29 აპრილს ფეისბუკ-გვერდმა СМЕРШ გამოაქვეყნა ვიდეო, აღწერით: „გერმანელი ჟურნალისტების გამოძიება. უკრაინისთვის განკუთვნილ ჰუმანიტარულ დახმარებას საზღვართან ყრიან და სატვირთოებს შეიარაღებით ავსებენ. “
იდენტური ვიდეო იმავე შინაარსის აღწერით ფეისბუკ-პროფილმა Larissa Prince გამოაქვეყნა.
ვიდეო ყალბი აღწერით ვრცელდება. ინფორმაცია, თითქოს პოლონეთ-უკრაინის საზღვართან სატვირთოები იმიტომ იცლება, რათა შემდეგ ის იარაღით დატვირთონ, არც მოცემულ ვიდეოში და არც ღია წყაროებით არ დასტურდება. სინამდვილეში, ვიდეოში ჟურნალისტი ამბობს, რომ ხშირად ჰუმანიტარული ტვირთის გადანაწილების კოორდინაცია საკმაოდ რთულია და საზღვარზე სათანადოდ გადატანაც ვერ ხერხდება. იარაღს კი საერთოდ არ ახსენებს.
ვიდეო გერმანული მედიის Blaulicht-Magazin-ის გვერდიდან არის აღებული. ფეისბუკ-გვერდზე ვიდეო 7 მარტს განთავსდა. აღწერაში მითითებულია, რომ უკრაინელების დახმარების სურვილი დიდია და უკრაინასა და პოლონეთში ლტოლვილების დასახმარებლად უამრავი ტვირთი იგზავნება – მათი კოორდინირება და გადანაწილება კი რთულია. ვიდეოსა თუ მის აღწერაში არსად არის აღნიშნული, რომ სატვირთოები იმიტომ იცლება, რათა ის შემდეგ იარაღით დატვირთონ.
გერმანელი ჟურნალისტი: „აქ თავმოყრილია საკმაოდ დიდი რაოდენობის საჭირო ნივთები, მაგალითად ზამთრის ქურთუკები, რომლებიც ამ პერიოდში, როდესაც ტემპერატურა ნულ გრადუსზეა, ნამდვილად საჭიროა. ძალიან სამწუხაროა, რომ ეს ყველაფერი, ამ რაოდენობის პროდუქცია, აქ ასე უბრალოდ აწყვია. ხშირად მათი გადანაწილების კოორდინაცია საკმაოდ რთულია და საზღვარზე სათანადოდ გადატანაც ვერ ხერხდება. ძალიან სამწუხაროა, ვინაიდან საკმაოდ ბევრი ადამიანი გერმანიიდან ახდენს მსგავსი ნივთების დონაციას, რათა ისინი პოლონეთის საზღვრიდან უკრაინაში იქნეს გაგზავნილი.“
აღსანიშნავია, რომ ომის პირობებში მიღებული ჰუმანიტარული ტვირთის კოორდინირება საკმაოდ რთულია. ჰუმანიტარული დახმარების ნაწილი მართლაც ყრია პოლონეთ-უკრაინის საზღვარზე და წვიმების შედეგად ნელ-ნელა ნადგურდება. ამის მიზეზი კი ისაა, რომ ტვირტი იმდენად ბევრია, რომ ხშირად საწყობები სავსეა და მათ შესანახად არც სივრცე და არც საკმარისი მუშახელი ჰყავთ.
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
