18 თებერვალს ფეისბუქ-ანგარიშმა ნონა შარაბიძემ შოკოლადის ფილის ფოტო გამოაქვეყნა. შეფუთვაზე პატარა ბიჭი შავი ლენტითაა გამოსახული და წარწერა “სიკვდილი ალიოშკას” (Смерть Алёшки) ჩანს. შოკოლადის შეფუთვის ზედა მარჯვენა კუთხეში უკრაინის გერბია გამოსახული. პოსტის თანახმად, შოკოლადი უკრაინაში გამოუშვეს, რაც კიდევ ერთხელ ადასტურებს, რომ ქვეყანაში “ნაციზმი ყვავის.”
ეს ვიზუალი რუსულენოვანმა წყაროებმა (1, 2), მათ შორის კრემლის პროპაგანდისტულმა tsargrad.tv-მ, ასევე ფეისბუქ-ანგარიშებმა (1, 2, 3, 4) 30-31 იანვარს გაავრცელეს. ისინი აღნიშნავენ, რომ შოკოლადის შეფუთვაზე გამოსახული ბავშვი ბელგოროდის რაიონში მცხოვრები 8 წლის ალიოშკაა, რომელიც 2022 წელს “რუსეთის სპეციალური ოპერაციის” სიმბოლო გახდა.
დეზინფორმაციაა, თითქოს 8 წლის რუსი ბიჭის სიკვდილის მოწოდებით უკრაინაში შოკოლადები გამოუშვეს. ღია წყაროებში შოკოლადის ერთადერთი, მხოლოდ ის ფოტო იძებნება, რომელიც რუსულენოვანმა წყაროებმა გაავრცელეს. გამოსახულება რუსეთში წარმოებული ცნობილი ტკბილეულის Алёнка-ს შოკოლადის ფილის პროგრამულად დამუშავების შედეგადაა მიღებული. უკრაინაში ასეთი შოკოლადის შექმნა უკრაინის კულტურისა და საინფორმაციო პოლიტიკის სამინისტროს “სტრატეგიული კომუნიკაციისა და საინფორმაციო უსაფრთხოების ცენტრმაც” უარყო.
ღია წყაროებში არ იძებნება ისეთი ფოტოები, რომლებიც შოკოლადს რომელიმე მაღაზიაში აჩვენებდა ან უბრალოდ სხვა რაკურსითაც გამოაჩენდა.
შოკოლადის შეფუთვა საბჭოთა კავშირში, შემდეგ კი რუსეთში წარმოებულ ცნობილი შოკოლად “ალიონკას” (Алёнка) შეფუთვასაა მიმსგავსებული. შეფუთვაზე წარწერების ნაწილი რუსულია, ნაწილი კი უკრაინული. “ალიონკას” მწარმოებელი კომპანია “წითელი ოქტომბერია” (Красный Октябрь), გავრცელებულ შეფუთვაზე ეს სახელი Красный Орк-ით არის ჩანაცვლებული.
გარდა ამისა, შოკოლადის შეფუთვაზე 1997, 1998, 2000 წლებში ჩატარებულ კონკურსებში მიღებული ჯილდოებია გამოსახული, რომლებიც ასევე “ალიონკას” შეფუთვის დიზაინიდანაა აღებული. ეს ჯილდოები რეალურად “Красный Октябрь-ს” ეკუთვნის.
ქვედა მარცხენა კუთხეში გაკეთებული უკრაინული წარწერის მიხედვით, პროდუქტი უკრაინის ეროვნული სტანდარტის მიხედვითაა დამზადებული (зроблено згідно з ДСТУ). მსგავსი წარწერა (сделано по ГОСТ “დამზადებულია სახელმწიფო სტანდარტის შესაბამისად”) იდენტურ ადგილას ორიგინალ პროდუქტს რუსულ ენაზე აქვს, რაც კიდევ ერთხელ მიგვანიშნებს, რომ შეფუთვის დიზაინი “ალიონკას” პროგრამულად დამუშავებით მიიღეს.
აღსანიშნავია, რომ შოკოლად “ალიონკას” უკრაინული ვერსიაც არსებობს, თუმცა მას სრულიად განსხვავებული დიზაინის მქონე შეფუთვა აქვს და უკრაინული კომპანია Roshen აწარმოებს.
აღსანიშნავია, რომ Красный Октябрь-ს წარმოებული Алёнка-ს შოკოლადის ფილა სოციალურ ქსელში ვიზუალური მანიპულაციის საგანი ხშირად ხდება. Სხვადასხვა დროს მისი ვიზუალის დამუშავებით სხვადასხვა შინაარსის გასართობ ფოტოებს ქმნიდნენ.
უკრაინის კულტურისა და საინფორმაციო პოლიტიკის სამინისტროს “სტრატეგიული კომუნიკაციისა და საინფორმაციო უსაფრთხოების ცენტრმა” რუსული პროპაგანდისტული მიზნებისთვის გავრცელებული ვიზუალის შესახებ მომზადებული პუბლიკაცია გამოაქვეყნა და ამ დეზინფორმაციის იდეა ახსნა. ცენტრის მიხედვით, ინფორმაციის პირველწყარო პროპაგადანტისტული ანტიუკრიანული ტვიტერის ანგარიში “Donbass Devushka” არის და რეალურად, შოკოლადის შეფუთვები გაყალბებულია.
რუსეთში, ბელგოროდის რაიონში მცხოვრები 8 წლის ბიჭი ალექსეი პავლიჩენკო რუსულ სოციალურ ქსელებსა და მედიაში რუსეთის უკრაინაში შეჭრიდან მალევე, 2022 წლის გაზაფხულიდან აქტიურად ჩნდება. ის უკრაინაში რუსეთის სამხედრო აგრესიის ერთ-ერთ სიმბოლოდ აქციეს.
ბელგოროდი უკრაინის მოსაზღვრე რაიონია, 8 წლის ალექსეი კი რუს ჯარისკაცებს, რომლებიც უკრაინისკენ მიემართებოდნენ, ყოველდღიურად სამხედრო ფორმაში ჩაცმული ესალმებოდა. მას ფორმაზე რუსული სამხედრო სიმბოლო Z ჰქონდა მიმაგრებული და ამავე სიმბოლოს დროშას აფრიალებდა. კრემლის პროპაგანდისტული მედია აქცენტს აკეთებდა იმაზე, რომ ბიჭს სამომავლოდ თვითონაც ჯარისკაცობა სურს და ამასთან, ვლადიმირ პუტინთან შეხვედრაზე ოცნებობს.
პროპაგანდისტული PR კამპანია არაერთ ღონისძიებას მოიცავდა. 8 წლის ალიოშა რუსეთის შეიარაღებული ძალების წარმომადგენლებს შეხვდა, ასევე ესტუმრა კადეტთა სკოლას, ქუჩებში მისი გამოსახულებით არაერთი ქუჩის მხატვრობა და პოსტერი გამოჩნდა.
კამპანიის ფარგლებში ჯერ კიდევ 2022 წლის მაისში 8 წლის ბიჭის გამოსახულებით ლიმიტირებული რაოდენობის შოკოლადი “Алёшка” გამოუშვეს. ეს სახელწოდებაც ცნობილ რუსულ შოკოლადს Алёнка-ს უკავშირდება.
ნონა შარაბიძე, რომელმაც შოკოლადის შესახებ პოსტი გამოაქვეყნა, დეზინფორმაციას რეგულარულად ავრცელებს. მის მიერ გავრცელებული მცდარი მტკიცებები “მითების დეტექტორმა” აქამდეც არაერთხელ გადაამოწმა. ვრცლად იხილეთ:
- ტანკი უკრაინისთვის თუ 2007 წლის მანჩესტერ პრაიდისთვის?
- ემსხვერპლა თუ არა პუშკინის ბიუსტის დემონტაჟს ჟიტომირის მცხოვრები?
- რა წერია რეალურად ევროკავშირის 12-პუნქტიან გეგმაში?
- ვინ აყენებს ეჭვქვეშ რუსული ავიაციის მიერ საცხოვრებელი კორპუსების დაბომბვას?
- “როკფელერებისა და როტშილდების კონსპირაციების ანატომია “
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
