10 ივნისს ფეისბუქ-მომხმარებელმა გიორგი ჩიმაკაძე გამოაქვეყნა ,,TBC ბანკის” თანადამფუძნებლისა და პოლიტიკური პარტია ,,ლელო საქართველოსთვის” ლიდერის, მამუკა ხაზარაძის მოკლე ვიდეო, რომელშიც პოლიტიკოსი, თითქოს, ამბობს: ,,მთელი ცხოვრება საქართველოს გაღატაკებას დავუთმე და არასოდეს გავჩერდები.” ვიდეოს ბოლოს ნაჩვენებია პარტიისათვის დამახასიათებელი ყვითელი ფერის ვიზუალი, პარტიის საარჩევნო ნომერი და წარწერა ,,გააღატაკე საქართველო”. ვიდეო ქმნის შთაბეჭდილებას, თითქოს ის პარტიის ოფიციალური ვიდეო და კამპანიის ნაწილია.
მამუკა ხაზარაძის ვიდეო რედაქტირებულია. პოლიტიკოსმა რეალური ვიდეო რამდენიმე დღის წინ საკუთარ ფეისბუქ გვერდზე გამოაქვეყნა და მასში არა ,,საქართველოს გაღატაკებას”, არამედ ,,საქართველოს განვითარებას” ამბობს.
ვიდეომასალა, სავარაუდოდ, სატირული მიზნებით არის შექმნილი, თუმცა აუდიო, რომელიც კადრებში გამოიყენება, მიმსგავსებულია მამუკა ხაზარაძის ხმას და პოსტის გამოხმაურებებიდან ჩანს, რომ ის ინტერნეტ მომხმარებლების ნაწილისთვის შეცდომაში შემყვანია.
8 ივნისს მამუკა ხაზარაძემ ფეისბუქ გვერდზე გაავრცელა ვიდეო, აღწერით ,,სიმართლე გითხრათ…”, ვიდეოში კი ამავე სახელწოდებით თავის ახლად გამოცემულ წიგნზე საუბრობს და ჰყვება, რის შესახებ არის ის. ბოლოს კი საუბარს ასრულებს ფრაზით: ,,მთელი ცხოვრება საქართველოს განვითარებას დავუთმე და არასოდეს გავჩერდები”. ვიდეოს სწორედ ეს ნაწილია დამონტაჟებული და წარმოჩენილი, თითქოს ხაზარაძე ,,ქვეყნის გაღატაკებაზე” საუბრობს.
მსგავსი ვიდეომანიპულაციების სამიზნე პოლიტიკოსები, მათ შორის მამუკა ხაზარაძე, ადრეც გამხდარან. მათი ნაწილი უკვე გადამოწმებულია, იხილეთ ,,მითების დეტექტორის” მასალები:
- ფეისბუქზე ჯაფარიძის ,,სიცრუის დეტექტორში” სტუმრობის რედაქტირებული ვიდეო ვრცელდება
- ელისაშვილის შეფასება არასამთავრობო სექტორის გამჭვირვალობაზე მანიპულაციურად ვრცელდება
- ანტიოპოზიციური გვერდის ,,სირცხვილის კორიდორის” ვიდეომანიპულაცია, თუ როგორ იშოვა ხაზარაძემ პირველი მილიონი
წყაროს შესახებ:
გიორგი ჩიმაკაძე წარსულშიც გაავრცელა ვიდეო, რომელიც ,,მითების დეტექტორმა” ასევე ვიდეომანიპულაციად შეაფასა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
