12-15 დეკემბერს Facebook-სა და Instagram-ზე გავრცელდა მიხეილ ყაველაშვილის პოსტის სქრინშოტი, რომელშიც ვკითხულობთ: “ძვირფასო მეგობრებო, ჯარში და ციხეში კაცად ყალიბდებიან. ლიბერასტებმა კი ჯერ ჯარი გააუქმეთო თქვეს, ახლა კი იძახიან ციხეში არ გაუშვათ ეს ბიჭიო. მითხარით სად უნდა დაკაცდეს ეს თაობა? ტიკტიკზე? ფეისბუკზე?”
მიხეილ ყაველაშვილის სახელით სოციალურ ქსელში გაყალბებული პოსტი ვრცელდება. განცხადება არც მის ოფიციალურ გვერდზე და არც ღია წყაროებით არ იძებნება. ყაველაშვილმა აღნიშნული პოსტის გამოქვეყნება 2023 წელს უარყო.
სოციალურ ქსელში გავრცელებული პოსტის სქრინშოტი, რომელსაც მიხეილ ყაველაშვილს მიაწერენ, გაყალბებულია. მის ოფიციალურ ფეისბუქ-გვერდზე აღნიშნული პოსტი არ იძებნება. ასევე, განცხადება არ იძებნება ღია წყაროებით, მათ შორის, ონლაინ მედიისა (1;2;3) და ტელევიზიების (1;2;3) ვებ-საიტებზე. გარდა ამისა, სქრინშოტზე შეიმჩნევა ხარვეზები, რომლებიც მიანიშნებს, რომ ის ყალბია. მაგალითად, იქ, სადაც გამოქვეყნების დრო უნდა იყოს მითითებული, წერია მხოლოდ “3”.
2023 წლის აპრილში აღნიშნული პოსტის გამოქვეყნება მიხეილ ყაველაშვილმა უარყო:
“მეგობრებო, თუ სადმე შეგხვდათ ეს პოსტი, იცოდეთ, რომ ფეიქია! გთხოვთ, ნებისმიერი მსგავსი შინაარსის პოსტის ნახვის შემთხვევაში, გადაამოწმოთ, რადგან, აგენტურამ ბოლო დროს ძალიან მოუხშირა მსგავსი ფეიქ-ინფორმაციების “ხალხის ძალის” და “ქართული ოცნების” წევრების წინააღმდეგ გავრცელებას!” – დაწერა მან.
სავარაუდოდ, გაყალბებული პოსტი 2023 წლის მარტში “რუსული კანონის” საწინააღმდეგო აქციაზე დაკავებული ლაზარე გრიგორიადისის სასამართლო პროცესის მიმდინარეობის პარალელურად გავრცელდა. გრიგორიადისი 29 მარტს დააკავეს და 31 მარტს აღკვეთის ღონისძებად პატიმრობა შეუფარდეს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
