17 სექტემბერს ყალბმა ფეისბუქ-ანგარიშმა “მარეხი ლიპარიშვილი” გაავრცელა საქართველოს სახელმწიფო უსაფრთხოების სამსახურის ყოფილი უფროსის, გრიგოლ ლილუაშვილის ფოტო და ციტატა: ‘’პირადად ბიძინა ივანიშვილი გვაიძულებდა ნაციონალური მოძრაობის დაფინანსებას’’. იგივე ციტატა ერთ-ერთმა ფეისბუქ მომხმარებელმა 29 ივლისსაც გამოაქვეყნა.
ნაციონალური მოძრაობის დაფინანსებაზე გრიგოლ ლილუაშვილის სახელით გავრცელებული ციტატა ყალბია. ღია წყაროებით არ დასტურდება, რომ სუს-ის ყოფილმა უფროსმა მსგავსი შინაარსის განცხადება გააკეთა.
გრიგოლ ლილუაშვილის სახელით გავრცელებული ციტატა ყალბია. მსგავსი ფრაზა რომელიმე ქართულენოვან მედიას (1;2;3) არ გამოუქვეყნებია და არც სხვა წყაროებით გავრცელებულა.
ივლისში გამოქვეყნებულ პოტზე ჩანს, რომ ციტატა აღებულია Tik Tok გვერდიდან სახელწოდებით “georgiandream2”. 22 სექტემბრის მონაცემებით, მსგავსი სახელწოდების Tik Tok გვერდი აღარ იძებნება. აღსანიშნავია, რომ “მითების დეტექტორს” მსგავსი სტილით გაყალბებული ყოფილი პრემიერ-მინისტრის, ირაკლი ღარიბაშვილის ციტატა წარსულშიც აქვს გადამოწმებული. ამ შემთხვევაში, გაყალბებული ციტატა Tik Tok ანგარიშმა “georgiandream.4141” გაავრცელა და შემდგომ საკუთარ ფეისბუქ-გვერდზე ყალბმა ანგარიშმა მარეხი ლიპარიშვილმა გადაიტანა. “Georgiandream.4141-ს” მსგავსი არაერთი გაყალბებული ციტატა აქვს გამოქვყენებული. შესაძლოა, Tik Tok გვერდები ერთმანეთთან იყოს დაკავშირებული.
წყაროს შესახებ
ლილუაშვილის სახელით გამოგონილი ციტატის ერთ-ერთი გამავრცელებელი ფეისბუქ ანგარიში მარეხი ლიპარიშვილი ყალბი ანგარიშია. პროფილი ფეისბუქზე თავდაპირველად გვანცა გოგოლაძის სახელით დარეგისტრირდა.
პროფილის ფოტო ანგარიშს არ ეკუთვნის, ის 2016 წელს რუმინელმა ფოტოგრაფმა მიჰაელა ნოროჩმა აზერბაიჯანში ვიზიტისას გადაიღო პროექტისთვის ‘’სილამაზის ატლასი’’. ნოროჩის პოსტის მიხედვით, ფოტოზე ქალი სახელად ფიდანია.
’მითების დეტექტორმა’’ ანგარიში მარეხი ლიპარიშვილის მიერ გავრცელებული ყალბი ციტატა 2025 წლის თებერვალშიც გადაამოწმა. მაშინ ანგარიში ნინო წილოსანის ყალბ ციტატას ავრცელებდა.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
