22 აპრილს ფეისბუქ-ანგარიშმა შიინ ევროპისკენ ვიდეო გამოაქვეყნა, რომელშიც მამაკაცი, რომელსაც მაღალქუსლიანი ფეხსაცმელი და ბრჭყვიალა კოსტიუმი აცვია, უკრაინის დროშით ცეკვავს. ვიდეოზე გაკეთებულია შემდეგი წარწერა: “გეი პრაიდები უკრაინაში”.
გავრცელებული პოსტი ვიდეომანიპულაციას შეიცავს. ვიდეო, რომელშიც მამაკაცი უკრაინის დროშით ცეკვავს, არა უკრაინაში ჩატარებულ “გეი პრაიდს”, არამედ ესპანეთის ქალაქ სანტიაგო დე ლა რიბერას 2022 წლის კარნავალს ასახავს.
ფეისბუქზე გავრცელებული ვიდეო საკმაოდ დაბალი ხარისხისაა, თუმცა სხვა სოციალურ ქსელებში გამოქვეყნებულ იგივე ვიდეოში ქუჩაში მწვანე ფერის ბანერის ამოცნობა შევძელით. ამ ბანერის დახმარებით კი სოციალურ ქსელში დამატებითი ძიებით მივაკვლიეთ, რომ ვიდეო არა უკრაინაში, არამედ ესპანეთის ქალაქ სანტიაგო დე ლა რიბერაშია გადაღებული.
Google Street View-ში ეს ადგილი ასე გამოიყურება:
ვიდეო ესპანეთში, მურსიას პროვინციაში, ქალაქ სანტიაგო დე რიბერაში 2022 წლის მაისში ჩატარებულ კარნავალზეა გადაღებული. მოცეკვავე, რომელიც ვიდეოში ჩანს, კარნავალის ფეისბუქ და ინსტაგრამ-გვერდებზე გამოქვეყნებულ ფოტოებსა და ვიდეოებშიც არაერთხელ გვხვდება.
წყაროს შესახებ
ფეისბუქ ანგარიში შიინ ევროპისკენ ამავე სახელწოდების სხვა რამდენიმე ფეისბუქ ანგარიშთან (1, 2, 3) ერთად ჰომოფობიური და ანტიდასავლური შინაარსის ინფორმაციას, მათ შორის, დეზინფორმაციული ხასიათის მტკიცებებსა და გაყალბებულ ფოტო-ვიდეო მასალას კოორდინირებულად ავრცელებს. გვერდი არასამთავრობო ორგანიზაციების წამოწყებული სამოქალაქო კამპანიის “შინ ევროპისკენ” საპირწონედ შეიქმნა, რომელიც საქართველოს ევროკავშირში ინტეგრაციის მხარდაჭერას ისახავს მიზნად.
ფეისბუქ-ანგარიშების მიერ გავრცელებულ დეზინფორმაციებზე “მითების დეტექტორის” მიერ მომზადებული მასალები ვრცლად იხილეთ:
- “შიინ ევროპისკენ” გია ნოდიას შესახებ ყალბ ფოტოს ავრცელებს
- თქვა თუ არა ზვიად გამსახურდიამ, რომ აშშ საქართველოს არასამთავრობო სექტორის დახმარებით დაიმორჩილებს?
- ვიდეომანიპულაცია, თითქოს დიდი ბრიტანეთის სკოლებში მოსწავლეებთან შიშველი მამაკაცები შეჰყავთ
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
