18 ნოემბერს ოპოზიციის მადისკრედიტირებელმა ფეისბუქ-გვერდმა Aravin საპროტესტო აქციის ვიდეო გამოაქვეყნა. ვიდეოში აქციის მონაწილეს სხეულზე საპროტესტო სტიკერები “დაიბრუნე ხმა!” აქვს მიკრული, მალევე ახალგაზრდა სტიკერებს სახიდან იშორებს და იქვე მდგარ უნიტაზზე ჯდება.
საპროტესტო აქციის ვიდეო ხელოვნური ინტელექტის (AI) გამოყენებით არის შექმნილი და რეალობას არ ასახავს.
გავრცელებული ვიდეო ხელოვნური ინტელექტის გამოყენებით არის შექმნილი და შესაბამისად 18 ნოემბრის აქციას არ ასახავს. კადრებზე დაკვირვებისას ჩანს, რომ ვიდეოში ხელოვნური ინტელექტით შექმნილი ვიზუალისთვის დამახასიათებელი ხარვეზებია.
ვიდეოკადრების შენელებისას ეს ხარვეზები კიდევ უფრო თვალსაჩინოა. იმ მომენტში როდესაც ახალგაზრდა სახიდან სტიკერებს იხსნის, ეს სტიკერები, ფაქტობრივად უჩინარდება და სახეს ერწყმის. გარდა ამისა უკანა ფონზე მდგომი აქციის მონაწილეების სახეებიც არაბუნებრივი და დამახინჯებულია.
აღსანიშნავია ისიც, რომ “დაიბრუნე ხმას” საპროტესტო რეალურ სტიკერებთან მსგავსების მიუხედავად, ხელოვნური ინტელექტის მიერ შექმნილ ვიდეოში წარწერის და განსაკუთრებით პირველი სიტყვის – “დაიბრუნე” წაკითხვა ფაქტობრივად შეუძლებელია. წარწერა მხოლოდ ვიზუალურად და ზოგადი მონახაზებით ჰგავს ამ სიტყვას. ტექსტი განსაკუთრებულად არის დამახინჯებული კადრის უკიდურეს ქვედა ნაწილში. წარწერების მსგავსი დამახინჯება ხელოვნური ინტელექტის მიერ შექმნილი ვიზუალებისთვის არის დამახასიათებელი.
არაბუნებრივია ახალგაზრდას მოძრაობაც შემდეგ კადრებში, როცა ის უნიტაზზე ჯდება. კადრების მონაცვლეობა ქმნის შთაბეჭდილებას, რომ უნიტაზი აქციის მონაწილისგან მცირე მანძილის მოშორებით დგას, თუმცა მისი სხეული ისე მოძრაობს, თითქოს უნიტაზი უშუალოდ მის გვერდით უნდა იდგეს. შედეგად ფიგურა ერთი ადგილიდან მეორეზე უეცრად და არაბუნებრივად ჩნდება. ამავე კადრებში ჩანს, რომ ფურცლები და ადამიანის ხელები კვლავ ერთმანეთს ერწყმის და უკანა ფონზე საპროტესტო პლაკატების წარწერები გაურკვეველია.
ხელოვნური ინტელექტის მიერ შექმნილი კონტენტის ამომცნობი ხელსაწყოს TrueMedia.org-ის შეფასებითაც ვიდეო ხელოვნური ინტელექტის გამოყენებით მანიპულირების ბევრ ნიშანს მოიცავს.
წყაროს შესახებ:
ვიდეო ოპოზიციის მადისკრედიტირებელმა გვერდმა Aravin გაავრცელა. გვერდი 2023 წლის 12 ნოემბერს შეიქმნა, თუმცა ამჟამად პოსტები მხოლოდ 2024 წლის აპრილიდან აქვს გამოქვეყნებული. გვერდის მიერ გამოქვეყნებული ფაქტობრივად ყველა პოსტი მოკლე ვიდეო Reel-ია.
ხელოვნური ინტელექტით გენერირებულ ვიდეოზე გადადებულია წარწერები “შიგ ევროპაში”, ანალოგიური წარწერით ვიდეოებს ოპოზიციის მადისკრედიტირებელი კიდევ ერთი გვერდი “შიგ ევროპაში” ავრცელებს.
ორივე გვერდი ხშირად ავრცელებს იდენტურ კონტენტს. ორივე გვერდი, განსაკუთრებით კი “შიგ ევროპაში” პოსტებს ასპონსორებს. ნოემბერში გვერდმა 62 პოსტი დაასპონსორა, რომელთაგან ყველა საპროტესტო აქციების და ოპოზიციის დისკრედიტაციისკენ იყო მიმართული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
