29 მაისს “ერი მედიის” ეთერში, გადაცემაში “გონიერი სოსო მანჯავიძესთან ერთად” სტუმარმა ელიზაბეთ ლეინმა, რომელიც გადაცემაში წარმოდგენილია, როგორც ქართული წარმოშობის ამერიკელი ჟურნალისტი, სხვადასხვა თემაზე ისაუბრა. მისი თქმით, აშშ-სა და ევროპაში, კონკრეტულად კი გერმანიაში დემოკრატია აღარ არსებობს, რასთან დაკავშირებითაც მან მაგალითად მოიყვანა გერმანიის საგარო საქმეთა მინისტრის ანალენა ბერბოკის შემდეგი განცხადება: “მე არ მაინტერესებს რას ფიქრობს ჩემი გერმანელი ამომრჩეველი”
ბერბოკზე იმავე ინფორმაციას რუსულენოვანი ფეისბუქ მომხმარებლები ადრეც ავრცელებდნენ (1, 2, 3).
ანალენა ბერბოკის ციტატა მანიპულაციურად, კონტექსტის გარეშე არის გამოყენებული და ქმნის შთაბეჭდილებას, თითქოს გერმანიის საგარეო საქმეთა მინისტრს გერმანელი ამომრჩეველი არ ადარდებს. აღნიშნული განცხადება ბერბოკმა უკრაინის დახმარების კონტექსტში გააკეთა და აღნიშნა, რომ მას სურს გააგრძელოს უკრაინის მიმართ უპირობო სოლიდარობა და ასევე მაქსიმალური სოციალური დახმარება გაუწიოს მოქალაქეებს გაზრდილი ფასების გამო.
2022 წლის 31 აგვისტოს გერმანიის საგარეო საქმეთა მინისტრმა, ანალენა ბერბოკმა პრაღაში გამართულ კონფერენციაზე, რომელიც დემოკრატიის საფრთხეებს და უკრაინის ომს ეხებოდა, რუსეთის წინააღმდეგ დაწესებულ სანქციებზე ისაუბრა. შეკითხვაზე, თუ რამდენ ხანს უნდა შენარჩუნებულიყო რუსეთის წინააღმდეგ სანქციები, ბერბოკმა უპასუხა, რომ მიღებული ზომები იმ დრომდე უნდა გაგრძელდეს, სანამ ეს უკრაინას დასჭირდება. რეალურად, ბერბოკმა ნამდვილად გამოიყენა სიტყვები “არ აქვს მნიშვნელობა, რას ფიქრობენ ჩემი გერმანელი ამომრჩევლები”, თუმცა ეს განცხადება გაკეთებული იყო უკრაინის კონტექსტში, რაზეც მან აღნიშნა, რომ უკრაინელებს დახმარების პირობას მისცა, შესაბამისად, ყველაფრის მიუხედავად, სურს ეს პირობა შეასრულოს. მისი თქმით, ევროპელი პოლიტიკოსები სოლიდარულები არიან თავიანთი მოქალაქეების მიმართ ენერგიის გაზრდილი ფასების გამო, მაგრამ ასევე დაეხმარებიან უკრაინას რუსეთის აგრესიის მოგერიებაში. შესაბამისად, ბერბოკის განცხადება ნიშნავს, რომ სანქციები რუსეთის წინააღმდეგ უნდა დარჩეს ძალაში და ის სოციალური შედეგები, რაც ამას მოყვება ევროკავშირის მოქალაქეებისთვის, უნდა დაკომპენსირდეს სახელმწიფოს ხარჯზე.
ბერბოკის სიტყვები რუსულ წყაროებში სრული კონტექსტის გარეშე, ფრაგმენტულად გავრცელდა, რამაც შექმნა შთაბეჭდილება, თითქოს ის გერმანელების ინტერესებზე მაღლა უკრაინელების ინტერესებს აყენებდა. გავრცელებული ინფორმაცია 2022 წელს ფაქტების გადამოწმების ორგანიზაცია Stopfake-მა, ასევე გერმანულმა მედია BR24-მა გადაამოწმა.
ანალენა ბერბოკი: „როდესაც მე პირობას ვაძლევ უკრაინელ ხალხს – და საბედნიეროდ, დემოკრატიულ პირობებში, ადამიანებს შეუძლიათ შემეწინააღმდეგონ და ოთხ წელიწადში თქვან: „სიმართლე არ გითქვამთ“ – მაგრამ როცა ამ პირობას ვაძლევ უკრაინელებს: „ჩვენ თქვენს გვერდით ვიქნებით მანამ, სანამ დაგჭირდებათ“, მაშინ მე მინდა ეს შევასრულო, არ აქვს მნიშვნელობა რას ფიქრობენ ჩემი გერმანელი ამომრჩევლები, მაგრამ მინდა უკრაინელი ხალხისთვის მიცემული პირობა შევასრულო. და ამიტომ ჩემთვის მნიშვნელოვანია ვიყო ყოველთვის ძალიან ღია და მკაფიო. ეს ნიშნავს, რომ ყოველი ზომა, რასაც მე მივმართავ, უნდა გაგრძელდეს მანამ, სანამ უკრაინას სჭირდება.“
რამდენიმე წინადადების შემდეგ ბერბოკმა აღნიშნა, რომ რუსეთის წინააღმდეგ დაწესებულმა სანქციებმა გერმანიის მოქალაქეებისთვის სოციალური პირობები დაამძიმა და ტვირთის შესამსუბუქებლად სპეციალური ზომების მიღება გახდება საჭირო. ამის შემდეგ ბერბოკმა კიდევ ერთხელ გაუსვა ხაზი თავის ვალდებულებებს საკუთარი ხალხის წინაშე: „ჩვენ ვრჩებით სოლიდარულები ყველასთან ჩვენს ქვეყანაში, ისევე როგორც ყველასთან უკრაინაში“.
ანალენა ბერბოკი: “ახლა კი ჩვენ წინ გვაქვს ზამთარი, სადაც ჩვენ, როგორც დემოკრატიული პოლიტიკოსები, გამოწვევის წინაშე ვდგავართ, რომ მოქალაქეები ქუჩაში გამოვლენ და იტყვიან: „ენერგიის გადასახადს ვეღარ გადავიხდით“. მე კი ვამბობ: „დიახ, ვიცი და დაგეხმარებით სოციალურ ზომებში“, მაგრამ არ მინდა ვთქვა: „კარგი, მაშინ შევაჩეროთ სანქციები რუსეთის წინააღმდეგ“. ჩვენ ვდგავართ უკრაინის გვერდით და ეს ნიშნავს, რომ სანქციები დარჩება ზამთარში, მაშინაც კი, თუ ეს გაგვიჭირდება პოლიტიკოსებს და ჩვენ უნდა ვიპოვოთ სწორი გადაწყვეტილებები მთელ ევროპაში სოციალური ეფექტების დასაბალანსებლად, რადგან ეს არის ომის მეორე მხარე.”
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
