8 ოქტომბერს ტელეკომპანია POSTV – ის გადაცემაში ლიბერალიზამის ანატომია წამყვანმა გიორგი ახვლედიანმა თქვა, რომ პოლონეთის მთავრობის ახლადდანიშნულმა განათლების მინისტრმა ბარბარა ნოვაცკამ პოლონელებს გამოუცხადა, რომ მისთვის კატეგორიულად მიუღებელია რელიგიის გაკვეთილები სკოლაში და ამიტომ, მათი რაოდენობა უნდა შემცირდესო. ახვლედიანის თქმით, ნოვაცკას არც დაუმალავს, რომ რელიგიის გაკვეთილების ჩანაცვლებას, სექსუალური განათლების გაკვეთილებით აპირებს. ახვლედიანის თანახმად, ამ გაკვეთილების გაცდენის შემთხვევაში შესაძლოა მშობლებს პატიმრობა დაემუქროთ.
POSTV-ის გავრცელებული ინფორმაცია ნაწილობრივ მცდარია. პოლონეთში რელიგიის გაკვეთილები ნამდვილად შემცირდა, თუმცა არა სექსუალური განათლების გაკვეთილების ხარჯზე. სექსუალური განათლება საგნის – ჯანდაცვის განათლების ნაწილია და ის საგანს ოჯახური ცხოვრება ჩაანაცვლებს. პოლონეთში სასკოლო განათლება სავალდებულოა და სკოლის 50 % – ის გაცდენის შემთხვევაში, თუ მოცემულობა არ გაუმჯობესდა მშობლებს შესაძლოა ჯარიმა დაეკისროთ. სიტუაციის გამწვავების შემთხვევაში, საქმეს სასამართლო განიხილავს. არც კონსტიტუციაში და არც კანონში განათლების შესახებ არსად არის აღნიშნული, რომ მშობელი შესაძლოა ციხეში მოხვდეს, თუ მოსწავლე უშუალოდ სექსუალური განათლების გაკვეთილებს გააცდენს.
-
ახალი საგანი პოლონეთის სკოლებში – ჯანდაცვის განათლება
პოლონეთის განათლების მინისტრმა ბარბარა ნოვაცკამ 2024 წლის აპრილში პრესკონფერენციაზე ახალი საგნის – ჯანდაცვის განათლების შემოღება დააანონსა. აღნიშნული საგანი ჩაანაცვლებს საგანს – ოჯახური ცხოვრების განათლება და სკოლებში 2025 წლის 1 სექტემბრიდან დაინერგება.
საგანი სექსუალური განათლების გარდა სხვა თემებსაც მოიცავს, მათ შორის, ფიზიკური აქტივობა, ჯანსაღი კვება, ვაქცინაცია და ა.შ.
-
პოლონეთის სკოლებში რელიგიის გაკვეთილები შემცირდა
2024 წლის 19 ივნისს განათლების მინისტრმა ასევე განაცხადა,რომ სკოლებში რელიგიის გაკვეთილები შემცირდება და სკოლის მოსწავლეებს სექტემბრის ახალი სასწავლო წლიდან კვირაში მხოლოდ ერთ საათი ჩაუტარდებათ. ამჟამად პოლონურ კატეხიზმოში კვირაში ორი საათი ტარდება. სურვილის შემთხვევაში, ბავშვებს შეუძლიათ უარი თქვან და/ან დაესწრონ ეთიკის გაკვეთილებს სანაცვლოდ. რელიგიის გაკვეთილების განახევრება ძალაში 2025 წლის 1 სექტემბრიდან შედის.
აღსანიშნავია, რომ ორგანიზაციის CBOS -ის საზოგადოებრივის აზრის კვლევის თანახმად, გამოკითხულთა 58 % მხარს უჭერს სკოლაში რელიგიის გაკვეთილების განახევრებას. 51 %-ს მიაჩნია, რომ საჯარო სკოლებში რელიგიის გაკვეთილი უნდა შედიოდეს. 69 % ფიქრობს, რომ ამ საგანში მიღებული ქულა არ უნდა შედიოდეს სასწავლო წლის საერთო შეფასებაში.
-
რა სანქცია ეკისრება მშობელს თუ ბავშვი სკოლაში არ ივლის?
პოლონეთის კონსტიტუციის მიხედვით, სასკოლო განათლება პოლონეთში სავალდებულოა და ცნება “სავალდებულო” შეტანილია 1997 წლის 2 აპრილიდან. კონსტიტუციის 70-ე მუხლის 1-ლ პუნქტში ნათქვამია, რომ “ყველას აქვს განათლების უფლება. სწავლა სავალდებულოა 18 წლამდე”.
სავალდებულო სასკოლო სწავლების შესრულების დეტალური წესი რეგულირდება 2016 წლის 14 დეკემბრის კანონით განათლების შესახებ (შემდგომში განათლების კანონი).
-
მშობლების/მეურვეების მოვალეობები
ბავშვების სასკოლო ვალდებულება დაკავშირებულია მშობლის ვალდებულებებთან,
რომლებიც გამომდინარეობს განათლების შესახებ კანონის მე-40 მუხლით. კანონში შედის ბავშვის სკოლაში დარეგისტრირება, გაკვეთილებზე რეგულარულად დასწრების და სასწავლო პირობების უზრუნველყოფა.
სასკოლო ვალდებულების შესრულებად ითვლება მოცემულობა, როდესაც ბავშვი სწავლის 50%-ს მაინც ასრულებს ერთ თვეში. დაუსაბუთებელი გაცდენის შემთხვევაში, თუ მშობლებთან მოლაპარაკებამაც შედეგი არ გამოიღო, სკოლის დირექტორი უგზავნის მშობლებს გაფრთხილებას და შემდეგ, თუ მოცემულობა ისევ არ შეიცვალა, იგზავნება განცხადი ადმინისტრაციული აღსრულების დაწყების შესახებ აღმასრულებელ ორგანოში. სააღსრულებო წარმოების შესახებ კანონის 121-ე მუხლის მიხედვით, მშობელს ვალდებულების შეუსრულებლობის შემთხვევაში შესაძლოა დაეკისროს ჯარიმა 10 000 პოლონურ ზლოტამდე.
თუ არასრულწლოვნის მშობლები ან მეურვეები არ შეასრულებენ თავიანთ ვალდებულებებს, საქმე ეცნობება სასამართლოს, რომელიც განიხილავს საქმეს ოჯახისა და მეურვეობის კოდექსის ან არასრულწლოვანთა მხარდაჭერისა და რესოციალიზაციის შესახებ კანონის დებულებების შესაბამისად.
არც კანონში განათლების შესახებ და არც პოლონეთის კონსტიტუციაში არსად არის აღნიშნული, რომ თუ მოსწავლე სექსუალური განათლების გაკვეთილებს არ დასწრება, კონკრეტულად ამისთვის შესაძლოა მშობელი ციხეში ჩასვან.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
