28 ოქტომბერს ფეისბუქ-გვერდმა პოლიტიკოსები 1 ლარიდან გამოაქვეყნა რუსთაველის გამზირზე პარლამენტის წინ აქციაზე შეკრებილი ხალხის ფოტო, რომლის აღწერა ქმნის შთაბეჭდილებას, რომ 28 ოქტომბრის აქციაზე ცოტა ადამიანი მივიდა. ფეისბუქ გვერდის მტკიცებით, დემონტრაციაზე, რომელიც 7 საათზე უნდა დაწყებული, 8-ის წუთებზე “გაბრაზებული და გულანთებული ხალხი ტროტუარსაც ვერ ავსებს”.
მსგავსი კადრები მოკლე ვიდეოდ გამოაქვეყნა ყალბი ინფორმაციის ხშირად გამავრცელებელმა და დისკრედიტაციის კამპანიებში ჩართულმა გვერდმა “არ აგარევინებთ”. ვიდეოს აღწერაც ხალხის სიმცირეს უსვამს ხაზს.
აქციასთან დაკავშირებული პოსტები მანიპულაციურია და ქმნის შთაბეჭდილებას, რომ 28 ოქტომბრის აქციაზე ხალხი არ მივიდა. გავრცელებული კადრები 18:51 და 19:00-ზეა გადაღებული, ხოლო 19:10-ისთვის რუსთაველის გამზირი ხალხის სიმრავლის გამო უკვე გადაკეტილი იყო.
27 ოქტომბერს საქართველოს პრეზიდენტმა, სალომე ზურაბიშვილმა განაცხადა, რომ საპარლამენტო არჩევნების შედეგებს არ აღიარებდა და 28 ოქტომბერს, 19:00-ზე პარლამენტის წინ აქციაა დააანონსა.
სალომე ზურაბიშვილი: “არ ვაღიარებთ არჩევნებს. არ ვეგუებით რუსეთს და მის ამ ფორმით შემოსვლას საქართველოში, ახალი ფორმის დაპყრობას. ჩვენ დავდგებით ერთად, ჩემთან ერთად არიან ის პარტიები, რომლებიც მონაწილეობდნენ არჩევნებში და იცავდნენ სწორედ ევროპულ მომავალს, ქარტიას… მათთან ერთად მინდა ყველას გითხრათ და მოგიწვიოთ ხვალ, საღამოს 7 საათზე, რუსთაველზე, იმისთვის, რომ ჩვენ ერთად გამოვუცხადოთ მსოფლიოს და ერთმანეთს, რომ ჩვენ არ ვაღიარებთ ამ არჩევნებს, ვიცავთ ჩვენს კონსტიტუციურ უფლებას, რომ მშვიდობიანად დავიცვათ ყოველი ხმა, რაც მთავარია, ჩვენი მომავალი და ის საშუალება, რომ ამ ქვეყანაში სამომავლოდ ჩატარდეს სამართლიანი და დემოკრატიული არჩევნები”.
ფოტო, რომელსაც პოლიტიკოსები 1 ლარიდან ავრცელებს, საზოგადოებრივი მაუწყებლის 18:00-იანი გამოშვების “მოამბის” პირდაპირი ეთერიდან არის ამოჭრილი. ზუსტად კადრი “მოამბის” ეთერში 19:00 წუთზე ჩანს.
გვერდის “არ აგარევინებთ” გავრცელებული ვიდეოც “მოამბის” იმავე გამოშვებიდან, დაახლოებით 18:51 წუთზეა მოჭრილი. კადრებში ჩანს ერთი და იგივე, თეთრში ჩაცმული ადამიანი რომელიც სკუტერით გადაადგილდება.
შესაბამისად გავრცელებული ვიზუალური მასალები ასახავს აქციის დაწყებამდე 10 წუთით ადრე და უშუალოდ 19:00-ზე მდგომარეობას. 19:09 წუთისთვის რუსთაველის გამზირი ხალხის სიმრავლის გამო გადაიკეტა, შესაბამისი ფოტო ტელეკომპანია “ფორმულამ” გამოაქვეყნა.
გარდა ამისა, ფეისბუქზე 19:10-ზე დაწყებული “მთავარი არხის” საგანგებო პირდაპირ ეთერშიც ჩანს, რომ ამ დროისთვის რუსთაველის გამზირი უკვე გადაკეტილია და ხალხი ქართული სახვითი ხელოვნების მუზეუმის შენობამდე დგას.
ტელეკომპანია “ფორმულამ” ასევე გაავრცელა აქციაზე დრონის მიერ გადაღებული კადრები, სადაც ხალხის სიმრავლე ჩანს. 28 ოქტომბრის აქციის ამსახველი ფოტოები, სადაც ხალხის სიმრავლე ჩანს, ასევე გაავრცელა (1,2,3) ფოტოგრაფმა ეზ გაბერმა.
არქივის ბმული
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
