15 მარტს ფეისბუქ-მომხმარებელმა Larisa Tsitlanadze-მ რამდენჯერმე გამოაქვეყნა ვიდეო, რომელიც ზუგდიდში ექიმ ლანა უბილავას COVID-19-ის ასტრაზენეკათი ვაქცინაციას ასახავს. Larisa Tsitlanadze ვიდეოსთვის დართულ ტექსტში წერს, რომ ნემსის წვერი ამპულის არასწორ ადგილზეა მიდებული და “ექიმმა ვითომ წამალი ამოიღო”.
Larisa Tsitlanadze-მ აღნიშნული ვიდეო პირველად, 11:58 საათზე გამოაქვეყნა და მას 17:00 საათის მდგომარეობით, 4 800-ზე მეტი გაზიარება აქვს. ფეისბუქ-მომხმარებელმა იდენტური ვიდეო 13:06 საათზე და 14:35 საათზეც გამოაქვეყნა.
მსგავსი ვიდეო პარტია “საქართველოს” თავმჯდომარე გიორგი ლილუაშვილმა, ასევე ფეისბუქ-პროფილებმა მაია დვალიძემ, ნი მფა-მ და გვერდმა ახალგაზრდული გაავრცელეს. მაია დვალიძე და გვერდი “ახალგაზრდული” წერენ, რომ ექთანს შპრიცში სხვა სითხე წინასწარ ჰქონდა გამზადებული და მას ამპულიდან ვაქცინის სითხე არ ამოუღია.
ფეისბუქ-მომხმარებლების მტკიცება, თითქოს ექთანს ვაქცინის ამპულიდან სითხე არ ამოუღია და ექიმი ლანა უბილავა არ აცრილა, დეზინფორმაციაა. ვიდეოს 21-ე წამზე ჩანს, რომ შპრიცი სითხითაა შევსებული და ექთანი უბილავას მკლავზე ცრის.
სოციალურ ქსელში გავრცელებული ვიდეო ტელეკომპანია “რუსთავი 2-ის” ეთერიდანაა ამოღებული. როგორც რუსთავი 2-ის, ისე ფეისბუქ-მოხმარებლების გავრცელებულ ვიდეოში ჩანს, რომ შპრიცი სითხითაა შევსებული და ექთანი ლანა უბილავას მკლავზე ვაქცინას ნამდვილად უკეთებს.
ვაქცინაციის პროცესი საქართველოში ასტრაზენეკას ვაქცინით დღეს, 15 მარტს დაიწყო. პირველი ვაქცინა საჯაროდ დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ გაიკეთა. იმნაძის შემდეგ, COVID-19-ის საწინააღმდეგო ვაქცინით მარინა ეზუგბაია და მარინა ენდელაძეც საჯაროდ აიცრნენ.
არქივის ბმულები:
Larisa Tsitlanadze
George Liluashvili
მაია დვალიძე
ნი მფა
ახალგაზრდული
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
