4 სექტემბერს ფეისბუქის რუსულენოვანმა ანგარიშებმა (1;2;3;4) გაავრცელეს შვედი გარემოს დამცველი აქტივისტის, გრეტა თუნბერგის ფოტო. კადრში მას გულ-მკერდთან ჩაჭრილი მაისური აცვია, კომენტარებში კი მომხმარებლების ნაწილი მის მკერდზე ამახვილებს ყურადღებას.
ფეისბუქზე გრეტა თუნბერგის ფოტოფაბრიკაცია ვრცელდება. ფოტო პროგრამულად არის დამუშავებული და მაისურზე ამოჭრილი ნაწილი დამატებულია.
გრეტა თუნბერგის აღნიშნული ფოტო გასული დღეების მანძილზე არაერთ სოციალურ ქსელში გავრცელდა. კადრების უკუძიების მეთოდის გამოყენებით მივაკვლიეთ ავთენტიკურ ფოტოს, რომელზეც აქტივისტი თითქმის იდენტურად გამოიყურება, თუმცა მის მაისურს გულ-მკერდის არეში ჭრილი არ აქვს.
თუნბერგს იმავე ტანისამოსში ვხედავთ Associated Press-ის 1 სექტემბრის სტატიასა და სიუჟეტში, საიდანაც ვიგებთ, რომ ბარსელონადან ღაზას სექტორის მიმართულებით ჰუმანიტარული ტვირთით რამდენიმე გემი გავიდა. აღსანიშნავია, რომ თუნბერგმა 2025 წლის ივნისშიც სცადა გემით ღაზას სექტორში შეღწევა, თუმცა ისრაელის მიერ დაწესებული ბლოკადის გამო, გემი საზღვართან დააკავეს და ევროპაში დააბრუნეს.
გრეტა თუნბერგის შესახებ გავრცელებული დეზინფორმაცია, ფოტო და ვიდეო მანიპულაციები “მითების დეტექტორს” წარსულშიც გადაუმოწმებია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
