2024 წლის 14 მაისს კრემლისტური ტელევიზიის ალტ ინფოს გადაცემაში “ალტ-ანალიტიკა” წამყვანმა გიორგი ქარდავამ ისაუბრა ე.წ. ჯენ ზი თაობაზე (Gen Z). მისი მტკიცებით, დასავლეთში, კონკრეტულად დასავლურ ციფრულ სამყაროში ჯენზის ნაცვლად იყენებენ ტერმინს “ზუმერი”. ქარდავა ამბობს, რომ ტერმინი დამაკნინებელია და აღნიშნავს “სიდებილეს, გაუნათლებლობას და ინტელექტის დეფიციტს”.
ინფორმაცია, რომლის თანახმადაც ტერმინ “ზუმერს” ნეგატიური განმარტება აქვს და ასოცირდება სიდებილესთან, გაუნათლებლობასთან და უინტელექტობასთან, არ შეესაბამება სიმართლეს. სიტყვა “ზუმერი” მიიღეს ბუმერისა (1946-1964 წლების თაობა) და ზეტის ან ინგლისური სიტყვა zoom-ის გაერთიანებით. ორივე შემთხვევაში, აღნიშნავს თაობას, რომელიც ტექნოლოგიის ბუმის ეპოქაში გაიზარდა.
თაობა ზეტი – ჯენ ზი
თაობა ზეტად მოიხსენიებენ 1990-იანების მიწურულსა და 2000-იანების დასაწყისში დაბადებულ ადამიანებს. ზუსტ თარიღებზე კონსენსუსი არ არსებობს, თუმცა ღია წყაროებში ხშირად გვხვდება 1997-2012 წლები. თაობას “ზეტი” ანბანური თანმიმდევრობის საფუძველზე დაარქვეს. მის ორ წინამორბედს ჰქვია თაობა იქსი, Gen X, (1965-1980 წლებში დაბადებული ადამიანი) და თაობა ვაი, Gen Y, ასევე, ცნობილი როგორც მილენიალი (1981-1996). ინგლისურ ანბანში X და Y ასოებს მოყვება ასო Z (ზეტი), რის გამოც ჩამოყალიბდა ტერმინი “თაობა ზეტი”.
ერთ თაობას შეიძლება რამდენიმე სახელი ჰქონდეს, როგორც გვხვდება, მაგალითად, თაობა ვაი-ს, ანუ, მილენიალების, შემთხვევაში. ვინაიდან არ არსებობს სახელის მომფიქრებელი ცენტრალური ფიგურა ან ინსტიტუტი, სახელის დამკვიდრება, დამოკიდებულია საზოგადოებაზე. სხვადასხვა პერიოდში, ჯენზის არქმევდნენ აი-თაობასა (igeneration) და თაობა Wii-ს. ერთ-ერთი ასეთი სახელი, რომელიც ყველაზე მეტად გავრცელდა არის “ზუმერი” (Zoomer). ერთი ვერსიით, ზუმერი არის ზეტის და ბუმერის (1946-1964 წწ-ს თაობა) გაერთიანება და ასოცირდება ტექნოლოგიური და კულტურული ბუმის ფონზე აღზრდისა და ცხოვრების სწრაფ მეთოდთან. მეორე ვერსიით, სახელი წარმოიშვა სიტყვა ზუმ (ინგ. Zoom – სწრაფი გადაადგილება) და ბუმერის გაერთიანებით. ამ შემთხვევაშიც, აქცენტი ტექნოლოგიაზე და ცხოვრების სწრაფ ტემპზეა. ჯენზის ახასიათებენ როგორც ტექნიკის მცოდნე, პროგრესულ და ცნობისმოყვარე თაობას.
რაც შეეხება ჯენზის და განათლებას, Pew Research Center-ის კვლევის თანახმად, ჯენზი ყველაზე განათლებული თაობის გზას ადგას. 2018 წლის მდგომარეობით, 18- 21 ასაკობრივი ჯგუფის 57%% ჩაირიცხა კოლეჯში. სტატისტიკა, წინა თაობებთან შედარებით, გაზრდილია. ამ ასაკობრივ ჯგუფს, ასევე, დიდი ალბათობით ჰყავს კოლეჯში განათლებული მშობელი, რაც ხელს უწყობს უმაღლესი განათლების მიღწევას.
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
