23 მარტს ფეისბუქ ანგარიშმა “მრისხანე ბაბუაწვერა” უფლებადამცველ ბაია პატარაიას სახელით პოსტის სქრინშოტი გამოაქვეყნა. გავრცელებული პოსტში პატარაია საქართველოს ნაკრების ფეხბურთელებს სომხეთის საფეხბურთო ნაკრებისთვის გატანილი გოლების გამო “არმენოფობ ღორებს” უწოდებს. იდენტური პოსტი სოციალურ ქსელში სხვა ანგარიშებმაც გამოაქვეყნეს (1, 2, 3).
ბაია პატარაიას სახელით გაყალბებული პოსტი ვრცელდება. რეალურად, ბაია პატარაიას მსგავსი შინაარსის განცხადება არ გამოუქვეყნებია.
პოსტი, რომელსაც “მრისხანე ბაბუაწვერა” ბაია პატარაიას სახელით ავრცელებს, გაყალბებულია. რეალურად, უფლებადამცველს მსგავსი შინაარსის პოსტი არ გამოუქვეყნებია, ხოლო აღნიშნული ანგარიში თავის სხვა ანგარიშებთან ერთად, პოლიტიკოსებისა და აქტივისტების გაყალბებულ განცხადებებს ხშირად ავრცელებს.
გაყალბებულ სქრინშოტს ბაია პატარაია ფეისბუკის პირად გვერდზეც გამოეხმაურა. პოსტში უფლებადამცველი აღნიშნავს, რომ აღნიშნული ანგარიში 5 წელია, რაც მისი სახელით სხვადასხვა დეზინფორმაციას ავრცელებს, თუმცა კიბერძალადობის ამ ფორმაზე შინაგან საქმეთა სამინისტროს რეაგირება არ აქვს.
ბაია პატარაიას სახელით ყალბი განცხადებები ხშირად ვრცელდება და მათი ავტორი ძირითადად “მრისხანე ბაბუაწვერაა”. იხილეთ რამდენიმე მაგალითი:
- ბაია პატარაიას სახელით Საქართველო-ჩეხეთის მატჩზე გაყალბებული პოსტი ვრცელდება
- სწრაფად გამრავლებაზე უფლებადამცველ ბაია პატარაიას სახელით ყალბი ციტატა ვრცელდება
- ბაია პატარაიას სახელით მორიგი გაყალბებული პოსტი ვრცელდება
წყაროს შესახებ
ფეისბუკ მომხმარებელი “მრისხანე ბაბუაწვერა” საკუთარ თავს თედო აბაშიძეს უწოდებს და ამ და სხვა სახელებით არაერთი ანაგარიში აქვს (1,2,3). სავარაუდოდ, მასთან არის დაკავშირებული ანგარიშიც – მამა შალვა კეკელია. “მრისხანე ბაბუაწვერას” მიერ გავრცელებული ყალბი ციტატები, მათ შორის “თეა აბაშიძისა” და “ნანა ბიწაძის” სახელის მქონე ანგარიშებით, “მითების დეტექტორს” არაერთხელ აქვს გადამოწმებული.
გაყალბებულ პოსტს კიდევ ერთი ფეისბუქ მომხმარებელი, Dato Faika Nacvlishvili ავრცელებდა, რომელიც კონსერვატიული მოძრაობის მხარდამჭერი და ჯგუფის “ქვეყნის მტრების არქივის” ერთ-ერთი ადმინისტრატორია. მის მიერ გავრცელებული ყალბი ინფორმაცია “მითების დეტექტორს” წარსულშიც გადაუმოწმებია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
