17-19 იანვარს დეზინფორმაციის ხშირად გამავრცელებელმა ანგარიშებმა ფანტინა ფანტინა და ირაკლი ზაქარეიშვილი სათადარიგო ფბ პარტიის “საქართველოსთვის” ლიდერის, გიორგი გახარიას ტირილის ამსახველი ფოტოკოლაჟი გაავრცელეს.
იდენტური ფოტოკოლაჟი 18 იანვარს ბლოგერ დავით ნემსაძის ფეისბუკ გვერდზე David Nemsadze officiall გამოქვეყნდა. დავით ნემსაძის პოსტში ვკითხულობთ: “ეს *უანა მტირალა კაიფში მყოფი ტიპი იყო საქართველოს შსს მინისტრი და პრემიერ მინისტრი”.
გიორგი გახარიას ფოტოები პროგრამულად არის დამუშავებული. ფოტოს ორიგინალ ვერსიაზე პოლიტიკოსის სახეზე თავდასხმის შედეგად დატოვეული კვალი და მის პერანგზე სისხლის ლაქები არის ასახული.
15 იანვარს ბათუმში, სასტუმრო „შერატონში“ პარტიის „საქართველოსთვის“ დამფუძნებელს თავს დაესხნენ. ის თავდასხმის შემდეგ კლინიკაში გადაიყვანეს, სადაც ცხვირის ძვლის მოტეხილობა და ტვინის შერყევა დაუდგინდა. 15 იანვარსვე გერმანიის ბუნდესტაგის საგარეო საქმეთა კომიტეტის თავმჯდომარემ, მიხაილ როთმა სოციალურ ქსელში გიორგი გახარიას ფოტო გამოაქვეყნა და მასზე განხორციელებული თავდასხმა დაგმო. ფოტოზე პოლიტიკოსის სახეზე თავდასხმის შედეგად დატოვეული კვალი და მის პერანგზე სისხლის ლაქები არის ასახული. სოციალურ ქსელებსა თუ მედიაში გავრცელებული არც ერთ ფოტოსა და ვიდეოში არ გვხვდება კადრები, რომელშიც ის ტირის. პარტიის წევრების თანახმად, გახარიაზე თავდასხმა ივანიშვილის რეჟიმის მიერ იყო ორკესტრირებული. 15 იანვარს ტელეკომპანია “იმედმა” დიმიტრი სამხარაძესა და გიორგი გახარიას შორის დაპირისპირების ამსახველი ვიდეოს ფრაგმენტი გაავრცელა.

აღსანიშნავია, რომ სოციალურ ქსელში გავრცელებულ ფოტოებზე დამუშავებულია და წაშლილია როგორც თავდასხმის შედეგად სახეზე დარჩენილი კვალი, ასევე ორ შემთხვევაში, წაშლილია პოლიტიკოსის პერანგზე არსებული სისხლის ლაქებიც.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.