5 მაისიდან ქართული (1,2,3,4,5,6) და რუსულენოვანი (1,2) ფეისბუქ ანგარიშები რამდენიმე ფოტოს ავრცელებდნენ, რომლებზეც ბავშვების ჯგუფი და რქიანი არსებები ჩანს, ისინი ბავშვებს წიგნს უკითხავენ. ფოტოების ნაწილში ბავშვებს რქები ადგათ, ერთ-ერთ ფოტოში მათ შავი ტანისამოსი აცვიათ და წრეზე სხედან, შუაგულში კი ვარსკვლავის მსგავსი ფიგურაა ჩახატული, რაც ქმნის შთაბეჭდილებას, რომ ბავშვები რიტუალს ატარებენ. ზოგიერთ პოსტზე თანდართული აღწერის მიხედვით, ფოტოებზე აშშ-ის შტატ პენსილვანიაში სკოლის შემდეგ ბავშვთა კლუბის შეხვედრაა ასახული, პოსტების ნაწილი კი ფოტოების გადაღების ადგილს არ ასახელებს.
ფეისბუქზე გავრცელებული ფოტოები ხელოვნური ინტელექტის მიერაა გენერირებული და პენსილვანიაში სკოლის კლუბის შეხვედრას არ ასახავს.
-
გავრცელებული ფოტოები ხელოვნური ინტელექტის მიერაა გენერირებული
ფეისბუქზე გავრცელებული ფოტოები ანგარიშ The Pumpkin Empress-ს ეკუთვნის, რომელმაც ფოტოები საკუთარ ფეისბუქის გვერდზე 2 მაისს გაავრცელა აღწერით “არ დაგავიწყდეთ მხარი დაუჭიროთ თქვენს ლოკალურ BBC-ს (ბაფომეტის წიგნის კლუბს). გაზარდეთ თქვენი სატანისტები სწორად!”.
შემდგომში ავტორმა ფოტოები საკუთარი ტიკტოკისა და ინსტაგრამის გვერდებზეც გამოაქვეყნა. პოსტების კომენტარებში ავტორმა არაერთხელ დაადასტურა, რომ ფოტოები ხელოვნური ინტელექტის გამოყენებითაა გენერირებული.
6 მაისს ავტორმა ფეისბუქ პოსტი ჩაასწორა და აღწერას განმარტება დაამატა, სადაც კიდევ ერთხელ დაადასტურა, რომ ფოტოები ნამდვილ მოვლენას არ ასახავს.
აღსანიშნავია, რომ ფოტოებზე AI-ს მიერ გენერირებული სხვა ფოტოების მსგავსი დეტალები შეგვიძლია შევამჩნიოთ, როგორებიცაა დამახინჯებული ან ერთმანეთში შეზრდილი სხეულის ნაწილები (ხშირ შემთხვევაში ხელის თითები).
9 მაისს The Pumpkin Empress-მა კიდევ ერთი პოსტი გამოაქვეყნა, რომლის მიხედვითაც, მას ფოტოების შესახებ ინფორმაციისთვის რამდენიმე მედიასაშუალება დაუკავშირდა. ამავე პოსტში ავტორმა აღწერა, როგორ შექმნა ერთ-ერთი ფოტო პროგრამა Midjourney-ს დახმარებით.
აღსანიშნავია, რომ Midjourney-ის მეშვეობით ნებისმიერი ადამიანის რეალისტური ფოტოს შექმნაა შესაძლებელი, თუმცა ხელსაწყოს ფოტოების შექმნისას გარკვეული ხარვეზი აქვს. მაგალითად, ხელების გენერირება საკმაოდ რთულია და გამოცემა Forbes წერს, რომ ერთ-ერთი ყველაზე მარტივი გზა იმის დასადგენად, არის თუ არა ფოტოსურათი ხელოვნური ინტელექტის მიერ გენერირებული, სწორედ ხელების დათვალიერებაა.
ხელოვნური ინტელექტის მიერ გენერირებული ფოტოები, როგორც ნამდვილი მოვლენის ამსახველი კადრები წარსულშიც გავრცელებულა. ვრცლად, იხილეთ “მითების დეტექტორის” მასალებში:
- სოციალურ ქსელში ჯო ბაიდენის ხელოვნური ინტელექტის მიერ გენერირებული ფოტო ვრცელდება
- ფეისბუქზე დონალდ ტრამპის ხელოვნური ინტელექტის მიერ გენერირებული ფოტოები ვრცელდება
- მართლმადიდებლური ტაძარი უცხოეთში თუ ხელოვნური ინტელექტის მიერ გენერირებული ფოტო?
წყაროების შესახებ:
ფოტოებს მცდარი აღწერით ის ფეისბუქ მომხმარებლები ავრცელებდნენ, რომლებსაც ანტიდასავლური შინაარსის ყალბი ინფორმაცია წარსულშიც გამოუქვეყნებიათ. “მითების დეტექტორს” ანგარიშების სიდონია ბელლ, მაია დვალიძე და შიინ ევროპისკენ მიერ გავრცელებული მცდარი ინფორმაცია არაერთხელ გადაუმოწმებია.
რაც შეეხება რუსულენოვან ანგარიშს Вячик Гус, ის ანტიდასავლური შინაარსის მცდარ ინფორმაციასა და შეთქმულების თეორიებს ხშირად ავრცელებს.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
