23 დეკემბერს ფეისბუქ-მომხმარებლებმა გაავრცელეს (1;2) ვიდეო, რომელშიც პროსახელისუფლებო ტელეკომპანია POSTV-ის ჟურნალისტი ექსპრეზიდენტ მიხეილ სააკაშვილის დედას, გიული ალასანიას ეკითხება, თუ ვის მხარდასაჭერად არის ხალხი აქციაზე. ალასანია ამბობს: “უკრაინის, პირველ რიგში და, რა თქმა უნდა, ჩემი შვილის, რომელიც არის უკრაინის მოქალაქე და უკრაინის ერთ-ერთი მაღალი თანამდებობის პირი”. პოსტების გამოხმაურებიდან ირკვევა, რომ ფეისბუქ-მომხმარებლები ვიდეოს მიმდინარე საპროტესტო აქციებს უკავშირებენ.
სოციალურ ქსელში გიული ალასანიას ვიდეო მანიპულაციური აღწერით, უკონტექსტოდ ვრცელდება. ის არა მიმდინარე აქციებზე, არამედ 2023 წლის 24 თებერვალს, უკრაინის მხარდასაჭერ აქციაზეა გადაღებული.
ვიდეო, რომელსაც ფეისბუქ-მომხმარებლები აქვეყნებენ, 2024 წლის 20 დეკემბერს TikTok-ზე გავრცელდა. მომხმარებლები ვიდეოს საქართველოში მიმდინარე აქციებს უკავშირებენ და ამით ცდილობენ პროტესტის დისკრედიტაციას.
სინამდვილეში ეს კადრები ტელეკომპანია POSTV-ის მიერ 2023 წლის 24 თებერვალს, უკრაინის მხარდამჭერ აქციაზე არის გადაღებული. სიუჟეტი, რომელშიც ალასანიას ვიდეო იყო ნაჩვენები, გადაცემა “კვირის პოსტში” 26 თებერვალს გავიდა (58:30).
2023 წლის 24 თებერვალს საქართველოში უკრაინის მხარდამჭერი აქცია გაიმართა. რუსეთის უკრაინაში შეჭრიდან 1 წლის თავზე აქციაზე შეკრებილები უკრაინას უცხადებდნენ სოლიდარობას. ამავდროულად, აქციაზე მიმდინარეობდა კამპანია, რომელიც მიზნად ისახავდა, საჰაერო თავდასხმების გაძლიერების ფონზე, უკრაინას სასწრაფო დახმარების მანქანა გადასცემოდა.
ვიდეოს საფუძველზე საპროტესტო აქციებს მიხეილ სააკაშვილს უკავშირებენ. აღნიშნულის მიზანი მიმდინარე აქციების პოლიტიკური პარტიის მიერ ორგანიზებულად გამოცხადება და პროტესტისა და ოპოზიციური პარტიების დისკრედიტაციაა.
წყაროს შესახებ
ფეისბუკ-მომხმარებელი “ისევ მბლოკავენ ფანტინა” მცდარ ინფორმაციას რამდენიმე ანგარიშით ავრცელებს (1;2). მას დეზინფორმაციული ცნობები თუ მანიპულაციური ვიზუალური მასალა წარსულშიც გავრცელებია. მან მიმდინარე აქციების მადისკრედიტირებელი არაერთი პოსტიც გამოაქვეყნა.
ანდრია საჯაია
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
