21 თებერვალს ჯო ბაიდენის ვარშავაში ვიზიტთან დაკავშირებით რუსულენოვანმა და ქართულენოვან,ა (1, 2, 3) ფეისბუკ ანგარიშებმა თვითმფრინავიდან რამდენიმე ადამიანის ჩამოსვლისა და ერთ-ერთი მათგანის დაგორების ამსახველი ვიდეო გავრცელეს. აღწერის მიხედვით, კადრებში ჯო ბაიდენი ჩანს და ის ვარშავაში თვითმფრინავიდან ჩამოსვლისას კიბეზე დაგორდა. ვიდეოზე პოლონური არხის TVP24-ის ლოგო და შემდეგი წარწერა ჩანს: “აშშ-ის პრეზიდენტი პოლონეთში. ბაიდენის თვითმფრინავი ვარშავის აეროპორტში”.
რუსული პროპაგანდისტული მედია – Царград კადრებს ასევე ჯო ბაიდენს უკავშირებს.
გავრცელებულ ვიდეოში ჯო ბაიდენი არ არის გამოსახული. კადრებში, რომელიც TVN24-ის პირდაპირ ეთერში გადაიცემოდა, ნათლად ჩანს, რომ თვითმფრინვში უკანა კიბიდან ჩამოსვლისას ამერიკული დელეგაციის სხვა წევრი დაგორდა.
კიევში მოულოდნელი ვიზიტის შემდეგ, 20 თებერვალს, პრეზიდენტი ჯო ბაიდენი პოლონეთში ჩავიდა. მისი ჩასვლის და შემდეგ გადაადგილების კადრები უწყვეტ რეჟიმში სხვადასხვა არხზე გადაიცემოდა. აღნიშნული კადრები TVN24-ის სპეციალური ეთერის გამოშვებიდანაა მოჭრილი, თუმცა სრულ ვერსიაში ნათლად ჩანს, რომ ვიდეოში თვითმფრინავის უკანა ბორტიდან ჩამოსვლისას ამერიკული დელეგაციის სხვა წევრი გორდება, ბაიდენი კი წინა კიბით სარგებლობს და კიბეზე შეუფერხებლად ჩამოდის.
TVN24-მა პოლონეთში ბაიდენის ვიზიტის შესახებ რამდენიმე სპეციალური გამოშვება და პირდაპირი ეთერი მოამზადა. ერთ-ერთ ნაწილში (Dzień po dniu, Wtorek 21.02 02:00-03:05) ვარშავის აეროპორტში ბაიდენის თვითმფრინავის დაჯდომა და იქიდან აშშ-ის პრეზიდენტისა და მისი დელეგაციის წევრების გადმოსვლა სრულადაა ასახული.
პირველი კადრი, რომელშიც თვითმფრიანვის უკანა კიბიდან დელეგაციის წევრების ჩამოსვლაა ასახული ეთერში პოლონეთის დროით 21 თებერვლის 23:21 საათზე გავიდა.
23:22 საათის კადრებში ჩანს, რომ თვითმფრინავის უკანა კიბეზე ჩამოსვლისას ერთი ადამიანი ვარდება.
დავარდნის შემდეგ კი ქვემოთ მყოფი ადამიანების ჯგუფი მის დახმარებას ცდილობს.
შემდეგ კადრში ნათლად ჩანს, რომ დავადრნის მომენტში თვითმფრიანვის წინა კართან კიბე ჯერ კიდევ არ დგას, რადგან ბაიდენი ამ მომენტში თვითმფრინავიდან ჯერ კიდევ არ ჩამოდიოდა.
ბაიდენი თვითმრფინავის წინა კარიდან 23:26 საათზე გამოვიდა და კიბეზე უპრობლემოდ ჩამოვიდა.
აღსანიშნავია, რომ ბაიდენის თვითმფრინავიდან ჩასვლის კადრებს პოლონეთის საზოგადოებრივი მაუწყებელიც პირდაპირ ეთერში გადასცემდა. კადრებში ნათლაც ჩანს, რომ ბაიდენი კიბიდან შეუფერხებლად ჩამოდის.
წყაროს შესახებ:
ფანტ ინა სხვადასხვა თემაზე დეზინფორმაცია წარსულშიც ავრცელებდა. ფანტ ინა ერთ-ერთი იყო იმ ანტივაქსერულ ფეისბუქ-ანგარიშებს შორის, რომლებმაც უკრაინაში ომის დაწყების შემდეგ რუსეთის მიერ მხარდაჭერილი კონსპირაციების თეორიებისა და დეზინფორმაციის გავრცელება დაიწყეს. Ვრცლად იხილეთ:
- მობილიზაციის გამო ხარკივის კომისარიატის დაწვა თუ 2014 წლის ხანძარი მოსკოვში სამშენებლო ობიექტზე – რას ასახავს ვიდეო ?
- INSIDER: უკრაინის თავდაცვის სამინისტროდან “გაჟონილი” დოკუმენტი METABIOTA-ს შესახებ, ყალბია
- რა ხდება ისრაელში და აწარმოებს თუ არა საქართველო ვაქცინირებულებში ინფიცირების და ჰოსპიტალიზაციის სტატისტიკას?
- ვინ ავრცელებს კანადის პრემიერმინისტრის პროგრამულად დამუშავებულ ფოტოს?
- დეზინფორმაცია და შეთქმულების თეორიების “X ზონა” – სოციალურ ქსელში TV იბერიის გადაცემის ძველი ჩანაწერი ვრცელდება
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
