18 თებერვალს პლატფორმა “სოლიდარობა მშვიდობისთვის” გადაცემაში “ახალი პარადიგმა” წამყვანმა გურამ ნიკოლაიშვილმა და სტუმარმა, გენერალ-ლეიტენანმა გიორგი შერვაშიძემ საქართველოში ეთნიკურად ქართველი მოსახლეობის განახევრების შესახებ ისაუბრეს.
გურამ ნიკოლაიშვილი [16:20-დან]: “აზერბაიჯანი გაორმაგდა, ჩვენ პირიქით, ორჯერ ნაკლები გავხდით და უკვე გავუტოლდით იმ არაქართველებს, რომლებიც საქართველოს ტერიტორიაში [ცხოვრობენ]”.
მტკიცება, თითქოს საქართველოს მოსახლეობის მხოლოდ ნახევარია ეთნიკურად ქართველი, დეზინფორმაციულია. საქსტატის მიერ ჩატარებული 2014 წლის აღწერით, საქართველოს მოსახლეობა 3 713 804 იყო, საიდანაც ეთნიკურად ქართველების რაოდენობა 3 224 564-ია.
“მითების დეტექტორმა” საქართველოში მცხოვრები ეთნიკურად ქართველების შესახებ მონაცემები საქართველოს სტატისტიკის ერონული სამსახურიდან გამოითხოვა. საქსტატმა მოგვაწოდა 2014 წლის 5 ნოემბრის აღწერით მიღებული სტატისტიკა რეგიონების, თვითმმართველი ერთეულების და ეროვნება/ეთნიკური წარმომავლობის მიხედვით მოსახლეობის რიცხოვნობის შესახებ.
საქსტატის მონაცემების მიხედვით, 2014 წლის მდგომარეობით, საქართველოს მოსახლეობის რიცხოვნობა 3 713 804-ია, საიდანაც ეთნიკურად ქართველების რაოდენობა 3 224 564-ია.
2014 წლის აღწერით, ეთნიკური წარმომავლობის მიხედვით მოსახლეობის რიცხოვნობა ასე ნაწილდება:
| მოსახლეობის რიცხოვნობა საქართველოში | 3 713 804 |
| ქართველი | 3 224 564 |
| აზერბაიჯანელი | 233 024 |
| სომეხი | 168 102 |
| რუსი | 26 453 |
| ოსი | 14 385 |
| იეზიდი | 12 174 |
| უკრაინელი | 6 034 |
| ქისტი | 5 697 |
| ბერძენი | 5 544 |
| ასირიელი | 2 377 |
| სხვა | 14 346 |
| უარი პასუხზე | 591 |
| არ არის მითითებული | 513 |
აღსანიშნავია, რომ საქართველოში მოსახლეობის ბოლო აღწერა 2024 წელს ჩატარდა, თუმცა, სავარაუდოდ, მონაცემები საქსტატს ამ დროისთვის დამუშავებული არ აქვს. ბოლო ხელმისაწვდომი, 2014 წლის მონაცემებით კი დასტურდება, რომ მტკიცება, თითქოს ქვეყანაში ეთნიკურად ქართველთა ოდენობა მოსახლეობის ნახევარს უტოლდება, დეზინფორმაციულია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
