10 ოქტომბერს ტელეკომპანია ალტ-ინფოს გადაცემაში “ალტერნატიული ხედვა” სტუმარმა, რევაზ კილასონიამ განაცხადა, რომ საქართველოს ექსპორტის 90-95% რუსეთის ფედერაციაში გადის.
კილასონია [58:20]: მიუხედავად იმისა, რომ 2015 წელს ხელი მოვაწერეთ ევროკავშირთან ღრმა და ყოვლისმომცველ სავაჭრო ხელშეკრულებას, ჩვენი ექსპორტი მაინც 90-95%, მაინც რუსეთში გადის ვიდრე დასავლეთში.
მტკიცება, რომ საქართველოს ექსპორტის 90-95% რუსეთში გადის, მცდარია. საქართველოს სტატისტიკის ეროვნული სამსახურის მონაცემებით, ბოლო 5 წელში რუსეთში ექსპორტის წილი 10.8-14.4% შორის მერყეობდა, ხოლო ევროკავშირში 11.6%-21.2% შორის.
საქართველოს სტატისტიკის ეროვნული სამსახურის მონაცემებით, ქვეყნის ექსპორტის 90-95% ერთ რომელიმე ქვეყანაში არ გადის. 2024 წლის იანვარ-აგვისტოში ყველაზე მსხვილი საექსპორტო ქვეყანა ყირგიზეთი იყო და მისი წილი მთლიან ექსპორტში 17.9%-ია. რაც შეეხება რუსეთს, ის საექსპორტო ქვეყნებს შორის მეოთხეა და მისი წილი 11.2%-ია.
ბოლო 5 წლის განმავლობაში, საექსპორტო ქვეყნებს შორის რუსეთის წილი 10.8 და 14.4%-ს შორის მერყეობდა.
| წელი | რუსეთის წილი საქართველოს ექსპორტში (%) |
| 2023 | 10.8 |
| 2022 | 11.5 |
| 2021 | 14.4 |
| 2020 | 13.2 |
| 2019 | 13.1 |
აღსანიშნავია, რომ საქართველოს მთლიან ექსპორტში 90-95%-იანი წილი ქვეყნების რომელიმე ერთ ჯგუფსაც არ უჭირავს. 2024 წლის იანვარ-აგვისტოს ექსპორტის მონაცემები ქვეყნების ჯგუფების მიხედვით შემდეგნაირად გამოიყურება:
ბოლო 5 წლის განმავლობაში ექსპორტში ყველაზე დიდი წილი დსთ-ს ქვეყნებზე მოდის (45.1%-66%), ევროკავშირის ქვეყნების წილი 11.6%-21.2% შორის მერყეობს.
| წელი | ევროკავშირის ქვეყნების წილი (%) | დსთ-ს ქვეყნების წილი (%) | დანარჩენი ქვეყნების წილი (%) |
| 2023 | 11.6 | 66 | 22.4 |
| 2022 | 15.5 | 48.1 | 36.4 |
| 2021 | 19.9 | 47.6 | 35.5 |
| 2020 | 20.9 | 45.1 | 34 |
| 2019 | 21.2 | 53.8 | 25 |
პროცენტული წილი დათვლილია საქართველოს სტატისტიკის ეროვნული სამსახურის მონაცემების მიხედვით
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
