ალტ-ინფო/კონსერვატიული მოძრაობის დამფუძნებლები ტელეარხ “ალტ-ინფოს” ყოფილი წამყვანები და მფლობელი არიან. მედია პროექტის პოლიტიკურ პლატფორმად ტრანსფორმაცია 2021 წელს 5 ივლისის თბილისი პრაიდის ძალადობრივი დარბევის შემდგომ მოხდა, რა დროსაც 53 ჟურნალისტს ფიზიკურად გაუსწორდნენ. ექსტრემისტულ ქმედებებში და ძალადობის ორგანიზებაში კი “ალტ-ინფოს” დამფუძნებლები და წამყვანები უშუალოდ იყვნენ ჩართულნი, თუმცა ორგანიზატორთა სამართლებრივი პასუხისმგებლობა დღის წესრიგში არ დამდგარა, რაც როგორც ადგილობრივი, ასევე საერთაშორისო ორგანიზაციების კრიტიკის საგანი გახდა. პარტია, რომელსაც მჭიდრო კავშირები აქვს ევრაზიანისტული მოძრაობის დამფუძნებელ ალექსანდრე დუგინთან, საგარეო კურსის რადიკალური ცვლილების, რუსეთთან სამხედრო მეკავშირეობის და ლიბერალიზმის ქრისტიანულ-კონსერვატიული იდეოლოგიით ჩანაცვლების ინიციატივით გამოდიოდა და ეკლესიასთან ერთად ქვეყნის მართვის თეოკრატიულ მოდელზეც კი საუბრობდა. 2022 წელს რუსეთის სახელისუფლებო წრეებთან პარტიის კავშირები უფრო მკაფიოდ გამოიკვეთა:
- 2022 წლის ოქტომბერში კონსერვატიული მოძრაობის ლიდერები მოსკოვში ევრაზიულ ბიზნესფორუმში მონაწილეობდნენ;
- ფორუმის ფარგლებში კონსერვატიული მოძრაობის ლიდერები რუსეთის ევრაზიული კავშირის მინისტრ სერგეი გლაზიევს და ფედერაციის საბჭოს სენატორს იგორ მოროზოვს შეხვდნენ“.
- 2022 წლის იანვარში “კომუნისტური პარტიების კავშირის” (Союз коммунистических партий – КПСС – КПРФ) ორგანიზებით გამართული მრგვალ მაგიდაში, თემაზე „რუსეთსა და საქართველოს შორის ურთიერთობების პოზიტიური განვითარების შესაძლებლობები“ სხვა ორგანიზაციებთან ერთად საქართველოდან “კონსერვატიული მოძრაობაც” მონაწილეობდა. ღონისძიებაში რუსეთის მხრიდან, დუმის დეპუტატები კაზბეკ ტაისაევი და არტემ ტუროვი მონაწილეობდნენ; საქართველოდან კი – კონსერვატიული მოძრაობის გარდა, პარტია „ევროპელი სოციალისტების“, „სოლიდარობა მშვიდობისთვის“, “ერი მედიას”, “უფლებადამცველთა გაერთიანების” წარმომადგენლები.
სურათზე: ალტ-ინფო/კონსერვატიული მოძრაობის ვიზიტი მოსკოვში 2022 წლის ოქტომბერი
