14 მაისს ფეისბუქ-ანგარიშმა “Ekumenizm Religia Antixrista” გამოაქვეყნა ახლადარჩეული რომის პაპის ფოტო, რომელზე დაყრდნობითაც ის ამტკიცებს, რომ პაპი იყენებს სატანისტურ ჟესტს. კერძოდ, ფოტოზე ლეონ XIV-ს მარჯვენა ხელის ცერა, საჩვენებელი და ნეკა თითები აქვს გაშლილი, დანარჩენი ორი კი მოკეცილი. პოსტის ბოლოს ასევე გვხვდება ბმული, რომელსაც გადავყავართ ამავე ანგარიშის მიერ 2022 წელს გამოქვეყნებულ ფოტოზე, სადაც გარდაცვლილი პაპი ფრანცისკე ანალოგიურ ჟესტს აკეთებს, აღწერაში კი ავტორი წერს: “მანო კორნუტო”, ეს არის ოკულტისტთა და სატანის აღმსარებელთა ერთობის ნიშანი და “სატანური მისალმება”.
მტკიცება, თითქოს გავრცელებულ ფოტოებში როგორც მოქმედი, ისე გარდაცვლილი რომის პაპი ხელით სატანისტურ ნიშანს გამოსახავს, სიმართლეს არ შეესაბამება. რეალურად, ეს ჟესტი ამერიკულ ჟესტების ენაზე “მე შენ მიყვარხარს” ნიშნავს.
2025 წლის 8 მაისს ვატიკანში ახალი პაპი აირჩიეს – ლეონ XIV, იგივე რობერტ ფრანცის პრევოსტი, რომელიც პირველი ამერიკელია, რომელიც პაპი გახდა. მისი არჩევიდან მალევე ინტერნეტ სივრცეში გავრცელდა ზემოაღნიშნული ფოტო, არასწორი აღწერებით და მინიშნებებით, თითქოს ის სატანისტურ ან მუსიკის ჟანრ როკისთვის დამახასიათებელ ჟესტიკულაციას, ე.წ. “ეშმაკის რქებს” იყენებდა. სინამდვილეში პაპი ამ ფოტოში ამერიკულ ჟესტების ენაზე (ASL) ხელით ფრაზას “მე შენ მიყვარხარ” გამოსახავს.
აღსანიშნავია, რომ როკის ლეგენდების და ფანების უმრავლესობა, “ეშმაკის რქებს” გამოსახავს მოკეცილი ცერა თითით. თუმცა ცნობილი ბენდი KISS-ის ლეგენდა ჯინ სიმონსი ამ ჟესტის ჩვენებისას გაშლილ ცერა თითსაც იყენებდა და 2017 წელს მისი სასაქონლო ნიშნის დაპატენტებაც სცადა, თუმცა პრობლემებს წააწყდა, რადგან იდენტური ჟესტი ASL-ზე უკვე არსებობდა და “მე შენ მიყვარხარს” ნიშნავდა.
ფეისბუქ ანგარიშის პოსტში ასევე გვხვდება მის მიერ 2022 წელს გამოქვეყნებული ფოტო, რომელშიც გარდაცვლილი პაპი ფრანცისკეც იმავე ჟესტიკულაციას იყენებს და პოსტის აღწერაში კვლავ ვხედავთ მტკიცებას, რომ ეს სატანური ნიშანია. რეალურად, ამ შემთხვევაშიც ფრანცისკე და მის გვერდით მგომი მანილას მთავარეპისკოპოსი ASL-ს იყენებენ და სმენადაქვეითებულ ხალხს “მე შენ მიყვარხარ” ნიშანს უჩვენებენ. Associated Press-მა ეს ფოტო 2015 წელს გამოაქვეყნა აღწერით: “პაპი ფრანცისკე და მანილას მთავარეპისკოპოსი ლუის ანტონიო ტაგლე მიესალმებიან ხალხს ხელის ნიშნით, რომელიც გულისხმობს „მე შენ მიყვარხარ-ს”, მანილაში, ფილიპინების დედაქალაქში, პარასკევს, 2015 წლის 16 იანვარს, ოჯახებთან შეხვედრის დროს, Mall of Asia არენაზე”.
უნდა აღინიშნოს, რომ ლეონ XIV-ის გავრცელებული ფოტოს ძიებისას მივაკვლიეთ მის არაერთ დაფოტოშოპებულ ვერსიას, რომლებშიც იგი ხელით სხვადასხვა ნიშანს აჩვენებს.
სტატია Facebok-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
