2023 წლის 12 ოქტომბერს რუსულენოვანმა მედიამ utyug.info, ასევე რუსულ და ქართულენოვანმა ფეისბუქ ანგარიშებმა გაავრცელეს მტკიცება, რომ ისრაელის ერთ-ერთმა ცნობილმა საკონდიტრო მაღაზიამ დაამზადა ტორტი, რომელიც უკრაინის პრეზიდენტის, ვოლოდიმირ ზელენსკის, ჩამოხრჩობას ასახავს. ინფორმაციის წყაროდ, The Jerusalem Post-ის სტატიაა დასახელებული, ხოლო პოსტების ავტორების მტკიცებით, თელ-ავივში დაფუძნებული საკონდიტრო მაღაზიის მეპატრონე ავი მელამედსონმა აღშფოთება ამ ფორმით გამოხატა და განაცხადა, რომ ეს არის “პერფორმანსი ზელენსკის კორუმპირებული მთავრობის მოქმედების წინააღმდეგ, რომელთა წყალობითაც ასობით ტონა იარაღი მოხვდა ჰამასის ხელში.” პოსტების ნაწილს აგრეთვე თან ერთვის ვიდეო და მელამედსონის საკონდიტრო მაღაზიის ინსტაგრამ სთორის სქრინშოთი. ყველა მათგანზე The Jerusalem Post-ის ლოგოა გამოსახული.
მტკიცება, თითქოს ისრაელის საკონდიტრო Melamedsonpastry-მ პრეზიდენტი ზელენსკის ჩამოახრჩობის ამსახველი ტორტი დაამზადა დეზინფორმაციაა. ავი მელამედსონმა, Melamedsonpastry-ის მფლობელმა, გავრცელებული მტკიცება “მითების დეტექტორთან” მიმოწერაში უარყო. ამასთანავე, მსგავსი სტატია არც The Jerusalem Post-ის ოფიციალურ ვებ-საიტზე და არც გამოცემის სოციალური მედიის ანგარიშებზე არ გამოქვეყნებულა.
ინფორმაციის გადასამოწმებლად „მითების დეტექტორი“ აღნიშნული საკონდიტროს მფლობელს, ავი მელამედსონს დაუკავშირდა, რომელმაც წერილობით კომუნიკაციაში კატეგორიულად უარყო გავრცელებული ინფორმაცია და განაცხადა, რომ ეს არის მიზანმიმართული პროვოკაცია, რომელიც მიზნად შუღლის გაღვივებას ისახავს. მან ასევე დასძინა, რომ მის საცხობს მსგავსი ტიპის პროდუქტი არასდროს შეუქმნია.
აღსანიშნავია ისიც, რომ გავრცელებული ვიდეო “The Jerusalem Post”-ის ძველ ლოგოს იყენებს. უნდა აღინიშნოს, რომ TJP-ის ამჟამინდელი ლოგო და შრიფტი განსხვავებულია.
“მითების დეტექტორმა” აგრეთვე საფუძვლიანად შეისწავლა როგორც მელამედსონის საცხობის, ისე The Jerusalem Post-ის ვებ-საიტი და სოციალური მედიის ანგარიშები. მელამედსონის საკონდიტროს ოფიციალურ ფეისბუქსა და ინსტაგრამ გვერდებზე ან მის ვებსაიტზე არცერთ მსგავს მოვლენასთან დაკავშირებული პოსტი ან განცხადება არ გვხვდება. გარდა ამისა, არცერთი მსგავსი სტატია არ გამოქვეყნებულა The Jerusalem Post-ის მიერ არც ვებგვერდზე და არც მის სოციალური მედიის ანგარიშებზე (1,2,3).
წყაროს შესახებ:
ფეისბუქის ანგარიში “Eduard Jishkariani” ხშირად ანტიდასავლურ და ანტიუკრაინული შინაარსის შემცველ პოსტებს. მის მიერ გავრცელებული დეზინფორმაცია მითების დეტექტორს წარსულშიც არაერთხელ გადაუმოწმებია (1, 2, 3).
სუბჰან ჰესენლი
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
