8 ივლისს გიორგი ახვლედიანის საავტორო გადაცემაში “ლიბერალიზმის ანატომია“, რომელიც პროსახელისუფლებო POSTV-ის ეთერში გადის, ჟურნალისტმა დათა გვასალიამ თქვა, რომ 2018 წელს კომპანია Disney-მ საბავშვო კლინიკების დასაფინანსებლად გამოყო 100 მილიონზე მეტი და, მათ შორის, დააფინანსა გენდერული კლინიკები – ფილადელფიის ბავშვთა საავადმყოფო, ბლანკის ბავშვთა საავადმყოფო, ტეხასის ბავშვთა საავადმყოფო, ლოს ანჯელესის ბავშვთა საავადმყოფო და ონლაინ სამედიცინო პორტალი, რომელიც ბავშვებს სთავაზობს გენდერული მომსახურების სერვისებს.
“ლიბერალიზმის ანატომია” Disney-ის მიერ ბავშვთა კლინიკების დაფინანსებაზე ინფორმაციას მანიპულაციურად ავრცელებს და წარმოაჩენს ისე, თითქოს კომპანიამ გენდერული კლინიკები ბავშვებისთვის სქესის შეცვლის ხელშეწყობის მიზნით დააფინანსა. რეალურად, თანხები, რომელიც 2018 წელს გამოიყო, მოხმარდა კლინიკებში მყოფი ბავშვებისთვის კომფორტული გარემოს შექმნას – მათ შორის, მულტფილმების ჩვენებას, თემატური ოთახების შექმნას და ა.შ.
“ლიბერალიზმის ანატომიის” სიუჟეტის სახელწოდება “გარყვნილების მედია მხარდაჭერაა” და მოიცავს მტკიცებებს, თუ როგორ უჭერენ მხარს ცნობილი მედიასაშუალებები და კომპანიები “ლგბტ პროპაგანდას”. სიუჟეტში ამ მიმართულებით არის ნახსენები Disney და ნაჩვენებია ABC NEWS-ის სტატია, რომელიც 2018 წლის 7 მარტსაა დაწერილი და კომპანიის მიერ საავადმყოფოში მყოფ ბავშვებსა და მათ მშობლებზე ზრუნვისთვის გამოყოფილ 100 მილიონ დოლარზე მეტ თანხას ეხება. POSTV-ის ჟურნალისტის ტექსტით, რომლის მიხედვითაც დაფინანსებულ საავადმყოფოებს შორის არის “გენდერული კლინიკები”, იქმნება შთაბეჭდილება, რომ Disney-მ საავადმყოფოები სწორედ ამ მიზნისთის – სქესის შეცვლისა და ჰორმონალური თერაპიის პროცედურების მხარდასაჭერად დააფინანსა.
რეალურად, “ლიბერალიზმის ანატომია” Disney-ს მიერ გამოყოფილი თანხის მიზნობრიობის შესახებ მანიპულაციურ მტკიცებას ავრცელებს. ABC NEWS სტატიაში, რომელსაც სიუჟეტში აჩვენებენ, საუბარია უოლტ დისნეის კომპანიის მიერ 100 მილიონ დოლარზე მეტის გამოყოფაზე, რომელიც საავადმყოფოებში ბავშვებისა და მათი ოჯახის წევრებისთვის კომფორტის შექმნის მიზნით დაიხარჯა. გეგმის შესახებ 2018 წლის მარტში Disney Co.-ის თავმჯდომარემ და აღმასრულებელმა დირექტორმა, რობერტ იგერმა გამოაცხადა. კომპანიის მიერ გამოყოფილი შიდა რესურსები მოიცავდა ნაღდ ფულს, პროდუქტებსა და სერვისებს და მიზნად ისახავდა ბავშვების დახმარებას არა მხოლოდ აშშ-ში, არამედ მთელი მსოფლიოს კლინიკებში. პროგრამა 5 წლის განმავლობაში უნდა გაგრძელებულიყო. გამოსვლაში დირექტორი განმარტავდა, რომ Disney-ს შეეძლო, ნუგეში მოეტანა იმ ბავშვებისა და მშობლებისთვის, რომლებიც რთულ დროს გადიოდნენ.
“ჩვენი საყვარელი პერსონაჟებისა და ლეგენდარული კრეატიულობის ძლიერი კომბინაციის გამოყენებით, ვგეგმავთ, გარდავქმნათ პაციენტების გამოცდილება მსოფლიოს გარშემო ბავშვთა საავადმყოფოებში – შევქმნათ პერსონალიზებული და მიმზიდველი ატმოსფერო, რომელიც შთააგონებს პატარა პაციენტებს და შეამსუბუქებს კლინიკაში დარჩენის სტრესს”. – თქვა მან.
იგივე შინაარსის სტატია Disney-ს ოფიციალურ გვერდზეც გამოქვეყნდა. სტატიაში განხილულია ინიციატივები, რომელთა განხორციელებაც პროექტის განმავლობაში სურდათ – მაგალითად, თემატური ოთახები, Disney-ს პერსონაჟების ინტერაქტიული გამოსახულებები, თეთრეულები და ხალათები ბავშვების საყვარელი პერსონაჟების გამოსახულებით, მობილური “სათამაშო ეტლები”, რომლებიც მოიცავს Disney-ს თემატიკის თამაშებსა და აქტივობებს ოჯახის წევრებისთვის, დისნეის ფილმები და სატელევიზიო შოუები, რომელებიც ხელმისაწვდომი უნდა იყოს როგორც ოთახებში, ასევე საავადმყოფოში მოწყობილ კინოთეატრებში, ტრენინგები ექიმებისთვის, ექთნებისა და პერსონალისთვის.
ერთ-ერთი პირველი საავადმყოფო, რომელშიც ინიციატივა განხორციელდა, ტეხასის ბავშვთა კლინიკაა, სწორედ იქ გადაღებული ფოტოებია გამოყენებული სტატიაში, რომლებშიც ჩანან მცირეწლოვანი პაციენტები და Disney-ს პერსონაჟების კოსტიუმებში ჩაცმული ანიმატორი.
ტეხასის საავადმყოფო აშშ-ში ერთ-ერთი უმსხვილესი პედიატრიული და ქალთა ჯანდაცვის დაწესებულებაა, რომელსაც, ბოლო მონაცემებით, 4.9 მილიონამდე პაციენტი ჰყავს. კლინიკაში ყოველწლიურად, დაახლოებით, 7 000 ქალი მშობიარობს. საავადმყოფო აშშ-ის პედიატრიული საავადმყოფოების საუკეთესო ოთხეულში მუდმივად შედის და ნევროლოგიური დაავადებების განკურნების მხრივ ერთ-ერთი საუკეთესო შედეგები აქვს. “ლიბერალიზმის ანატომიის” ჟურნალისტი მას მანიპულაციურად მოიხსენიებს, როგორც “გენდერულ კლინიკას”. მიუხედავად იმისა, რომ კლინიკას ჰყავს სპეციალისტები, რომლებიც სქესობრივი დიფერენციაციის დარღვევებზე მუშაობენ, ეს არ ნიშნავს იმას, რომ Disney-ს დახმარება ბავშვებისთვის ამ სერვისის მიწოდების მიზნით გამოიყო ან მხოლოდ აღნიშნულ განყოფილებას მოხმარდა.
ტეხასის საავადმყოფოს მსგავსად, მრავალი დეპარტამენტი აქვს ფილადელფიის ბავშვთა საავადმყოფოსაც. ის პაციენტებს სერვისს არაერთი მიმართულებით სთავაზობს, მაგალითად, აქვს ონკოლოგიის ცენტრი, ასევე, ანატომიური პათოლოგიის, ნევროლოგიისა და ათობით სხვა დეპარტამენტი, რომელთა შესახებაც ინფორმაცია ვებ-საიტზეა მოცემული. იგივე შეიძლება ითქვას ბლანკისა (1;2) და ლოს ანჯელესის ბავშვთა საავადმყოფოებზე.
შესაბამისად, სიუჟეტში, რომელიც დასავლეთში “ლგბტ პროპაგანდას” შეეხება, მანიპულაციურად არის მოყვანილი Disney-ის მიერ ბავშვთა საავადმყოფოების დაფინანსების მაგალითი და ინფორმაცია, რომ ისინი “გენდერულ კლინიკებს” წარმოადგენს. ჟურნალისტის ტექსტი ქმნის შთაბეჭდილებას, რომ Disney-მ კლინიკები სწორედ ამ პროცედურების მხარდასაჭერად დააფინანსა, როდესაც რეალურად ინიციატივა კლინიკებში ბავშვებისა და მშობლებისთვის კომფორტული გარემოს შექმნას ითვალისწინებდა, მათ შორის, ანიმატორების, მულტფილმებისა და თამაშების გზით.
“მითების დეტექტორს” გადაცემა “ლიბერალიზმის ანატომიაში” გავრცელებული მცდარი და მანიპულაციური მტკიცებები წარსულშიც არაერთხელ გადაუმოწმებია. ვრცლად იხილეთ მასალებში:
- “ლიბერალიზმის ანატომიის” მანიპულაციური სიუჟეტი ვიდეო თამაშებთან დაკავშირებით
- POSTV ბავშვებისთვის სქესის შეცვლის შესახებ ბაიდენის ციტატის არასწორ თარგმანს ავრცელებს
- რა ვიცით ვირჯინიის სკოლაში მომხდარ ძალადობის შემთხვევასა და ტრანსგენდერი მოსწავლეების უფლებებზე?
- როგორ მანიპულირებს POSTV “კომპასის” და “კომპასიტოს” სახელმძღვანელოების შინაარსით?
- ვინ არის პოლ მაკჰიუ და როგორ აშუქებს POSTV ტრანსგენდერებზე არსებულ კვლევებს?
- ამტკიცებს თუ არა ყველა საერთაშორისო კვლევა, რომ ერთნაირსქესიანი მშობლების შვილების აბსოლუტური უმრავლესობა ჰომოსექსუალია?
- დეზინფორმაცია, თითქოს აშშ-სა და კანადაში ბავშვებს სქესს მშობლების ნებართვის გარეშე უცვლიან
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
