19 იანვარს ფეისბუქზე გავრცელდა ინფორმაცია, რომ ევროპარლამენტი მერაბ დვალიშვილის გამარჯვებას არ ცნობს და მიიჩნევს, რომ უმარ ნურმაგომედოვთან მისი ორთაბრძოლა თავიდან უნდა გაიმართოს. სხვა შემთხვევაში ევროპარლამენტი დვალიშვილის UFC-ის ლეგიტიმურ ჩემპიონად არ ცნობს.
მტკიცება, რომ ევროპარლამენტმა მერაბ დვალიშვილის გამარჯვება არ აღიარა, დეზინფორმაციაა. ევროპარლამენტს UFC-სთან კავშირი არ აქვს და დვალიშვილთან ან UFC-სთან დაკავშირებით რაიმე სახის განცხადება არც ახლა და არც წარსულში არ გაუკეთებია.
მერაბ დვალიშვილსა და უმარ ნურმაგომედოვის ორთაბრძოლა 18 იანვარს გაიმართა. სამივე მსაჯის ერთსულოვანი გადაწყვეტილებით ორთაბრძოლაში დვალიშვილმა გაიმარჯვა. მსაჯებმა მატჩი 48:47, 49:46, 48:47 ქართველი მებრძოლის სასარგებლოდ შეაფასეს. ორთაბრძოლის შემდეგ ნურმაგომედოვმა აღნიშნა, რომ თავის მართლებას არ აპირებდა, თუმცა პირადად თავს დამარცხებულად არ გრძნობდა და ტრავმებთან გამკლავების შემდეგ ბრძოლას დაუბრუნდებოდა. სხვა მხრივ მას ორთაბრძოლის შედეგებთან დაკავშირებით პროტესტი არ გამოუთქვამს.
ბრძოლასთან დაკავშირებით ევროპარლამენტს რაიმე სახის განცხადება არ გაუკეთებია. დვალიშვილთან დაკავშირებით კომენტარი არც ევროპარლამენტის ოფიციალურ საიტზე და არც ორგანოს სოციალური მედიის გვერდებზე გამოქვეყნებულა. ევროპარლამენტი ევროკავშირის საკანონმდებლო ორგანოა, რომელსაც კერძო, ამერიკული ორგანიზაციის UFC-ის ჩემპიონატთან კავშირი ან მის შედეგებზე გავლენა არ აქვს. შესაბამისად რომელიმე შეხვედრის შედეგებში ეჭვის შეტანა მის კომპეტენციაში არ შედის. ევროპარლამენტს სპორტულ ღონისძიებასთან დაკავშირებით არც წარსულში გაუკეთებია რაიმე განცხადება.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
