19 ნოემბერს დეზინფორმაციის ხშირად გამავრცელებელმა ფეისბუქ-მომხმარებლებმა, Ermile Nemsadze-მ და Kote Afxazi-მა გამოაქვეყნეს საინფორმაციო ბარათები, რომელთა მიხედვითაც ხაშურში, კულტურის სამინისტროს ინიციატივით, ჯაბა იოსელიანის მემორიალური მუზეუმი აშენდება.
ინფორმაცია იმის შესახებ, რომ კულტურის სამინისტროს ინიციატივით ხაშურში ჯაბა იოსელიანის მემორიალური მუზეუმი აშენდება, სათავეს სატირული ფეისბუქ-გვერდიდან იღებს და სიმართლეს არ შეესაბამება.
გავრცელებული ინფორმაციის პირველწყარო არის სატირული ფეისბუქ-გვერდი, სახელწოდებით “ხაშურის მუნიციპალიტეტი • Khashuri Municipality”. გვერდზე გამოგონილი, სატირული პოსტები სისტემატურად ვრცელდება. აღნიშნული ფეისბუქ-გვერდი არ ეკუთვნის ხაშურის მუნიციპალიტეტის მერიას. მსგავსი განცხადება არ გამოქვეყნებულა მერიის ოფიციალურ ფეისბუქ-გვერდზე. ინფორმაცია არ იძებნება არც კულტურის სამინისტროს ოფიციალურ ფეისბუქზე ან ვებ-საიტზე.
ასევე, გამოგონილია თინათინ რუხაძის კომენტარიც, სადაც ის მუზეუმის აშენების ინიციატივასთან დაკავშირებით ამბობს: ‘’ისტორია უნდა აღვიქვათ მრავალფეროვნად და არა – ერთფეროვნად”.
პირველწყაროს მიერ გამოქვეყნებული პოსტის ბოლოს, ე.წ. ჰეშთეგებში, მითითებულია, რომ ის სატირულია. პოსტი იუმორისტული ხასიათისაა და სიმართლეს არ შეესაბამება.
“მითების დეტექტორს” წარსულშიც აქვს გადამოწმებული პოსტები, რომლებში მოყვანილი ცნობებიც სათავეს ხაშურის მუნიციპალიტეტის სატირული ფეისბუქ-გვერდიდან იღებდა. ვრცლად წაიკითხეთ მასალებში:
- ხაშურში ბრეჟნევის ბიუსტი აღდგენაზე ინფორმაციის პირველწყარო სატირული ფეისბუქ-გვერდია
- პოსტი, თითქოს ხაშურში გიორგი სააკაძის ქუჩას შევარდნაძის სახელი მიენიჭება, სატირულია
- პოსტი, თითქოს თემურ თათარაშვილი ხაშურის სამუსიკო სკოლის დირექტორად დანიშნეს, სატირულია
- დისნეილენდის ხაშურის მუნიციპალიტეტში აშენებაზე სატირული პოსტი ვრცელდება
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
