საზოგადოებრივი მოძრაობა “ერთიანი ნეიტრალური საქართველო” 2024 წლის 10 ივლისს დაფუძნდა, თუმცა მეწარმეთა და არასამეწარმეო იურიდიულ პირთა რეესტრში რეგისტრაციის შესახებ ინფორმაცია არ იძებნება.
როგორც დამფუძნებლების წერილშია მითითებული, მოძრაობის შექმნის მიზანი არის ქართველი ხალხისთვის შესაძლებლობის მიცემა, რომ უკეთ აღიქვას სინამდვილე, რომელიც ქვეყნის საგარეო-პოლიტიკურ პრიორიტეტებთან არის დაკავშირებული. წერილშივე ვკითხულობთ, რომ “ერთიანი ნეიტრალური საქართველო” დაახლოებით ერთი წლის თავზე პოლიტიკურ პარტიად გარდაიქმნება.
საზოგადოებრივი მოძრაობის დამფუძნებელი ჯგუფის წევრები არიან: ვატო შაქარიშვილი, ბიძინა გიორგობიანი, ნანა კაკაბაძე, გელა ნიკოლაიშვილი და ლევან ნიკოლეიშვილი.
ვატო შაქარიშვილი სამოქალაქო მოძრაობა „საქართველო უპირველეს ყოვლისა“ დამფძნებელი და ამავე სახელწოდების კონსერვატიული ონლაინ გამოცემის დირექტორია.
გარემოს დაცვის ყოფილი მინისტრი, ბიძინა გიორგობიანი თავს წინა ხელისუფლების პოლიტპატიმრად მიიჩნევს. მან ქვეყანა 2005 წელს დატოვა, 2007 წელს კი სამსახურებრივი უფლებამოსილების ბოროტად გამოყენების ბრალდებით 6-წლიანი პატიმრობა დაუსწრებლად შეეფარდა. ის სახელისუფლებო პროპაგანდისტულ არხებზე ხშირად ჩნდება, ისევე როგორც მოძრაობის კიდევ ერთი წევრი, ხელისუფლებო ექსპერტი ნანა კაკაბაძე, რომელიც ორგანიზაცია “ყოფილი პოლიტპატიმრები – ადამიანის უფლებებისთვის” თავმჯდომარეა.
