კალიფორნიის შტატის სახანძრო დეპარტამენტის უფროსის მოადგილე თუ ბალერონი – ვინ ცეკვავს ვიდეოში?

12 იანვარს ფეისბუკის რუსულენოვანმა ანგარიშმა Светлана Городинская, რომელსაც დეზინფორმაცია არაერთხელ გაუვრცელებია, სხვა ანგარიშებმა (1, 2) და რუსულენოვანმა ტელეგრამ-არხმა გაავრცელეს ბალეტის ცეკვის ამსახველი ვიდეო, რომელშიც თანდართული ტექსტის მიხედვით, კალიფორნიის შტატის სახანძრო დეპარტამენტის უფროსის მოადგილე არის ნაჩვენები.

გავრცელებულ ვიდეოში ბალეტის მოცეკვავე კაცი არა კალიფორნიის შტატის სახანძრო დეპარტამენტის უფროსის მოადგილე, არამედ ბალერონი კუადიო დევისია. ვიდეო მის ინსტაგრამ-ანგარიშზეც არის განთავსებული. 

ვიდეოში მოცეკვავე ბალერონი კალიფორნიის შტატის სახანძრო დეპარტამენტის უფროსის მოადგილე არ არის. ის კუადიო დეივისია, რომელიც მოცეკვავეა და მის ინსტაგრამ-ანგარიშზე ამ ვიდეოსთან ერთად მისი ცეკვის ამსახველი არაერთი სხვა კადრია განთავსებული. აღნიშნული ვიდეო კი მის ანგარიშზე 3 იანვარს განთავსდა.

რაც შეეხება კალიფორნიის შტატის სახანძრო დეპარტამენტს, ამ განყოფილებას სახანძრო მიმართულებით რამდენიმე მოადგილე ჰყავს: მეთიუ სული – სახანძრო უსაფრთხოების დირექტორის მოადგილე; ჯეიკ სიოლუნდი – სახანძრო უსაფრთხოების პროგრამების დირექტორის მოადგილე; ფრენკ ბიგელოუ – ტყის ხანძრის მომზადებისა და შერბილების სამმართველოს და ხანძარსაწინააღმდეგო უსაფრთხოებისა და გამოძიების სამმართველოს დირექტორის მოადგილე. რაც შეეხება კუადიო დეივისს, ის საერთოდ არ ფიგურირებს აღნიშნული დეპარტამენტის ხელმძღვანელების სიაში.

კალიფორნიის შტატის ლოს-ანჯელესის ოლქში ტყეებიდან დაწყებული ხანძარი 7 იანვრიდან მძვინვარებს და ძლიერი ქარის გამო სხვა დასახლებულ რაიონებსაც მოედო. ხანძრის კერების ჩაქრობა ამ დრომდე მიმდინარეობს. 14 იანვრის მდგომარეობით, დაღუპულია 24 ადამიანი, 23 კი დაკარგულად ითვლება. 

ამ დროისთვის მეხანძრეები ოთხ მთავარ კერას ებრძვიან:

1. Palisades-ის კერა – ლოკალიზებულია 14%, დამწვარია 23,713 ჰექტარი.
2. Eaton -ის კერა – ლოკალიზებულია 33%, დამწვარია 14 117 ჰექტარი.
3. Hurst – ის კერა – ლოკალიზებულია 97 %, დამწვარია 799 ჰექტარი. 
4. Auto -ის კერა – არ არის ლოკალიზებული, დამწვარია 56 ჰექტარი.

სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს.  შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.

იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.