12 თებერვალს რუსულენოვანმა ფეისბუქ-ანგარიშებმა (1;2;3;4;5) და რუსული სამთავრობო მედიის Украина.ру-ის ტელეგრამ-არხმა გაავრცელეს იტალიაში მიმდინარე ზამთრის ოლიმპიური თამაშებიდან უნგრელი მოთხილამურის, ადამ კონიას ფოტო, რომელსაც ხელთათმანის შიდა ნაწილზე დამაგრებული აქვს ინგლისურენოვანი წარწერა: We’re all fed up with “U” (ყველას ყელში ამოგვივიდა “უ”). ფოტოს გამავრცელებლები წერენ, რომ უნგრელი სპორტსმენი უკრაინას გულისხმობს და მათ მიმართ უკმაყოფილებას ამ ფორმით გამოხატავს.
რედაქტირებულია სოციალურ ქსელში გავრცელებული უნგრელი სპორტსმენის ფოტო, რომელშიც მას ხელთათმანზე ანტიუკრაინული წარწერა აქვს. რეალურ ფოტოში სპორტსენს ხელთათმანზე არაფერი აწერია.
სოციალურ ქსელში გავრცელებულ ფოტოზე აღბეჭდილია უნგრელი მოთხილამურე ადამ კონია. მან 2026 წლის ზამთრის ოლიმპიურ თამაშებზე 8 თებერვალს იასპარეზა და მისი გამოსვლის ამსახველი ფოტოები უნგრეთის ოლიმპიურმა კომიტეტმა გაავრცელა. მათ შორისაა ფოტო, რომლის რედაქტირებულ ვერსიასაც სოციალური ქსელის რუსულენოვანი მომხმარებლები აზიარებენ.
ოფიციალური წყაროს მიერ გავრცელებულ ფოტოზე სპორტსმენს თეთრ ხელთათმანზე არავითარი წარწერა არ აქვს და ის შემდგომში უკრაინისა და უკრაინელი სპორტსმენების დისკრედიტაციის მიზნით არის რედაქტირებული. აღსანიშნავია, რომ ინფორმაცია სპორტსმენის საპროტესტო ჟესტის შესახებ არ გაუვრცელებია არც ოლიმპიადის ოფიციალურ ვებ-გვერდებს და არც რომელიმე სანდო მედიასაშუალებას.
წყარო: უნგრეთის ოლიმპიური კომიტეტი
4 თებერვალს იტალიაში დაიწყო ზამთრის ოლიმპიური თამაშები. მასში 93 ქვეყნიდან 3500-ზე მეტი სპორტსმენი მონაწილეობს. უნგრელი სპორტსმენის ფოტოფაბრიკაციის აღწერაში ნახსენებია უკრაინელი სპორტსმენი და მისი დისკვალიფიკაციის შემთხვევა. ოლიმპიური კომიტეტის გადაწყვეტილებით, სკელეტონისტმა ვლადიმერ ჰერასკევიჩმა დისკვალიფიკაცია დაიმსახურა ჩაფხუტით ასპარეზობისთვის, რომელზეც დაღუპული უკრაინელების პორტრეტები იყო გამოსახული. მათ სპორტსმენი დაასანქცირეს ოლიმპიური ქარტიის 50-ე მუხლის საფუძველზე, რომელიც კრძალავს პოლიტიკური, რელიგიური და რასობრივი საკითხების პროპაგანდას.
ზამთრის ოლიმპიური თამაშების დაწყების შემდეგ, “მითების დეტექტორმა” გადაამოწმა კიდევ ერთი დეზინფორმაციული მტკიცება, რომელიც ასევე უკრაინელი ათლეტების წინააღმდეგ იყო მიმართული. მათ შესახებ ვრცლად წაიკითხავთ მასალებში:
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
