10 ოქტომბერს ფეისბუქ ანგარიშმა “ნაცნობი უფნობი” გააზიარა ვიდეო, რომლის მიხედვითაც ის ამტკიცებს, რომ ისრაელში 7 ოქტომბერს გამართული მუსიკალური ფესტივალის მონაწილეებს ჰამასის პოლიცია აფრთხილებს მოსალოდნელი საფრთხის შესახებ, რაც, პოსტის ავტორის თქმით, ვიდეოშიც ჩანს. “საინფორმაციოები კი გამოსცემენ, რომ ჰამასი დაესხა თავსო” – ვკითხულობთ პოსტში.
მტკიცება იმის შესახებ, რომ ისრაელში გამართული მუსიკალური ფესტივალის მონაწილეები მოსალოდნელი საშიშროების შესახებ ჰამასის პოლიციამ გააფრთხილა, დეზინფორმაციულია. რეალურად, ვიდეოში ნაჩვენები შეირაღებული პირები, რომლებიც ხალხს ტერიტორიის დატოვებისკენ მოუწოდებენ, ფესტივალის უსაფრთხოების ოფიცრები არიან.
7 ოქტომბერს ჰამასის მიერ ისრაელზე დაწყებული შეტევის ერთ-ერთი პირველი მსხვერპლი ნეგევის უდაბნოში მიმდინარე მუსიკალური ფესტივალი “სუპერნოვას” მონაწილეები გახდნენ. ტერორისტებმა ცეცხლი გახსნეს ფესტივალის ტერიტორიაზე, რის შედეგადაც ისრაელის მხარის ცნობით მინიმუმ 260 მშვიდობიანი მოქალაქე დაიღუპა, ათობით კი მძევლად აიყვანეს. შეტევის დაწყებამდე და შეტევის პროცესში სოციალურ ქსელებში ბევრი ვიდეო გავრცელდა. არაერთმა ცნობილმა საერთაშორისო მედიამ, მათ შორის ბიბისიმ და გარდიანმა გავრცელებული კადრები გაანალიზა, საიდანაც დგინდება, რომ ფესტივალის მონაწილეებს ტერიტორიის დატოვების შესახებ ღონისძიების მიერ დაქირავებულმა უსაფრთხოების ოფიცრებმა მოუწოდეს და არა ჰამასმა.
2023 წლის 7 ოქტომბერს ტერორისტულმა დაჯგუფება ჰამასმა, რომელიც ღაზის სექტორს მართავს, ისრაელის მიმართულებით მოულოდნელი შეტევა განახორციელა. ჰამასის ლიდერის ისმაილ ჰანიეს განცხადებით, შეტევა არის პასუხი ისრაელის მიერ ალ-აქსას მეჩეთზე განხორციელებულ თავდასხმებზე. ის ამტკიცებდა, რომ ისრაელს გადაწყვეტილი ჰქონდა ამ მეჩეთის ხელში ჩაგდება, რასაც პალესტინელი ხალხი არ დაუშვებს. შეტევა რომელიც ებრაული ქალაქების მასიური სარაკეტო დარტყმებით დაიწყო, ღაზა-ისრაელის საზღვრის გარღვევითა და ჰამასის შეიარაღებული წევრების მიერ მშვიდობიან მოსახლეობასა და ისრაელის ბაზებზე თავდასხმით გაგრძელდა და შედეგად, ტერორისტებმა 1200-ზე მეტი ადამიანი მოკლეს, 150 კი გაიტაცეს. ისრაელმა ამ აქტის საპასუხოდ ომი გამოაცხადა, დაიბრუნა კონტროლი საზღვარზე და ჰამასის 1500-მდე მებრძოლი დახოცა. ღაზას სექტორის დაბომბვის შემდეგად კი 950-ზე მეტი პალესტინელი დაიღუპა. პრემიერ-მინისტრმა ბენიამინ ნეთანიაჰუმ პირობა დადო, რომ ისრაელი ჰამასს გაანადგურებს და განხორციელებული თავდასხმის გამო შურს იძიებს.
წყაროს შესახებ:
ფეისბუქ ანგარიში “ნაცნობი უფნობი” იგივე “ფანტინა” მის სხვა ანგარიშებთან ერთად (1, 2, 3) დეზინფორმაციებსა და კონსპირაციებს ხშირად ავრცელებს, რაც “მითების დეტექტორს” წარსულშიც გადაუმოწმებია (1, 2, 3).
სტატია Facebook-ის ფაქტების გადამოწმების პროგრამის
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
