9 ივლისს ფეისბუქ გვერდმა მართლმადიდებლური გვერდი პრაიდის დროშის ფოტო გამოაქვეყნა, რომლის ცენტრშიც შავ წრეში ხუთქიმიანი ვარსკვლავი და რქოსანი ცხოველის თავია გამოსახული. თანდართული აღწერის მიხედვით ფოტო შეერთებულ შტატებშია გადაღებული, სადაც ლგბტქი+ ადამიანები მიზნებს აღარ მალავენ და დროშაზე სატანა ბაფომეტი გამოსახეს.
დროშის ფოტო ავთენტიკურია, თუმცა მცდარი აღწერით, კონტექსტის გარეშე ვრცელდება. დროშა “სატანის ეკლესიამ” სტოუნვოლის აჯანყების 50 წლისთავის აღსანიშნავად შექმნა და ის ლგბტქი+ ადამიანების რაიმე მიზანზე არ მიანიშნებს.
-
გავრცელებული დროშა “სტოუნვოლის აჯანყების” 50 წლისთავის აღსანიშნავად შეიქმნა
დროშა, რომელსაც ფეისბუქზე გავრცელებულ ფოტოზე ვხედავთ, “სატანის ეკლესიას” (The Church of Satan”) ეკუთვნის. ორგანიზაციის ტვიტერის ოფიციალურ გვერდზე ვკითხულობთ, რომ დროშა 2020 წელს, “სტოუნვოლის აჯანყების” 50 წლისთავის აღსანიშნავად შეიქმნა და მასზე ნამდვილად ბაფომეტია გამოსახული.
ამ და სხვა მსგავსი სტილის დროშების შეძენა ორგანიზაციის საიტზეა შესაძლებელი:
სქრინშოტი: satanme.com
“სატანის ტაძარი” რელიგიური ორგანიზაციაა,რომლის წევრები ათეისტები არიან და სატანას არ სცემენ თაყვანს. ორგანიზაციის დაარსების თარიღად 1966 წელი ითვლება, როდესაც ანტონ ლავეიმ წიგნი “სატანის ბიბლია” გამოსცა.
სქრინშოტი: churchofsatan.com
“სატანის ტაძრის” წევრების რწმენით, სამყარო ადამიანების მიმართ გულგრილია, ამიტომ მორალი და ღირებულებები ადამიანებმა შექმნეს. აღსანიშნავია, რომ ორგანიზაცია ლგბტქი+ თემს მხარს უჭერს.
“სატანის ტაძრის” განმარტებით, დროშა “სტოუნვოლის აჯანყების” 50 წლისთავის აღსანიშნავად შეიქმნა. “სტოუნვოლის აჯანყების” სახელით 1969 წელს ნიუ-იორკში პოლიციასა და ლგბტქი+ აქტივისტებს შორის მომხდარი რამდენიმედღიანი დაპირისპირებაა ცნობილი. მოვლენა ლგბტქი+ აქტივისტების ამ მასშტაბის პირველ წინააღმდეგობას წარმოადგენდა და როგორც ამერიკაში, ასევე მის საზღვრებს გარეთ, ლგბტქი+ უფლებებისთვის ბრძოლის მოძრაობის ერთ-ერთ კატალიზატორად ითვლება.
წყაროს შესახებ:
ფეისბუქ გვერდი მართლმადიდებლური გვერდი ჰომოფობიური შინაარსის ინფორმაციას ხშირად ავრცელებს, კორონავირუსის პანდემიის დაწყების შემდეგ გვერდი ანტივაქსერული შინაარსის ცნობებსაც აქვეყნებდა. ვრცლად გვერდის მიერ გავრცელებული დეზინფორმაციის შესახებ იხილეთ “მითების დეტექტორის” მასალებში:
- რას ასახავს ფოტო, რომელსაც ანტივაქსერულ პროტესტს მიაწერენ ?
- მართლმადიდებლური ტაძარი უცხოეთში თუ ხელოვნური ინტელექტის მიერ გენერირებული ფოტო?
არქივის ლინკი: 1
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
