23 იანვარს დავით ჩიხელიძემ, რომლის განცხადებებიც ხშირად შუქდება პროსახელისუფლებო მედიაში, გაავრცელა ინფორმაცია, თითქოს გერმანიის კანცლერ ოლაფ შოლცს ლოს-ანჯელესში ძვირადღირებული ვილა ჰქონდა, რომლის შესახებაც არავინ იცოდა. ჩიხელიძე წერს, რომ შოლცის ვილა ხანძარს ემსხვერპლა, რის გამოც, კანცლერი გეგმავს, ამერიკას უჩივლოს. გავრცელებულ პოსტს თან ერთვის ვიდეო, რომელშიც ნაჩვენებია ვილა და ნათქვამია, თითქოს აღნიშნულის შესახებ შოლცმა თავად განაცხადა, ვილა 90 მილიონი დოლარის ღირებულების იყო, კანცლერი კი დანაკარგის კომპენსაციას ითხოვს.
მტკიცება, თითქოს ოლაფ შოლცს ლოს-ანჯელესში ძვირადღირებული ვილა ჰქონდა და ის ხანძარმა გაანადგურა, სიმართლეს არ შეესაბამება და სათავეს სატირული წყაროდან იღებს. გერმანულ მედიასთან აღნიშული უარყო კანცლერის წარმოამდგენელმაც. ასევე, შენობა, რომელიც გავრცელებულ ვიდეოზეა ნაჩვენები, არა ოლაფ შოლცის ვილა, არამედ ლოს-ანჯელესის პოლიციის აკადემიის შენობაა.
ვიდეოს პირველწყაროს ძიების შედეგად ვადგენთ, რომ ის თავდაპირველად სატირულმა ტიკ-ტოკ ანგარიშმა გამოაქვეყნა. “ახალი ამბები და პოლიტიკური სატირა,” – ვკითხულობთ იმ ანგარიშის აღწერაში, რომელიც ოლაფ შოლცისა და სხვა პოლიტიკოსების ძვირადღირებული ქონების შესახებ ვიდეოებს აქვეყნებს. გერმანიის კანცლერის შესახებ ვიდეო 2025 წლის 11 იანვრით თარიღდება. ანგარიშმა მსგავსი შინაარსის ვიდეო გერმანიის ყოფილი კანცლერის, ანგელა მერკელის შესახებაც გამოაქვეყნა და მას დაურთო განმარტება: “ყალბი სიტუაცია, სატირა”.
გერმანული მედია Deutsche Presse-Agentur-ის ფაქტების გადამოწმების რედაქცია კანცლერის ვილის შესახებ ინფორმაციის დასაზუსტებლად ოლაფ შოლცის სპიკერს დაუკავშირდა. მედიის საპასუხოდ, სპიკერმა აღნიშნა, რომ შოლცი უძრავ ქონებას არ ფლობს. მედიამ ასევე დაიანგარიშა კანცლერის ხელფასი, რაც წლიურად, დაახლოებით, 350 000 ევროზე მეტს შეადგენს. DPA-ის ვარაუდით, ეს შემოსავალი არ არის საკმარისი 90 მილიონი ევროს ღირებულების ქონების შესაძენად.
სოციალურ ქსელში გავრცელებულ ვიდეოს დასაწყისში ნაჩვენებია შენობა, რომელიც თითქოს ოლაფ შოლცს ეკუთვნოდა. შენობის მოძებნა რუკაზე შესაძლებელია. ნაჩვენები შენობა, რომელზეც ამტკიცებენ, რომ ოლაფ შოლცის საკუთრება იყო, სინამდვილეში ლოს-ანჯელესის პოლიციის აკადემიის შენობაა და 1872 Malvina Ave-ზე მდებარეობს.
7 იანვრიდან ლოს-ანჯელესში ხანძრის რამდენიმე კერა მძვინვარებს. მან ათასობით შენობა გაანადგურა და 28 ადამიანის სიცოცხლე იმსხვერპლა. ხანძრის პარალელურად, სოციალურ ქსელში არაერთი მცდარი ცნობა თუ ვიზუალური მანიპულაცია გავრცელდა, რასაც “მითების დეტექტორი” სისტემატურად ამოწმებდა. ასევე არ არის პირველი შემთხვევა, როდესაც დასავლელი ლიდერის დისკრედიტაციის მიზნით ვრცელდება დეზინფორმაცია, თითქოს ის ძვირადღირებულ საიდუმლო ქონებას ფლობს. ხშირად ასეთ ამბებს, ოლაფ შოლცის მაგალითისგან განსხვავებით, სატირული წარმომავლობა არ აქვთ.
წყაროს შესახებ:
დავით ჩიხელიძე “რეგიონული განვითარების და ხელშეწყობის ცენტრის” თავმჯდომარეა. ის დაკავშირებული იყო გვერდთან “ფაქტები და არჩევანი”, რომელიც 2024 წლის საპარლამენტო არჩევნების წინ შეიქმნა და ოპოზიციისა და არასამთავრობო სექტორის დისკრედიტაციას ეწეოდა. გვერდი, ამჟამად, ხელმისაწვდომი აღარ არის. დავით ჩიხელიძე სოციალურ ქსელში ანტიდასავლური შინაარსის ყალბ ინფორმაციას ხშირად ავრცელებს, რაც “მითების დეტექტორმა” არაერთხელ გადაამოწმა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
