Covid-19-ის შედეგად 2 587 ადამიანი გარდაიცვალა.
აღსანიშნავია ისიც, რომ 2016 წლის შემდეგ შემცირდა სხვადასხვა მიზეზით გამოწვეული სიკვდილიანობის მაჩვენებლებიც, როგორებიცაა შარდ-სასქესო სისტემის ავადმყოფობები, სისხლის და სისხლმბადი ორგანოების ავადმყოფობები და ა.შ.
წყარო: საქსტატი
იმის სადემონსტრაციოდ, თითქოს პანდემია არ არსებობს, საქართველოს სტატისტიკის ეროვნული სამსახურის მონაცემები მანიპულაციურად წარსულშიც გამოუქვეყნებიათ. ვრცლად იხილეთ:
კორონავირუსთან და სხვა თემებთან დაკავშირებით მცდარი და მანიპულაციური ინფორმაცია თავად ნათია ქოლუსის წარსულშიც არაერთხელ გაუვრცელებია:
- ცენზურა თუ კოვიდ-დეზინფორმაცია? რის გამო შეზღუდა YouTube-მა ავსტრალიური “სქაი ნიუსი”?
- ვინ არის ნათია ქოლუსი და რა კავშირი აქვს მას Cancel Cancel Mafia საქართველოსთან?
- რას გულისხმობს სიტყვა ინკლუზიური და რას ითხოვს PHR?
- Natia Colussi Vision 2050-ის და პარიზის შეთანხმების შესახებ შეთქმულების თეორიას ავრცელებს
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
